Home ຂ່າວກິລາ “ເປ້ຍ ເຫຼົາພັກດີ” ເລັ່ງຝຶກຊ້ອມຢ່າງໜັກ ກຽມຮ່ວມຊີງແຊ້ມໂລກ ທີ່ກາຊັກສະຖານ

“ເປ້ຍ ເຫຼົາພັກດີ” ເລັ່ງຝຶກຊ້ອມຢ່າງໜັກ ກຽມຮ່ວມຊີງແຊ້ມໂລກ ທີ່ກາຊັກສະຖານ

34 second read
0
0
46

ທ້າວ ເປ້ຍ ເຫຼົາ​ພັກ​ດີ ນັກ​ກີລາ​ຍົກ​ນໍ້າໜັກຄົນ​ພິ​ການ​ທີມ​ຊາດ​ລາວ ເຈົ້າ​ຂອງ​ຫຼຽນ​ຄໍາ ຮຸ່ນນໍ້າໜັກ 49 ກິ​ໂລກ​ຣາມ ງານ​ມະ​ຫາ​ກໍາ​ກິ​ລາ​ອາຊີ​ພາ​ຣາ​ເກມ ຄັ້ງ​ທີ 12 ທີ່​ປະ​ເທດ​ອິນ​ໂດ​ເນ​ເຊຍ ຮັບ​ກຽດ​ເປັນ​ເຈົ້າ​ພາບ ເມື່ອປີ 2018 ສືບ​ຕໍ່​ເກັບ​ຕົວ​ຝຶກ​ຊ້ອມ​ໜັກ​ຂຶ້ນກວ່າ​ເກົ່າ ເພື່ອ​ຝຶກ​ຝົນ​ຫຼໍ່​ຫຼອມ​ຕົນ​ເອງ​ໃຫ້​ມີ​ຄວາມ​​ແຂງແກ່ນ, ສາ​ມາດ​ຮັບ​ປະ​ກັນ​ບັນ​ລຸ​ຄາດ​ໝາຍຕິດ 1 ໃນ 8 ​​ໃນ​ການ​ເຂົ້າ​ຮ່ວມ​ລາຍ​ການ​ຊີງ​ແຊ້ມ​ໂລກ ທີ່​ເມືອງ​ອັດ​ຕາ​ນາ ປະ​ເທດ​ກາ​ຊັກ​ສະ​ຖານ ໃນ​ເດືອນ​ກໍ​ລະ​ກົດ 2019. ຫວັງຄວ້າ​ໂຄ​ຕ້າ​ເຂົ້າ​ຮ່ວມ​ແຂ່ງ​ຂັນ​ງານ​ມະ​ຫາກໍາ​ກີລາ​ພາ​ຣາ​ລິມ​ປິກ​ເກມ ທີ່​ນະ​ຄອນ​ຫຼວງ​ໂຕ​ກຽວ ປະ​ເທດ​ຍີ່​ປຸ່ນ ເປັນ​ເຈົ້າ​ພາບ ໃນປີ 2020.

