Home ຂ່າວກິລາ ມະຫາວິທະຍາໄລແຫ່ງຊາດ ເປີດຫຼັກສູດກີລາ​ບານເຕະ ​​ຫວັງ​ປັ້ນຮຸ່ນ​ສືບ​ທອດກ້າວ​ສູ່​ທີ​ມຊາດ

ມະຫາວິທະຍາໄລແຫ່ງຊາດ ເປີດຫຼັກສູດກີລາ​ບານເຕະ ​​ຫວັງ​ປັ້ນຮຸ່ນ​ສືບ​ທອດກ້າວ​ສູ່​ທີ​ມຊາດ

36 second read
0
0
22
ມະຫາວິທະຍາໄລແຫ່ງຊາດ ເປີດຫຼັກສູດກີລາ​ບານເຕະ ​​ຫວັງ​ປັ້ນຮຸ່ນ​ສືບ​ທອດກ້າວ​ສູ່​ທີ​ມຊາດ

ສະໜາມກີລາ​ບານ​ເຕະຫຍ້າ​ທຽມ ມະຫາ​ວິທະຍາ​ໄລ​ແຫ່ງ​ຊາດ​ລາວ (ມຊ) ພ້ອມ​ຈະ​ເປີດ​​​ສອນ​ຫຼັກສູດ​ກີລາ​ບານເຕະ​ ​ໂດຍ​ຜ່ານທີມງານຜູ້ຝຶກສອນທີ່ມີປະສົບການ ຈາກສະຫະພັນ​ບານ​ເຕະ​ອາຊີ (AFC) ແລະ ອາຈານ​​ຂອງຄະນະວິທະຍາສາດການກີລາ ແລະ ກາຍຍະກໍາ ​ເພື່ອ​ຖ່າຍ​ທອດ​ໃຫ້​ນັກ​ກີລາ ຮຸ່ນອະ​ນຸຊົນ ​ແລະ ​ເຍົາວະ​ຊົນ ​​ອາຍຸລະຫວ່າງ 6 – 16 ປີ ​ແບບ​ບໍ່​ຈໍາກັດ​ເພື່ອ​ສ້າງໃຫ້ກັບ​ທີ​ມຊາດ​ ໃນ​ອະນາຄົດ.

ຕາມ​ການ​ໃຫ້​ສໍາພາດ​ຂອງ ທ່ານ ປອ. ​ໃຈ​ລາສີ ຍໍ​ພັນ​ໄຊ ຜູ້​ຈັດການ​ສະ​ໂມ​ສອນ​ ມຊ ​ເອັບ​ຊີ, ທັງເປັນວ່າການຫົວໜ້າພາກວິຊາວິທະຍາສາດການກີລາ ຄະນະວິທະຍາສາດການກີລາ ແລະ ກາຍຍະກໍາ ແຈ້ງ​ໃຫ້​ຊາບ​ວ່າ: ເພື່ອເປັນການພັດທະນາກີລາບານເຕະໃນ​ຮຸ່ນ​ອະນຸຊົນ ​ແລະ ເຍົາວະຊົນອ້ອມ​ຂ້າງ​ສູນ​ກາງ ຢ່າງເປັນລະບົບ ພ້ອມທັງນໍາໃຊ້ວິທະຍາສາດການກີລາ ເຂົ້າມາຊ່ວຍໃນການຝຶກຊ້ອມ. ດັ່ງ​ນັ້ນ, ສະໂມສອນ ມຊ ຈຶ່ງ​ໄດ້​ຮ່ວມ​ກັບ ສະໜາມກີລາ​ບານເຕະຫຍ້າທຽມ ມຊ ຈະໄດ້ມີການເປີດສອນຫຼັກສູດ​ກີລາ​ບານເຕະ​ໃຫ້ນັກກີລາ​​ຮຸ່ນ​ສືບ​ທອດ​ລະຫວ່າງ ອາຍຸ 6 – 16 ປີ ​ໃນ​ວັນ​ທີ 27 ເມສາ​ນີ້ ເປັນຕົ້ນໄປ.

