Home ຂ່າວກິລາ ສຳເລັດການແຂ່ງຂັນຍິງປືນ ຊີງຂັນຮອງນາຍົກ ສະຫຼອງວັນສ້າງຕັ້ງກໍາລັງ ປກສ ຄົບຮອບ 58 ປີ

ສຳເລັດການແຂ່ງຂັນຍິງປືນ ຊີງຂັນຮອງນາຍົກ ສະຫຼອງວັນສ້າງຕັ້ງກໍາລັງ ປກສ ຄົບຮອບ 58 ປີ

5 second read
0
0
37
Loading...

ກະຊວງປ້ອງກັນຄວາມສະຫງົບ (ປກສ) ສຳເລັດການແຂ່ງຂັນກີລາຍິງປຶນ ຊີງຂັນທ່ານຮອງນາຍົກລັດຖະມົນຕີແຫ່ງ ສປປ ລາວ ເພື່ອສະເຫຼີມສະຫຼອງວັນສ້າງຕັ້ງກໍາລັງປ້ອງກັນຄວາມສະຫງົບຄົບຮອບ 58 ປີ (5 ເມສາ 1961 – 5 ເມສາ 2019) ເມື່ອວັນທີ 6 ເມສາ ຜ່ານມາ ທີ່ສະໜາມຝຶກຊ້ອມກີລາຍິງປືນ 5 ເມສາ ນະຄອນຫຼວງວຽງຈັນ, ໂດຍມີ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ທ່ານ ພົນເອກ ຈັນສະໝອນ ຈັນຍາລາດ ລັດຖະມົນຕີກະຊວງປ້ອງກັນປະເທດ ແລະ ທ່ານ ພົນໂທ ວິໄລ ຫຼ້າຄໍາຟອງ ລັດຖະມົນຕີ ກະຊວງປ້ອງກັນຄວາມສະຫງົບ ພ້ອມດ້ວຍບັນດາລັດຖະມົນຕີ-ຮອງລັດຖະມົນຕີ ຈາກ 18 ກະຊວງ, ອົງການປົກຄອງນະຄອນຫຼວງວຽງຈັນ ແລະ ອົງການທຽບເທົ່າ 20 ພາກສ່ວນ, ຫົວໜ້າກົມ-ຮອງກົມ ແລະ ນັກກີລາເຂົ້າຮ່ວມ.

ໂອກາດນີ້, ທ່ານ ພົນຕີ ສິນທະວົງ ໄຊຍະກອນ ຮອງລັດຖະມົນຕີກະຊວງປ້ອງກັນຄວາມສະຫງົບທັງເປັນປະທານສະຫະພັນກີລາຍິງປືນແຫ່ງຊາດລາວ ໄດ້ລາຍງານເຖິງປະຫວັດການເຕີບໃຫຍ່ເຂັ້ມແຂງຂອງກໍາລັງປ້ອງກັນຄວາມສະຫງົບໃນພາລະກິດຕໍ່ສູ້ກູ້ຊາດ ແລະ ໄດ້ຮັບການກໍ່ສ້າງ, ປັບປຸງ, ເຕີບໃຫຍ່ຂະຫຍາຍຕົວ ແລະ ເຂັ້ມແຂງຂື້ນໃນຂະບວນວິວັດແຫ່ງແປວໄຟຂອງກໍາລັງປ້ອງກັນຄວາມສະຫງົບປະຊາຊົນໃນແຕ່ລະໄລຍະ. ຊຶ່ງກໍາລັງປ້ອງກັນຄວາມສະຫງົບປະຊາຊົນລາວ ນັບແຕ່ມື້ໄດ້ຮັບການສ້າງຕັ້ງຂຶ້ນແມ່ນໄດ້ເສີມຂະຫຍາຍມູນເຊື້ອອັນດີງາມຂອງກໍາລັງປະກອບອາວຸດປະຕິວັດ ໄດ້ກໍ່ສ້າງກໍາລັງໃຫ້ເຕີບໃຫຍ່ຂະຫຍາຍຕົວທາງດ້ານປະລິມານ ແລະ ຄຸນນະພາບ, ​ສ້າງໃຫ້ຕົນກາຍເປັນກໍາລັງປ້ອງກັນຄວາມສະຫງົບປະຕິວັດທີ່ມີການຈັດຕັ້ງເຂັ້ມແຂງ, ມີວິຊາສະເພາະ ແລະ ແບບແຜນວິທີເຮັດວຽກທີ່ທັນສະໄໝ, ເປັນການທົບທວນວຽກງານຍຸດທະວິທີດ້ານການນຳໃຊ້ອາວຸດຂອງກຳລັງ ປກສ ເພື່ອປັບປຸງຝຶກແອບພັດທະນາຄວາມເຂັ້ມແຂງມີທັກສະ ແລະ ຄວາມຊໍານິຊໍານານ ໃນການຍິງປືນຮັັບໃຊ້ໜ້າທີ່ວິຊາສະເພາະໃຫ້ນາຍແລະພົນຕໍາຫຼວດ ໃນກໍາລັງປ້ອງກັນຄວາມສະຫງົບ ພ້ອມທັງເປັນການຮັດແໜ້ນຄວາມສາມມັກຄີມິດຕະພາບຂອງການນໍາພັກ-ລັດ, ບັນດາຄະນະນໍາກະຊວງ ແລະ ອົງການທຽບເທົ່າຂັ້ນຕ່າງໆໃຫ້ມີບັນຍາກາດຟົດຟື້ນມ່ວນຊື່ນ.

