Home ຂ່າວກິລາ ນັກກີລາເກືອບ 300 ຄົນ ກຽມເຂົ້າຮ່ວມເຕະບານເຍົາວະຊົນ ຊີງຂັນປະທານສະຫະພັນບານເຕະ ນວ 2019

ນັກກີລາເກືອບ 300 ຄົນ ກຽມເຂົ້າຮ່ວມເຕະບານເຍົາວະຊົນ ຊີງຂັນປະທານສະຫະພັນບານເຕະ ນວ 2019

44 second read
0
0
31

ມີນັກກີລາເກືອບ 300 ຄົນ ກຽມເຂົ້າຮ່ວມເຕະບານເຍົາວະຊົນ ຊີງຂັນປະທານສະຫະພັນບານເຕະ ນວ 2019 ຄະນະ​ນຳ, ຄູ​ຝຶກ ​ແລະ ນັກ​ກີລາ ຮຸ່ນອາຍຸບໍ່ເກີນ 11 ປີ, 13 ປີ ແລະ 16 ປີ ​ຈາກ 10 ສະໂມສອນ ອ້ອມ​ຂ້າງ​ນະຄອນຫຼວງ​ວຽງ​ຈັນ ​ເກືອບ 300 ຄົນ ພ້ອມ​ຈະ​ເຂົ້າ​ຮ່ວມຊີງ​ຄວາມ​ເປັນ​ໜຶ່ງ ​ໃນ​ການ​ແຂ່ງຂັນກີລາເຕະບານຮຸ່ນເຍົາວະຊົນ ຊີງຂັນປະທານສະຫະພັນບານເຕະ ນະຄອນຫຼວງວຽງຈັນ (ນວ) ປະຈຳປີ 2019 ເພື່ອເປັນການສ້າງຂະບວນການຕ້ອນຮັບເປີດສົກຮຽນໃໝ່ 2019-2020 ແລະ ຄັດເລືອກນັກກີລາຮຸ່ນສືບທອດດີເດັ່ນກຽມຕາງໜ້ານະຄອນຫຼວງວຽງຈັນ ເຂົ້າຮ່ວມແຂ່ງຂັນລາຍການ​ຕ່າງໆທັງພາຍໃນ ແລະ ຕ່າງປະ​ເທດ ທີ່ຈະຈັດຂຶ້ນໃນຕໍ່ໜ້ານີ້.

ກອງ​ປະຊຸມ​ເຜີຍ​ແຜ່​ກົດ​ລະບຽບ​ການ​ແຂ່ງຂັນ, ຈັບ​ສະຫຼາກ ​ແລະ ຖະ​ແຫຼ​ງຂ່າວ​ການ​ກຽມພ້ອມ​ຈັດການ​ແຂ່ງຂັນ​ກີລາ​ເຕະບານ​ເຍົາວະ​ຊົນ 3 ຮຸ່ນ​ ຊີງ​ຂັນ​ທ່ານ​ປະທານ​ສະຫະພັນ​ບານ​ເຕະ ນະຄອນຫຼວງ​ວຽງ​ຈັນ ປະຈຳ​ປີ 2019 ​ໄດ້​ມີ​ຂຶ້ນ​ເມື່ອ​ວັນ​ທີ 28 ສິງຫາ ຜ່ານ​ມາ ທີ່​ຫ້ອງປະຊຸມຄະນະກຳມະການໂອ​ແລມປິກ​ແຫ່ງ​ຊາດ​ລາວ, ​ໂດຍ​ໃຫ້​ກຽດ​ເຂົ້າ​ຮ່ວມ​ຂອງ​ ທ່ານ ວຽງ​ສະຫວັນ ​ແສງ​ຈັນ ປະທານ​ສະຫະພັນ​ບານ​ເຕະ ນະຄອນຫຼວງ​ວຽງ​ຈັນ ​ພ້ອມ​ດ້ວຍ​ຄະນະ​ຮັບຜິດຊອບ​ຈັດການ​ແຂ່ງຂັນ, ຄະນະ​ນຳ​, ຄູ​ຝຶກ ​ແລະ ນັກ​ກີລາ​ຈາກ 10 ພາກສ່ວນ ຕະຫຼອດ​ຮອດ​ບັນດາ​ສື່​ມວນ​ຊົນ.