ຕາມ​ການ​ໃຫ້​ສໍາ​ພາດ​ຂອງ ​ທ້າວ ເປ້ຍ ເຫຼົາ​ພັກ​ດີ ນັກ​ກີ​ລາ​ຍົກ​ນໍ້າໜັກຄົນ​ພິ​ການ​ທີມ​ຊາດ​ລາວ ເມື່ອ​ວັນ​ທີ 4 ເມ​ສາ ຜ່ານ​ມາ ໃນ​ງານ​ພິ​ທີ​ສະ​ຫຼຸບ​ຜົນ​ງານ​ຂອງ​ທັບ​ນັກ​ກີ​ລາ​ຄົນ​ພິ​ການ​ທີມ​ຊາດ​ລາວ ໃນ​ງານ​ມະ​ຫາ​ກໍາ​ກີ​ລາ​ອາ​ຊີ​ພາ​ຣາ​ເກມ ຄັ້ງ​ທີ 12 ທີ່​ປະ​ເທດ​ອິນ​ໂດ​ເນ​ເຊຍ ໃຫ້​ຮູ້​ວ່າ: ພາຍ​ຫຼັງ​ທີ່​ສາ​ມາດ​ສ້າງ​ຜົນ​ງານ​ຄັ້ງ​ປະ​ຫວັດ​ສາດ​ໃຫ້​ແກ່​ປະ​ເທດ​ຊາດ ດ້ວຍ​ການ​ຄວ້າ​ຫຼຽນ​ຄໍາ ຮຸ່ນນໍ້າໜັກ 49 ກິ​ໂລກ​ຣາມ ຈາກ​ງານ​ມະ​ຫາກໍາ​ກີ​ລາ​ອາຊີ​ພາ​ຣາ​ເກມ ຄັ້ງ​ທີ 12 ທີ່​ປະ​ເທດ​ອິນ​ໂດ​ເນ​ເຊຍ ເມື່ອກັບ​ມາ​ເຖິງ​ນະ​ຄອນ​ຫຼວງວຽງ​ຈັນ ກໍ​ໄດ້​ສືບ​ຕໍ່​ພາ​ລະ​ກິດ​ຂອງ​ຕົນ​ເອງ​ຢ່າງເປັນ​ປົກ​ກະ​ຕິ​ ແລະ ໄດ້ຕັ້ງ​ໜ້າ​ບຸກ​ບືນ​ເກັບ​ໂຕ​ຝຶກ​ຊ້ອມ​ໜັກ​ຂຶ້ນກວ່າ​ເກົ່າ ທີ່​ຫ້ອງ​ການ​ອົງ​ການ​ຄົນ​ພິ​ການ​ອາ​ຊີ ​ເພື່ອການ​ພັດ​ທະ​ນາ ຫຼື ເອ​ດີດີ​ພີ ທີ່​ຫຼັກ 3 ເມືອງ​ສີ​ສັດ​ຕະ​ນາກ ນະ​ຄອນ​ຫຼວງວຽງ​ຈັນ. ເພື່ອ​ຮັກ​ສາ​ມູນ​ເຊື້ອ​ຂອງ​ຕົນ​ເອງ​ທີ່​ຕິດ​ອັນ​ດັບ​ທີ 8 ຂອງ​ໂລກ ​ສ້າງ​ຜົນ​ງານບັນ​ລຸ​ຄາດ​ໝາຍ​ໃນ​ການ​ເຂົ້າ​ລາຍ​ການ​ຊີງ​ແຊ້ມ​ໂລກ ຊຶ່ງ​ເປັນລາຍ​ການ​ສະ​ສົມ​ຄະ​ແນນ ຈະ​ຈັດ​ຂຶ້ນ ທີ່​ເມືອງ​ອັດ​ຕາ​ນາ ປະ​ເທດ​ກາ​ຊັກ​ສະ​ຖານ ຮັບ​ກຽດ​ເປັນ​ເຈົ້າ​ພາບ ໃນ​ເດືອນ​ກໍ​ລະ​ກົດ 2019. ລາຍ​ການ​ດັ່ງ​ກ່າວ ຄາດ​ວ່າຈະ​ມີ​ນັກ​ກີ​ລາ​ຈາກ​ທົ່ວ​ໂລກເຂົ້າ​ຮ່ວມ​ແຂ່ງ​ຂັນ. ທັງ​ນີ້, ກໍຫວັງ​ຢາກຄວ້າ​ໂຄ​ຕ້າລາຍ​ການ​ດັ່ງກ່າວ ທີ່​ກໍານົດ​​ອັນ​ດັບ​ຂອງ​ນັກ​ກີ​ລາ​ທີ່​ຕິດ 1 ໃນ 8 ​ເຂົ້າ​ຮ່ວມ​ແຂ່ງ​ຂັນ​ງານ​ມະ​ຫາກໍາກິ​ລາ​ພາ​ຣາ​ລິມປິກ​ເກມ 2020 ທີ່​ນະ​ຄອນ​ຫຼວງ​ໂຕ​ກຽວ ປະ​ເທດ​ຍີ່​ປຸ່ນ. ສໍາ​ລັບ​ການ​ເກັບ​ຕົວ​ຝຶກ​ຊ້ອມ​ຂອງ​ຕົນ​ເອງ​ປັດ​ຈຸ​ບັນ ກຳ​ນົດ​ການ​ຝຶກ​ຊ້ອມອາ​ທິດ​ລະ 3 ມື້ ​ຄື: ວັນ​ຈັນ, ວັນ​ພຸດ ແລະ ວັນ​ສຸກ, ຊ້ອມມື້​ລະ 2 ຊົ່ວ​ໂມງ. ເມື່ອບໍ່​ດົນ​ມານີ້ ກໍ​ໄດ້​ຕາງ​ໜ້າ​ນັກ​ກີ​ລາ​ຄົນ​ພິ​ການ​ລາວ ເຂົ້າ​ຮ່ວມ​ສະ​ແດງ​ຄວາມ​ສາ​ມາດ ​ທີ່​ປະ​ເທດ​ຍີ່​ປຸ່ນ.