ພ້ອມດຽວກັນນີ້, ທ່ານຍັງໄດ້ກ່າວໂດຍຫຍໍ້ກ່ຽວກັບປະຫວັດຄວາມເປັນມາຂອງສະໜາມຝຶກຊ້ອມກີລາຍິງປືນ 5 ເມສາ ໃຫ້ຮູ້ວ່າ: ສະໜາມຝຶຶກຊ້ອມກີລາຍິງປືນ 5 ເມສາ ແມ່ນການລົງທຶນຂອງກະຊວງປ້ອງກັນຄວາມສະຫງົບ ຮ່ວມກັບ ບໍລິສັດທີ່ປຶກສາດ້ານການລົງທຶນ ແລະ ກໍ່ສ້າງເຂື່ອນໄຟຟ້າ ຈໍາກັດ ໂດຍແມ່ນກະຊວງປ້ອງກັນຄວາມສະຫງົບ ຖືຮຸ້ນ 30% ແລະ ບໍລິສັດທີ່ປຶກສາດ້ານການລົງທຶນ ແລະ ກໍ່ສ້າງເຂື່ອນໄຟຟ້າຈໍາກັດ ຖືຮຸ້ນ 70% ຊຶ່ງສະໜາມດັ່ງກ່າວ ໄດ້ເປີດນໍາໃຊ້ແຕ່ປີ 2016 ເປັນຕົ້ນມາ, ປະກອບມີ ສະໜາມຍິງປືນສັ້ນ, ປືນຍາວ ນັບແຕ່ 25-200 ແມັດ ລວມທັງໝົດ 80 ຊ້ອງ. ພ້ອມນີ້ຍັງມີສະໜາມຍິງປືນໄອພີເອັສຊີ 35 ສະໜາມ, ສະໜາມຍິງເປົ້າບິນ 1 ສະໜາມ, ສະໜາມຍິງທະນູ 1 ສະ ໜາມ, ສະໜາມຫຼິ້ນປືນສີ 2 ສະໜາມ ແລະ ພິເສດຍັງມີສະໜາມຝຶກຊ້ອມຍິງປືນລະບົບ 3D. ຊຶ່ງຈຸດປະສົງໃນການສ້າງ ແມ່ນເພື່ອເປັນສະຖານທີ່ຝຶກແອບນໍາໃຊ້ອາວຸດ-ລູກກະສູນໃຫ້ກໍາລັງວິຊາສະເພາະຂອງກໍາລັງປ້ອງກັນຄວາມສະຫງົບ, ເປັນສະຖານທີ່ຝຶກຊ້ອມໃຫ້ນັກກີລາຍິງປືນທີມຊາດທຸກປະເພດ ເພື່ອກຽມພ້ອມເຂົ້າໃນການແຂ່ງຂັນທັງພາຍໃນ ແລະ ຕ່າງປະເທດ, ເປັນສະຖານທີ່ຈັດການແຂ່ງຂັນກີລາຍິງປືນໃນລະດັບພາກພື້ນ ແລະ ສາກົນ ພ້ອມທັງໃຫ້ບໍລິການຮັບໃຊ້ສັງຄົມຕໍ່ຜູ້ທີ່ມີຄວາມສົນໃຈໃນກີລາປະເພດນີ້.

