ໜ້າຫຼັກ ບັນເທີງ ນ້ຳຕົກຕາດຫານແຈະ ສະຫວັນກາງດົງ ຂອງນັກປະຈົນໄພ

ນ້ຳຕົກຕາດຫານແຈະ ສະຫວັນກາງດົງ ຂອງນັກປະຈົນໄພ

5 ຄົນ ກຳລັງອ່ານຢູ່
0
0
69
Loading...

ນ້ຳຕົກຕາດຫານແຈະ ເປັນອີກໜຶ່ງສະຖານທີ່ ທີ່ຫຼາຍຄົນເຫັນພາບແລ້ວຢາກຈະໄປສຳພັດດ້ວຍຕົນເອງ ເນື່ອງຈາກເປັນສະຖານທີ່ໆມີຄວາມອຸດົມສົມບູນ ແລະ ມີຄວາມສວຍງາມເປັນເອກະລັກທາງດ້ານທຳມະຊາດ.

ນ້ຳຕົກຕາດ ຫານແຈະ ເກີດຈາກສາຍນ້ຳປານທີ່ນອນຢູ່ໃນຂອບເຂດປ່າສະຫງວນຂອງແຂວງ, ເຂດບ້ານ ຕະນອງປໍ ເມືອງຫຼາ ແຂວງອຸດົມໄຊ. ຕາມການບອກເລົ່າຂອງຊາວບ້ານຕະນອງປໍສືບຕໍ່ກັນມາຫຼາຍເຊັ່ນຄົນກ່ຽວກັບຊື່ເອີ້ນຂອງຕາດໃຫ້ຮູ້ວ່າ: ໃນສະໄໝກ່ອນຫຼາຍເຊັ່ນຄົນມາແລ້ວໄດ້ມີຄົນຊົນເຜົ່າລາວລຸ່ມຜູ້ໜຶ່ງໄປຫາກິນຢູ່ເຂດປ່າດັ່ງກ່າວ ແລ້ວຖືກເສືອໄລ່ກັດ ເມື່ອແລ່ນໜີເສືອມາຮອດຫົວຕາດ ຜູ້ກ່ຽວບໍ່ມີທາງເລືອກກໍເລີຍຕັດສິນໃຈໂດດລົງນ້ຳຕົກຕາດເຮັດໃຫ້ຜູ້ກ່ຽວເສຍຊີວິດຄາທີ່ຈົນມາເຖິງປະຈຸບັນຈິ່ງເລົ່າຂານກັນວ່າຕາດຫານແຈະຍ້ອນແມ່ນຄົນລາວລຸ່ມມາເສຍຊີວິດຢູ່ນ້ຳຕົກຕາດແຫ່ງນີ້.


ຈຸດເດັ່ນຂອງນ້ຳຕົກຕາດຫານແຈະ ເປັນນ້ຳຕົກທີ່ມີຄວາມສູງປະມານ 25-30 ແມັດ, ນໍ້າຕົກເປັນລັກສະນະຍ້ອຍ ເປັນສາຍຍາວ ເຮັດໃຫ້ເກີດມີຄວາມງົດງາມທີ່ສຸດ, ບໍລິເວນໜ້າຕາດຈະເປັນພະລານຫິນຮາບພຽງ ສາມາດນັ່ງຫຼີ້ນ ຫຼື ກາງເຕັ້ນນອນພັກຜ່ອນຢ່ອນກາຍໄດ້. ຢູ່ໃກ້ກັບຕາດໃຫຍ່ຍັງມີຕາດນ້ອຍເປັນຊັ້ນໆ ລັກສະນະພະລານຫິນທີ່ມີຄວາມສວຍງາມ,ບໍລິເວນນ້ຳຕົກເປັນເຂດປ່າດົງຕຶບໜາ, ມີສັນພູເປັນຊັ້ນໆທີ່ມີຄວາມອຸດົມສົມບູນທີ່ສຸດ.


