ໜ້າຫຼັກ ການສືກສາ ຢາກໄປຮຽນຈີນ!​ ກົດເຂົ້າ​ອ່ານ​ ຢ່າພາດບົດນີ້

ຢາກໄປຮຽນຈີນ!​ ກົດເຂົ້າ​ອ່ານ​ ຢ່າພາດບົດນີ້

1 ຄົນ ກຳລັງອ່ານຢູ່
0
0
245
Loading...

ນ້ອງໆທີ່ຢາກໄປຮຽນຢູ່ຈີນ ສ່ວນໃຫຍ່ຖ້າເຮົາຖາມວ່າ:​ ຢາກໄປຮຽນຢູ່ເມືອງໃດຂອງຈີນ? ເຮົາຈະໄດ້ຄຳຕອບໂລດວ່າ ບໍ່ແມ່ນປັກກິ່ງກໍ່ຊ່ຽງໄຮ້, ບັງເອີນກົງກັນຂ້າມກັບຂ້າພະເຈົ້າ ຢູ່ຈີນມາສິບກວ່າປີ ໄປທ່ອງທ່ຽວໄດ້ປະມານ 33 ເມືອງຂອງຈີນ, ບໍ່ມັກສຸດແມ່ນຊ່ຽງໄຮ້ ແລະ ປັກກິ່ງ,​ ມັກທີ່ສຸດແມ່ນຢູນນານ ແລະ ກວາງຊີ ເຊິ່ງຖືກເອີ້ນວ່າ ເປັນແຂວງທີ່ພັດທະນາໜ້ອຍທີ່ສຸດຂອງຈີນ.

🥺ຄວາມຊົງຈຳທີ່ບໍ່ດີທີ່ສຸດຢູ່ປັກກິ່ງແມ່ນຢູ່ເທິງລົດໄຟ ຄົນຫຼາຍແຫຍ້ກັນຈົນໂຕເອງຕິດກັບປະຕູລົດໄຟ, ຢູ່ຊຽງໄຮ້ແມ່ນພາແມ່ໄປທ່ຽວ ວາງແຜນຜິດພາດໜ້ອຍດຽວ ແມ່ນເສຍເວລາເລີຍໝົດມື້, ລົດແທັກຊີ້ນັ້ນຫຼາຍ ລົດໄຟກໍ່ຫຼາຍ ແຕ່ຄົນເຕັມຈົນບໍ່ວ່າງ ພາແມ່ ແລະ ຫຼານສາວຕາກຝົນ, ຄ່າຄອງຊີບກໍ່ແພງ.

👉ໂຊກດີ ຕອນທີ່ຕົນເອງຈະໄປຮຽນຢູ່ຈີນ ມີອາຈານຄົນຈີນໄດ້ແນະນຳການເລືອກເມືອງຢູ່ ແລະ ໂຮງຮຽນໃຫ້, ສິ່ງທຳອິດທີ່ເພິ່ນຖາມຂ້າພະເຈົ້າແມ່ນ ເຈົ້າຢາກຮຽນຫຍັງ? ຂ້າພະເຈົ້າຕອບວ່າ ຢາກຮຽນການຢາ, ເພິ່ນບອກທັນທີວ່າມະຫາວິທະຍາໄລທີ່ດີທີ່ສຸດສຳລັບການຢາແມ່ນໂຮງຮຽນໃດ, ຢູ່ໃສ? ຂ້າພະເຈົ້າກໍ່ໄປຕາມເພິ່ນບອກ ກໍ່ຄືເລືອກມະຫາວິທະຍາໄລການຢາແຫ່ງ ສປ ຈີນ ຢູ່ເມືອງໜານຈິງ ໃກ້ໆກັບຊຽງໄຮ້ (ຄວາມຈິງຖ້າມື້ນີ້ໃຫ້ເລືອກໃໝ່ກໍ່ຍັງບໍ່ຢາກຢູ່ໜານຈິງ😅, ຊິຢູ່ແຖວຄຸນໝິງ, ໜານໜິງພີ້ລະ)