ການແຂ່ງຂັນກີລາຍິງປືນຄັ້ງນີ້ ແມ່ນແຂ່ງຂັນກັນພຽງມື້ດຽວ ແຂ່ງຂັນກັນຢູ່ 2 ລະດັບ ປະກອບມີ ລະດັບ ວີໄອພີ 1 ແລະ ວີໄອພີ 2 ກໍານົດໄລຍະການຍິງ 15 ແມັດ, ຍິງ ຈໍານວນ 10 ລູກ, ຄະແນນເຕັມ 100 ຄະແນນ. ຜ່ານການແຂ່ງຂັນ ຜົນປາກົດວ່າ ລະດັບ ວີໄອພີ 1 ອັນດັບທີ 1 ທ່ານ ຖະໜອມ ທຳທອງ ເຈົ້າເມືອງໄຊເຊດຖາ, ອັນດັບທີ 2 ທ່ານ ນາງ ສາຍສະໝອນ ຈັນທະຈັກ ຄະນະພັກທະນາຄານແຫ່ງ ສປປ ລາວ ທັງເປັນປະທານສະຫະພັນຮຸ່ນລາວ, ອັນດັບທີ 3 ທ່ານ ສອນທະນູ ທຳມະວົງ ປະທານສະຖາບັນວິທະຍາສາດສັງຄົມແຫ່ງຊາດ ແລະ ອັນດັບທີ 4 ທ່ານ ນາງ ແສງເດືອນ ຫຼ້າຈັນທະບູລີ ລັດຖະມົນຕີກະຊວງສຶກສາທິການ ແລະ ກີລາ. ສ່ວນລະດັບ ວີໄອພີ 2 ອັນດັບທີ 1 ທ່ານ ພົນໂທ ສົມຫວັງ ທຳມະສິດ ຮອງລັດຖະມົນຕີກະຊວງປ້ອງກັນຄວາມສະຫງົບ, ​ອັນດັບທີ 2 ທ່ານ ພົນຈັດຕະວາ ດວງປີ ດາມະນີວົງ ຫົວໜ້າກົມກວດກາ-ກວດການ, ອັນດັບທີ 3 ທ່ານ ພັນເອກ ມາລາ ວິລະຈິດ ຫົວໜ້າກົມຄົ້ນຄວ້າວິທະຍາສາດ-ປະຫວັດສາດ ແລະ ອັນດັບທີ 4 ທ່ານ ພົນຈັດຕະວາ ຄຳມ້າວ ຫຼ້າຈັນເພັດ ຮອງຫົວໜ້າກົມໃຫຍ່ສັນຕິບານ.

ທີ່ມາຂ່າວ ມ່ວນ

Check Also

ກິລາຊຽງຂວາງເກມ ໃຊ້ງົບປະມານທັງໝົດ 47 ຕຶື້ກີບ

ທ່ານ ບຸນຕົ້ນ ຈັນທະພອນ ເຈົ້າແຂວງຊຽງຂວາງ ໄດ້ໃຫ້ສໍາພາດຕໍ່ສື່ມວນຊົນເມື່ອບໍ່ດົນມານີ້ວ່າວ່າ: ແຂວ…