ສໍາ​ລັບ​ຜົນ​ງານ​ຂອງ ​ທ້າວ ເປ້ຍ ເຫຼົາ​ພັກ​ດີ ນັກ​ກີລາ​ຍົກ​ນໍ້າໜັກຄົນ​ພິ​ການ​ທີມ​ຊາດ​ລາວ ຮຸ່ນນໍ້າໜັກ 49 ກິ​ໂລກ​ຣາມ ງານ​ມະ​ຫາ​ກໍາ​ກີ​ລາອາຊີພາ​ຣາ​ເກມ ຄັ້ງ​ທີ 12 ທີ່​ປະ​ເທດ​ອິນ​ໂດ​ເນ​ເຊຍ ມີ​ນັກ​ກີ​ລາ​ 11 ຄົນ ຈາກ 9 ປະ​ເທດ ຄື: ສ​ປ​ປ​ ລາວ, ອູສະເບັກກິດ​ຖານ, ຢູ​ເອ​ອີ, ບັງ​ກ​ລາ​ເດດ, ຍີ່​ປຸ່ນ, ເຕີກ​ເມນິດ​ສະ​ຖານ ແລະ ຟີລິບ​ປິນ ສົ່ງ​ນັກ​ກີ​ລາ​ເຂົ້າ​ຮ່ວມປະ​ເທດ​ລະ 1 ຄົນ. ສ່ວນ ຕິ​ມໍ ເລ​ສ​ເຕ ​ແລະ ອິນ​ເດຍ ສົ່ງ​ນັກ​ກີ​ລາເຂົ້າ​ຮ່ວມປະ​ເທດ​ລະ 2 ຄົນ. ຜ່ານ​ການ​ແຂ່ງ​ຂັນ ທ້າວ ເປ້ຍ ເຫຼົາ​ພັກ​ດີ ສາ​ມາດ​ສ້າງ​ຜົນ​ງານ​ໃຫ້​ແກ່​ປະ​ເທດ​ຊາດ ເປັນ​ຄັ້ງ​ຫວັດ​ສາດ ໄດ້​ສໍາເລັດ ຫຼັງ​ຍົກ​ນໍ້າໜັກ ​ຈາກ 3 ຄັ້ງ ຍົກ​ໄດ້​ຄະ​ແນນ​ລວມ 133 ຄະ​ແນນ ເປັນ​ອັນ​ດັບ​ທີ 1 ຄວ້າ​ຫຼຽນ​ຄໍາ ໃຫ້​ທັບ​ນັກ​ກີ​ລາ​ຄົນ​ພິ​ການ​ລາວ ສ່ວນ​ອັນ​ດັບ​ທີ 2 ຫຼຽນ​ເງິນ ແລະ ທີ 3 ຫຼຽນ​ທອງ ຕົກ​ເປັນ​ຂ​ອງ​ນັກກີ​ລາ​ປະ​ເທດ​ອິນ​ເດຍ.

ທີ່ມາຂ່າວ ມ່ວນ

Facebook Comments

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Check Also

ນັກແລ່ນກວ່າ 1,000 ຄົນກຽມຮ່ວມງານແລ່ນ RUN FOR HER 2019 ທ້າຍເດືອນຕຸລານີ້

ຜູ້ຈັດງານແລ່ນຊູເປີມິນິມາຣາທອນ RUN FOR HER 2019 ເປີດເຜີຍ ຕອນນີ້ມີນັກແລ່ນສະໝັກເຂົ້າຮ່ວມແລ່ນແ…