Home ຂ່າວກິລາ “ເພັດມະນີ” ນັກກີລາລາວ ຄວ້າຮອງແຊ້ມ ດອກປີກໄກ່ ຢຸນນານ ໂຢເນັກ ໂອເພັນ ແຊມປຽນຊິບ

“ເພັດມະນີ” ນັກກີລາລາວ ຄວ້າຮອງແຊ້ມ ດອກປີກໄກ່ ຢຸນນານ ໂຢເນັກ ໂອເພັນ ແຊມປຽນຊິບ

40 second read
0
0
39

ນາງ ເພັດມະນີ ແກ້ວເພຍຈັນ ຫຼື “ແອນນາ” ສາວນັກກີລາດອກປີກໄກ່ ຈາກສະໂມສອນເສດຖາ ຕົວແທນຈາກ ສປປ ລາວ ສ້າງຜົນງານໄດ້ຢ່າງໂດດເດັ່ນ ເຖິງຈະເສຍໃຫ້ ນັກກີລາຈາກປະເທດອິນໂດເນເຊຍ 0-2 ເຊັດ ໃນຮອບຊີງຊະນະເລີດ ກໍຕາມ ແຕ່ກໍເປັນຜົນງານຄັ້ງທຳອິດໃນເວທີສາກົນ ໂດຍຄວ້າ 1 ຫຼຽນເງິນ ຫຼື ຮອງແຊ້ມ ພ້ອມເງິນລາງວັນ 900 ໂດລາສະຫະລັດ, ສ້າງກຽດ ແລະ ຊື່ສຽງໃຫ້ແກ່ປະເທດຊາດ ໃນການແຂ່ງຂັນ ດອກປີກໄກ່ ຢຸນນານ ໂຢເນັກ ແບັດມິນຕັນ ໂອເພັນ ແຊມປ້ຽນຊິບ 2019 (Yunnan “YONEX” Badminton Open Championships) ຄຸນໝິງ ສປ ຈີນ.

ການແຂ່ງຂັນຄັ້ງນີ້ ໄດ້ມີຂຶ້ນເມື່ອລະຫວ່າງວັນທີ 24-27 ສິງຫາ ຜ່ານມາ ທີ່ຄຸນໝິງ ສປ ຈີນ ຮັບກຽດເປັນເຈົ້າພາບ. ໃນນີ້, ສະເພາະທັບນັກກີລາດອກປີກໄກ່ສະໂມສອນເສດຖາ ຕາງໜ້າສປປ ລາວ ສົ່ງເຂົ້າຮ່ວມແຂ່ງຂັນ 8 ຄົນ ນຳໂດຍ ວຽງສະຫວັນ ແສງຈັນ ປະທານສະໂມສອນ ດອກປີກໄກ່ເສດຖາ, ຄູຝຶກ 2 ຄົນ, ນັກກີລາຮຸ່ນອາວຸໂສ 2 ຄົນ, ນັກກີລາທົ່ວໄປຊາຍ 2 ຄົນ ແລະ ນັກກີລາຮຸ່ນທົ່ວໄປຍິງ 1 ຄົນ. ການແຂ່ງຂັນລາຍການດັ່ງກ່າວ ມີນັກກີລາຈາກ 9 ປະເທດ ເຂົ້າຮ່ວມຊີງໄຊ ຄື: ເຈົ້າພາບ ສປ ຈີນ, ໄທ, ສິງກະໂປ, ອິນໂດເນເຊຍ, ມຽນມາ, ມາເລເຊຍ, ສິງກະໂປ, ສະໂມສອນເສດຖາ ຈາກສປປ ລາວ, ຮົງກົງ ແລະ ອົດສະຕຣາລີ.