😊 ຄວາມຈິງແລ້ວ ມະຫາວິທະຍາໄລດີໆ ກໍ່ບໍ່ຕ່າງຈາກບ່ອນອື່ນຫຼາຍ, ແຕ່ຈະມີຢູ່ປະມານ 3 ຈຸດໃຫຍ່ທີ່ແຕກຕ່າງທີ່ຕົນເອງສະຫຼຸບໄດ້:
1) ນັກຮຽນສ່ວນໃຫຍ່ ແມ່ນນັກຮຽນເກັ່ງ ເປັນແບບຢ່າງໃຫ້ເຮົາພັດທະນາຕົນເອງ, ຍັງຈື່ໄດ້ມື້ທຳອິດທີ່ຕົນເອງຂຶ້ນປີ 1 ຄວາມຮັບຮູ້ເທົ່າກັບ 0, ລະດັບພາສາຈີນຫຼັງຈາກຮຽນພາສາຈີນປີໜຶ່ງຢາກບອກວ່າ ຍັງບໍ່ສາມາດຈະເຂົ້າໃຈໃນສິ່ງທີ່ອາຈານສອນໄດ້ເລີຍ, ລະດັບພາສາພໍແຕ່ສື່ສານທົ່ວໄປ ແລະ ໄປຕະຫຼາດໄດ້, ມື້ທຳອິດ ເລີກຮຽນວິຊາທຳອິດ ສຽງກະລິ່ງດັງ ນັກຮຽນຈີນພາກັນພາຍກະເປົາແລ່ນ, ຂ້າພະເຈົ້າຕົກໃຈຄິດວ່າໄຟໄໝ້ຮີບພາຍກະເປົາແລ່ນນຳຫຼັງໝູ່, ສຸດທ້າຍຄວາມຈິງຄືປ່ຽນຊົ່ວໂມງປ່ຽນຫ້ອງເຂົາແລ່ນໄປຍາດກັນນັ່ງໂຕະໜ້າ😅 ຫຼາຍສິ່ງຫຼາຍຢ່າງທີ່ຮຳ່ຮຽນໄດ້ໃນມື້ນີ້ ຕ້ອງຍອມຮັບວ່າຍ້ອນເຮົາໄດ້ຮູ້ຈັກກັບຄົນເຫຼົ່ານັ້ນ.
2) ການຮຽນແມ່ນບັງຄັບໃຫ້ອ່ານ ແລະ ຂຽນ, ເວລາເຮົາມີບັນຫາໄປຖາມໝູ່: ໝູ່ຕອບມາຄຳດຽວ ໄປອ່ານອັນນັ້ນ ອັນນີ້ເດີ, ໄປຖາມອາຈານ ອາຈານກໍ່ບອກເຮົາວ່າ: ໄປອ່ານ ແລ້ວ ຂຽນມາ (ອ້າວ, ໄປຖາມອາຈານໄດ້ບັນຫາໃໝ່ກັບມາພ້ອມ😅), ຫຼາຍຄັ້ງຫຼາຍຄາວບອກໝູ່ ແລະ ອາຈານວ່າ ອ່ານແລ້ວບໍ່ເຂົ້າໃຈ, ໝູ່ແລະອາຈານຕອບມາແບບດຽວກັນວ່າ: ຍັງບໍ່ໄດ້ຕັ້ງໃຈອ່ານພໍ😅 ຫຼາຍໆຄັ້ງ ກໍ່ເລີ້ມເກີດຄວາມງຸນງົງວ່າ ຕົກລົງເຮົາມາຮຽນແບບໃດ ຄືບໍ່ມີໃຜສົນໃຈຊິສອນເຮົາ, ເປັນຫຍັງໃນທຸກມື້ ມັນມີແຕ່ວຽກບ້ານ ທີ່ຕ້ອງໄດ້ໄປອ່ານ ອ່ານແລ້ວກະມາຂຽນ ຂຽນແລ້ວເຮັດເປັນພາວເວີພ້ອຍ ແລ້ວກໍ່ຂື້ນສະເໜີ, ຍັງຈື່ໄດ້ວ່າຕອນນັ້ນ ນັກສຶກສາຕ່າງປະເທດບໍ່ຈຳເປັນຕ້ອງຮຽນພາສາອັງກິດ ແລະ ຄອມພິວເຕີ (ບໍ່ບັງຄັບ, ຢາກຮຽນກໍ່ໄດ້ ແຕ່ຕ້ອງເສັງໃຫ້ຜ່ານ ໃນຕອນນັ້ນຕົນເອງຄິດວ່າພາສາຈີນກໍ່ຍາກຢູ່ແລ້ວ ຮຽນເອງກໍ່ໄດ້ສາ), ຄັ້ງທຳອິດທີ່ເຮັດບົດພາວເວີພ້ອຍ ປີ 2006, ຫຼັງຈາກສະເໜີບົດແລ້ວ ອາຈານຖາມຄຳດຽວ ບົດພາວເວີພ້ອຍເຈົ້າແມ່ນໃຜເຮັດໃຫ້? ຂ້າພະເຈົ້າຕອບວ່າ: ເຮັດເອງ, ອາຈານເວົ້າວ່າ: ເຮັດເອງລະດີແລ້ວ, ຄັນແມ່ນຄົນຈີນເຮັດໃຫ້ ຂ້ອຍຊິໄປຫັກຄະແນນລາວ ແມ່ນໃຜຄືມາເຮັດບົດພາວເວີພ້ອຍຂີ້ຮ້າຍປານນີ້😅 (ຈັ່ງຊີ້ໄດ໋ ອາຈານຈີນ ປາກຮ້າຍແຕ່ໃຈດີ), ບໍ່ວ່າຈະເປັນບົດຂຽນ ຫຼື ບົດພາວເວີພ້ອຍ ຖ້າເຮົາກັອບປີ້ຄຳເວົ້າໃນອິນເຕີເນັດມາ ອາຈານຮູ້ທັນທີ😅 ແລະ ຈະຖືກຂີດແດງມາໝົດທຸກຄຳ, ສະຫຼຸບ ອາຈານທີ່ເກັ່ງວຽກຍິ່ງຫຍຸ້ງ ບໍ່ມີເວລາ ແຕ່ສິ່ງໜື່ງທີ່ເພິ່ນຈະເຮັດ ຄືໃຊ້ໂປຣແກມກວດຄຳເວົ້າຂອງເຮົາ ຍາມໃດທີ່ບົດເຮົາຍັງບໍ່ແມ່ນບົດທີ່ເຮັດຂື້ນມາດ້ວຍຕົນເອງ ຈະບໍ່ມີມື້ທີ່ບົດຈະຜ່ານ (ແມ່ຖາມຕະຫຼອດ, ປັອກລູກຄືມາດຸຂຽນຫຍັງຫຼາຍແທ້) ກະຍ້ອນຜ່ານການຖືກຝຶກຝົນຕາມທີ່ວ່າຂ້າງເທິງນັ້ນລະມາ, ຈົນມື້ໃດບໍ່ໄດ້ອ່ານ ມື້ໃດບໍ່ໄດ້ຂຽນລະຢູ່ບໍ່ເປັນ, ພ້ອມທັງມັກເຮັດພາວເວີພ້ອຍເປັນຊີວິດຈິດໃຈ😅