ການ​ຝຶກສອນ​ໃນ​ຄັ້ງ​ນີ້ ນັກ​ກີລາ​ທຸກ​ຄົນ​ຍັງຈະ​ໄດ້​ຮຽນ​ຮູ້ນໍາທີມງານຝຶກສອນທີ່ຜ່ານການຝຶກອົບຮົມຈາກສະຫະພັນ​ບານ​ເຕະ​ອາຊີ (AFC) ແລະ ອາຈານ​ຂອງຄະນະວິທະຍາສາດການກີລາ ແລະ ກາຍຍະກຳ ມຊ ເພື່ອພັດທະນາ​ເຂົາ​ເຈົ້າ​ສາມາດ​ຕິດ​ທີ​ມຊາດ​ໃນ​ອະນາຄົດກໍ​ຄື: ​ເປັນ​ນັກ​ເຕະ​ລະດັບ​ອາຊີບ ພ້ອມ​ທັງກ້າວ​ຂຶ້ນ​​ໄປ​ເປັນ​ນັກ​ກີລາ​ບານເຕະ​ຂອງ​ສະ​ໂມ​ສອນ ມຊ ​ເອັບ​ຊີ, ​ເຂົ້າ​ຮ່ວມ​ແຂ່ງຂັນ​ລາຍການ​ໃຫຍ່​ຂອງ​ສະຫະພັນ​ບານ​ເຕະ​ແຫ່ງ​ຊາດ ຈັດ​ຂຶ້ນ​ໃນ​ແຕ່ລະ​ປີ​ອີກ​ດ້ວຍ. ສະ​ນັ້ນ, ໃຜທີ່ມີຄວາມຕ້ອງການຢາກຈະ​ເຂົ້າ​ຮ່ວມ​ໂຄງການ​ນີ້ ​ແລະ ສົ່ງເສີມໃຫ້ລູກຫຼານໄດ້ອອກກໍາລັງກາຍ ຕິດ​ພັນ​ກັບການຝຶກສອນແບບມືອາຊີບ ສາມາດ​ຕິດ​ຕໍ່​ພົວພັນ​ກັບທີ​ມງານ​ຂອງ​ພວກ​ເພີ່ນໄດ້ ທີ່ສະໜາມກີລາ​​ບານ​ເຕະດັ່ງກ່າວ ທີ່​ວິທະຍາ​ເຂດດົງ​ໂດກ ​ເມືອງ​ໄຊ​ທານີ ນະຄອນຫຼວງ​ວຽງ​ຈັນ.

ທ່ານ ປອ. ​ໃຈ​ລາສີ ຍໍ​ພັນ​ໄຊ ກ່າວ​ຕື່ມອີກ​ວ່າ: ນອກຈາກ​ເປີດ​ສອນ​ນັກ​ກີລາ​ໃນ​ຮຸ່ນ​ດັ່ງກ່າວ​ແລ້ວ ຍັງ​ໄດ້​ໃຫ້​ບຸລິ​ມະ​ສິດ​ແບບ​ພິ​ເສດ​ແກ່ໂຮງຮຽນ​ພອນ​ສະຫວັນ​ຊົນ​ເຜົ່າ ກຽມມະຫາວິທະຍາໄລແຫ່ງຊາດ ​ແລະ ​ໂຮງຮຽນ​ມັດທະຍົມສົມບູນສາທິດ ທີ່​ຂຶ້ນ​ກັບ ມຊ ສາມາດນໍາ​ໃຊ້ສະໜາມກີລາ​ດັ່ງກ່າວ ​ເຂົ້າ​ໃນ​ການ​ຮຽນ​ການ​ສອນນອກ​ຫຼັກສູດ ​ແບບ​ຟຣີ ບໍ່​ເກັບ​ຄ່າ​ບໍລິການ​ ທັງ 2 ​ໂຮງຮຽນ​ດັ່ງກ່າວ ສາມາດ​ນໍາ​ໃຊ້​ສະໜາມ​ແຫ່ງ​ນີ້ ​ເພື່ອ​ສອນ​ນ້ອງ​ນັກຮຽນ ​ໃນ​ເວລາ 08:00 – 16:00 ​ໂມງ ເປັນ​ຕົ້ນ​ໄປ. ນອກ​ນັ້ນ, ກໍຍັງ​ເປີດ​ຮັບ​ໃຊ້​ບໍລິ​ການ​ແກ່​ສັງ​ຄົມ ​ແລະ ​ນໍາ​ໃຊ້​ເ​ຂົ້າ​ໃນ​ການ​ເກັບ​ຕົວ​ຝຶກ​ຊ້ອມ​ໃຫ້​ແກ່​ນັກ​ກີລາ​​ເຕະບານໃນ​ຮຸ່ນ​ອາຍຸ​ເກີນ 18 ປີ ຊຸດກຽມ​ສົ່ງ​ເຂົ້າ​ຮ່ວມ​ແຂ່ງຂັນ​ເຕະບານ ລີກ​ດິວິ​ຊັນ 1 ຫຼື ສາຍ ກ ຂອງ​ສະຫະພັນ​ບານ​ເຕະ​ແຫ່ງ​ຊາດ 2019 ທີ່​ຈະ​ເປີດ​ແຂ່ງຂັນ​ຫຼັງສິ້ນ​ສຸດ​ການສະ​ເຫຼີ​ມສະຫຼອງ​ບຸນປີ​ໃໝ່​ລາວອີກ​ດ້ວຍ. ​ແນວ​ໃດ​ກໍດີ, ​ໃນ​ຕົ້ນ​ເດືອນ​ພຶດສະພາ​ນີ້ ຈະ​ມີ​ພິທີ​ເປີດ​ນໍາ​ໃຊ້​ສະໜາມກີລາ​ເຕະບານ ຫຍ້າ​ທຽມ ມຊ ຢ່າງ​ເປັນ​ທາງ​ການ.

(​ອ້ວນດໍາ)

ທີ່ມາຂ່າວ ມ່ວນ

Facebook Comments

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Check Also

3 ນັກແລ່ນລາວ ພ້ອມລຸຍຊີງແຊ້ມອາຊີ ທີ່ປະເທດກາຕ້າ ອາທິດນີ້

3 ນັກແລ່ນທີມຊາດລາວ ພ້ອມແລ້ວທີ່ຈະລຸຍການແຂ່ງຂັນແລ່ນ-ລານ ຊີງແຊ້ມອາຊີ ທີ່ເມືອງໂດຮາ ປະເທດກາຕ້າ …