ທັງນີ້, ສະເພາະລາຍການດ່ຽວຍິງ ທີ່ ເພັດມະນີ ແກ້ວເພຍຈັນ ເຂົ້າຮ່ວມແຂ່ງຂັນມີນັກກີລາເຂົ້າຮ່ວມຊີງໄຊເຖິງ 10 ກວ່າຄົນ, ໃນນັ້ນໄດ້ມີການຈັບສະຫຼາກປະກົບຄູ່ແຂ່ງຂັນ ເສຍຕົກຮອບເລີຍ ແລະ ນາງ ເພັດມະນີ ແກ້ວເພຍຈັນ ກໍສາມາດສ້າງຜົນງານໄດ້ຢ່າງໂດດເດັ່ນ ໄລ່ເອົາຊະນະນັກກີລາເຈົ້າພາບ ສປ ຈີນ ໄດ້ເຖິງ 2 ຄົນ ກ່ອນຈະຮັກສາຟອມເກັ່ງຊະນະນັກກີລາຈາກໄທ ທະລຸເຂົ້າເຖິງຮອບຊີງຊະນະເລີດ ແຕ່ໜ້າເສຍດາຍໄປພາດທ່າເສຍໃຫ້ ນັກກີລາຈາກອິນໂດເນເຊຍ ໄດ້ພຽງຫຼຽນເງິນມາຄ້ອງຄໍ ພ້ອມເງິນລາງວັນ 900 ໂດລາສະຫະລັດ ສ່ວນອິນໂດເນເຊຍ ໄດ້ຫຼຽນຄຳ ພ້ອມເງິນລາງວັນ 1,800 ໂດລາສະຫະລັດ, ອັນດັບ 3 ນັກກີລາຈາກໄທ ໄດ້ຮັບຫຼຽນທອງ ພ້ອມເງິນລາງວັນ 300 ໂດລາສະຫະລັດ ແລະ ອັນດັບ 4 ນັກກີລາເຈົ້າພາບ ສປ ຈີນ ໄດ້ຮັບລາງວັນຊົມເຊີຍເງິນສົດ 200 ໂດລາສະຫະລັດ.

ທ່ານ ວຽງສະຫວັນ ແສງຈັນ ໃຫ້ສຳພາດວ່າ: ບໍ່ຄິດວ່າບໍ່ຝັນວ່ານັກກີລາສະໂມສອນຂອງພວກເຮົາ ຈະສາມາດແຈ້ງເກີດໃນການເຂົ້າຮ່ວມແຂ່ງຂັນລາຍການດັ່ງກ່າວ ຊຶ່ງມີນັກກີລາຕົວດີໆ ແລະ ສີມືດີຈາກ 9 ປະເທດເຂົ້າຮ່ວມ. ຕໍ່ຜົນງານດັ່ງກ່າວ ຖືເປັນຄວາມພາກພູມໃຈຂອງທາງສະໂມສອນພວກເຮົາ ທີ່ສາມາດສ້າງກຽດ ແລະ ຊື່ສຽງມາສູ່ປະເທດຊາດ. ເຖິງຢ່າງໃດກໍດີ, ພວກເຮົາພ້ອມແລ້ວຈະສືບຕໍ່ສົ່ງເສີມການພັດທະນານັກກີລາພາຍໃນສະໂມສອນຢ່າງຕໍ່ເນື່ອງ ໂດຍຈະສົ່ງເຂົ້າຮ່ວມແຂ່ງຂັນລາຍການທັງພາຍໃນ ແລະ ຕ່າງປະເທດ ໂດຍສະເພາະໃນລະຫວ່າງວັນທີ 15-17 ພະຈິກ 2019 ຈະເຂົ້າຮ່ວມການແຂ່ງຂັນດອກປີກໄກ່ ອິນເຕີເນຊັນແນວ ແຊ໋ມປ້ຽນຊິບ 2019 ທີ່ແຂວງຊຽງ ໃໝ່ ປະເທດໄທ ເປັນເຈົ້າພາບ.

ຂໍຂອບໃຈ/ທີ່ມາຂ່າວ 

Facebook Comments

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Check Also

ຕັດສິນຄະດີສໍ້ລາດບັງຫຼວງ ພະນັກງານ ກະຊວງ ປທສ

ອີງຕາມໃບແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີສະບັບເລກທີ 1671/ຫສນຍ, ລົງວັນທີ 23 ກັນຍາ…