3) ມີນັກຮຽນຈາກຫຼາກຫຼາຍປະເທດ ແລະ ກໍ່ລ້ວນແລ້ວແຕ່ເປັນຄົນເກັ່ງ ເກັ່ງອີ່ຫຼີ ບໍ່ມີຄຳຈະບັນຍາຍ ເກັ່ງແບບບໍ່ໜ້າເຊື່ອເຊັ່ນ: ລຸ້ນນ້ອງຄົນອິນເດຍພຽງແຕ່ປະລິນຍາຕີ ຂຽນບົດຕີພິມລົງວາລະສານສາກົນແລ້ວຊາວກວ່າສະບັບ, ຄົນພະມ້າ ລຸ້ນນ້ອງທີ່ຮັກແພງທີ່ສຸດ ອາຍຸ 27 ປີ ຈົບປະລິນຍາເອກ ພ້ອມດ້ວຍການຕີພິມບົດລົງວາລະສານສາກົນທີ່ມີຊື່ສຽງລະດັບໂລກ ປະຈຸບັນເຮັດວຽກຢູ່ຊຽງໄຮ້, ລາວເປັນຄົນທີ່ເຮັດໃຫ້ຂ້າພະເຈົ້າເຂົ້າໃຈຜິດວ່າພາສາອັງກິດເປັນພາສາທາງການຂອງພະມ້າ ເພາະລາວເວົ້າພາສາອັງກິດລ່ຽນໄຫຼ ປານພາສາຕົນເອງ, ຄົນຫວຽດນາມ ທີ່ຫົວໄວ ອາຈານຂຽນເລກຢູ່ກະດານ ລາວນັ່ງຢູ່ລຸ່ມບໍ່ຈົດບໍ່ແຕ້ມ ສະໝອງສາມາດຄິດໄລ່ຄຳຕອບອອກມາແລ້ວ😅, ຍ້ອນຕົນເອງບໍ່ມັກຊຽງໄຮ້ ຈຶ່ງຖາມໝູ່ວ່າເປັນຫຍັງຄືຢາກໄປເຮັດວຽກຢູ່ຊຽງໄຮ້ ລາວຕອບວ່າ ຊຽງໄຮ້ມີບໍລິສັດໃຫຍ່ ຄົນເກັ່ງຫຼາຍ ເຮົາຈະໄດ້ຮຽນຮູ້ ແລະ ພັດທະນາຕົນເອງ😅
ສະຫຼຸບ: ນ້ອງໆ ທີ່ຢາກໄປຮຽນຢູ່ຊຽງໄຮ້ກໍ່ແມ່ນຄິດຈັ່ງຊີ້ແມ່ນບໍ່ນໍ
ທີ່ມາ: Davone Duangdany

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

ຂ່າວເດັ່ນທີ່ຢາກໃຫ້ອ່ານ

ມສ ວຽງຈັນຈະເປີດຮຽນເຊິ່ງໜ້າ ມີຫ້ອງແຍກດ່ຽວສຳລັບປິ່ນປົວຜູ້ຕິດເຊື້ອ

ວັນທີ 17 ມັງກອນ 2022 ນີ້ ທ່ານ ທອງພັນ ອຸໄລທອນ ໄດ້ໃຫ້ສຳພາດຜ່ານໜັງສືພິມປະຊາຊົນວ່າ: ໃນກໍລະນີ ຜ…