ສຳລັບການເດີນທາງໄປຊົມນ້ຳຕົກຕາດຫານແຈະ ແມ່ນສາມາດເດີນທາງດ້ວຍລົດ ໄປທາງເລກ 2E ຈາກເທດສະບານແຂວງອຸດົມໄຊໄປ ຫາ ເມືອງຫຼາປະມານ 17 ກິໂລແມັດ ແລ້ວຈະມີທາງແບ່ງ ເປັນທາງສຳຮອງຂຶ້ນສູ່ບ້ານ ຕະນອງປໍປະມານ 3 ກິໂລແມັດ ຈາກນັ້ນ ຈະມີທາງລົດທະລຸໄປຫາເຂດການຜະລິດຂອງປະຊາຊົນປະມານ 6 ກິໂລແມັດ ແລ້ວຈະມີຈຸດພັກລົດ. ຖັດຈາກນັ້ນ ຈະເປັນທາງຍ່າງໄປຕາມເຂດການພະລິດຂອງຊາວບ້ານແລ້ວຈະລຽບເລາະຂຶ້ນຕາມສາຍນ້ຳໂດຍໃຊ້ເວລາປະມານ 2-3 ຊົ່ວໂມງກໍຈະເຖິງນໍ້າຕົກຕາດຫານແຈະ. ການເດີນທາງຈະມີຄວາມຫຍຸ້ງຍາກໄລຍະທີ່ຍ່າງປ່າ ເນື່ອງຈາກຍັງເປັນເສັ້ນທາງຫາກິນຂອງປະຊາຊົນ ພ້ອມທັງເປັນເຂດພູຊັນ ເຊິິ່ງຕ້ອງໃຊ້ຄວາມແຂງແຮງຂອງຮ່າງກາຍ ແລະ ເວລາໃນການເດີນທາງ ແຕ່ເມື່ອໄປຮອດແລ້ວ ຮູ້ສຶກວ່າ ມັນຄຸ້ມຄ່າທີ່ສຸດກັບການທຸ້ມເທ ເພື່ອເດີນທາງໄປຊົມນ້ຳຕົກຕາດແຫ່ງນີ້.
ສັງລວມແລ້ວ ການເດີນທາງໄປຊົມນ້ຳຕົກຕາດ ຫານແຈະເຫັນວ່າບໍ່ໄດ້ໄກຢ່າງທີ່ຄິດ ພຽງແຕ່ໃຊ້ເວລາ 1 ມື້ກໍສາມາດໄປຊົມຄວາມງົດງາມຂອງຕາດ ແລະ ຄວາມອຸດົມສົມບູນຂອງຊີວະນາໆພັນເຂດດັ່ງກ່າວໄດ້ຢ່າງປະທັບໃຈ.

ຢູ່ຫ່າງຈາກຈຸດພັກລົດ ຍັງມີຖ້ຳຫຼວງ ເຊິ່ງກ່ອນໜ້ານີ້ໄດ້ເປີດເປັນແຫຼງທ່ອງທ່ຽວໃຫ້ແຂກຄົນທັງພາຍໃນແລະ ຕ່າງປະເທດເຂົ້າຊົມມາແລ້ວ ແຕ່ເນື່ອງຈາກໄດ້ຮັບຜົນກະທົບຈາກການລະບາດພະຍາດໂຄວິດ19 ເປັນຕົ້ນມາ ເຮັດໃຫ້ບໍ່ມີນັກທ່ອງທ່ຽວເດີນທາງມາທ່ຽວຊົມ.ຈຸດເດັ່ນຂອງຖ້ຳເປັນຖ້ຳທີ່ສວຍງາມອີກແຫ່ງໜຶ່ງ ເຊິ່ງມີຄວາມຍາວປະມານ 400 ກວ່າແມັດ, ກວ້າງ 5-20 ແມັດ ແລະ ສູງປະມານ 2-10 ແມັດ. ດ້ານໃນຖໍ້າມີຫີນຍ້ອຍ,ມີນົມຜາຈັບຕາມເພດານຫິນເປັນຊັ້ນໆ ແລະ ມີແສງສະທ້ອນຍິບຍັບເມືອເຮົາຕ່ອງແສງໄຟໃສ່.ຖ້ຳນີ້ ໄດ້ຄົ້ນພົບໃນປີຄສ 2005. ເຊິ່ງໄດ້ມີຊາວບ້ານຕະນອງປໍໄປຫາກິນຢູ່ບໍລິເວນປາກຖ້ຳ ໂດຍໄດ້ນຳໂຕເຈຍໄປໃນທີ່ສຸດກໍ່ພົບເຫັນຖ້ຳດັ່ງກ່າວ ແລະເປັນຖ້ຳທີ່ໃຫຍ່ກວ່າໝູ່ໃນເຂດນີ້.

ທີ່ມາ: ຂ່າວ​ປະຈຳວັນ​ Daily​ News​ Oudomxay

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

ຂ່າວເດັ່ນທີ່ຢາກໃຫ້ອ່ານ

ກາຍເປັນກະແສດັງ!​ ເມື່ອສາວແຈກເງິນແຕ່ດູຖູກເດັກນ້ອຍ ຍ້ອນຖືກວ່າ​ເຮືອນເຮົາກະລວຍ

ກະດັງນັບຕັ້ງແຕ່​ແລງວັນທີ 30​ ກັນຍາ​ 2021​ ວານນີ້ເປັນຕົ້ນມາ ໂດຍມີຊາວເນັດທ່ານໜຶ່ງສ້າງຄອນເທັ້…