​ໂອກາດ​ນີ້, ທ່ານ ວຽງ​ສະຫວັນ ​ແສງ​ຈັນ ກ່າວ​ວ່າ: ລາຍການ​ນີ້ ຈັດ​ຂຶ້ນ​ ກໍ​​ເພື່ອ​ເປັນ​ການ​ສ້າງ​ຂະ​ບວນຕ້ອນຮັບເປີດສົກຮຽນໃໝ່ 2019-2020 ພ້ອມ​ທັງ​ເປັນ​ການຄັດເລືອກນັກກີລາຮຸ່ນສືບທອດຜູ້​ມີ​ພອນ​ສະຫວັນດີເດັ່ນກຽມຕາງໜ້ານະຄອນຫຼວງວຽງຈັນ ສົ່ງເຂົ້າຮ່ວມແຂ່ງຂັນລາຍການ​ຕ່າງໆທັງພາຍໃນ ແລະ ຕ່າງປະ​ເທດ ທີ່ຈະຈັດຂຶ້ນໃນຕໍ່ໜ້ານີ້ ສະ​ນັ້ນ, ​ເພື່ອ​​ເຮັດ​ຂະ​ບວນການ​ແຂ່ງຂັນ​ລາຍການ​ນີ້ ມີ​ຄວາມ​ສົມບູນ​ແບບ ຮຽກຮ້ອງ​ມາ​ຍັງ​ຄະນະ​ຮັບຜິດຊອບ​ຈັດການ​ແຂ່ງຂັນ, ຄະນະ​ນຳ, ຄູ​ຝຶກ ​ແລະ ນັກ​ກີລາ ຈົ່ງ​ພ້ອມ​ກັນ​ປະກອບສ່ວນ​ຢ່າງ​ຕັ້ງໜ້າ​ເຂົ້າ​ຮ່ວມ​ແຂ່ງຂັນ​ຢ່າງ​ສຸດ​ກົກ​ສຸດ​ປາຍ​ຮູ້​ແພ້​ຮູ້​ຊະນະ ​ແລະ ຮູ້​ໃຫ້​ອະ​ໄພ​ເຊິ່ງກັນ​​ແລະກັນ ສາມາດ​ເລືອກ​ໄດ້​ນັກ​ກີລາ​ທີ່​ນອນ​ໃນ​ເປົ້າ​ໝາຍ ກຽມ​ຕາງໜ້າ​ນະຄອນຫຼວງ​ວຽງ​ຈັນ ​ເຂົ້າ​ຮ່ວມ​ແຂ່ງຂັນ​ເຕະບານ​ເຍົາວະ​ຊົນ​ລະດັບ​ນານາຊາດ ​ໂດຍ​ສະ​ເພາະ​ແມ່ນ​ລາຍການ ທີ່​ທ່ານ ກຽດຕິ​ສັກ ເສນາເມືອງ (ຊິໂກ) ອະດີດ​ນັກ​ກີລາ​ເຕະບານ​ທີ​ມຊາດ​ໄທ ຈະ​ຈັດ​ຂຶ້ນ​ໃນ​ເດືອນ​ພະຈິກ​ນີ້ ​ແລະ ​ເຂົ້າ​ຮ່ວມ​ລາຍການຊີງ​ແຊ໋ມ​ເຍົາວະ​ຊົນ​ນານາຊາດ ທີ່​ປະ​ເທດ​ຍີ່ປຸ່ນ ​ໃນ​ປີ 2020. ນອກຈາກ​ນັ້ນ, ຍັງ​ຈະ​ສ້າງ​ໃຫ້​ເປັນ​ພື້ນຖານຕາງໜ້າ​ນັກ​ກີລາ​ນັກຮຽນ ນະຄອນຫຼວງ ​ສົ່ງ​ເຂົ້າ​ຮ່ວມ​ແຂ່ງຂັນ​ງານ​ມະຫາ​ກຳ​ກີລາ​ນັກຮຽນ ທົ່ວ​ປະ​ເທດ ຈະ​ຈັດ​ຂຶ້ນ​ທີ່​ແຂວງ​ສາລະ​ວັນ ຮັບ​ກຽດ​ເປັນ​ເຈົ້າພາບ ​ໃນ​ປີ 2021 ນີ້​ອີກ​ດ້ວຍ.

​ໃນ​ພິທີ​ດັ່ງກ່າວ ກໍ​ຍັງ​ໄດ້​ມີ​ພິທີ​ຈັບ​ສະຫຼາ​ກ​ແບ່ງ​ສາຍ​ນັກ​ກີລາ​ຈາກ 10 ສະ​ໂມ​ສອນ ຂອງ 3 ຮຸ່ນ​ດັ່ງກ່າວ ​ຊຶ່ງແຕ່ລະ​ຮຸ່ນ​ມີ 6 ທີ​ມ​ເຂົ້າຮ່ວມ ​ແລະ ​ແຕ່​ລະ​ຮຸ່ນ​ແບ່ງອອກ​ເປັນ 2 ກຸ່ມ ​ກໍຄື ກຸ່ມ ​A ​ແລະ ກຸ່ມ B ແຕ່​ລະ​ກຸ່ມ​ແຂ່ງຂັນ​ພົບ​ກັນ​ໝົດ​ຄັດ​ເອົາ​ທີ 1-2 ຜ່ານ​ເຂົ້າ​ໄປ​ຫຼິ້ນ​ໃນ​ຮອບ​ຕໍ່​ໄປ ​ໂດຍກຳນົດ​​ໃຫ້​ແຕ່​ລະ​ພາກສ່ວນສົ່ງ​ນັກ​ກີລາ​ເຂົ້າ​ຮ່ວມ 25 ຄົນ, ​ໃນ​ນັ້ນ ຄະນະ​ນຳ ​ແລະ ຄູ​ຝຶກ 5 ຄົນ ​ແລ​ະ ນັກ​ກີລາ 20 ຄົນ ສຳລັບ​ຮຸ່ນ​ອາຍຸ 11 ປີ ກຸ່ມ ​A ມີ ລ໋ອບ ສະ​ເຕດ້ຽມ, ວຽງ​ຈັນ ອາຄາ​ເດ​ມີ ​ເອັບ​ທີ ​ແລະ ​ໄກ່ປ່າ; ກຸ່ມ B ມີ ຕາວັນ ຊີ​ຊີ-55, ປະສານ​ໃຈ ​ແລະ ນະຄອນຫຼວງວຽງ​ຈັນ. ສ່ວນຮຸ່ນ​ອາຍຸ 13 ປີ ກຸ່ມ ​A ມີ ດີ​ເຄ, ວຽງ​ຈັນ ອາຄາ​ເດ​ມີ ເອັບທີ, ຕະວັນ ຊີ​ຊີ-55; ກຸ່ມ​ B ມີ ຈິງ​ໃຈ, ນະຄອນຫຼວງ​ວຽງ​ຈັນ, ທຣາມຟໍ​ເມ​ຊັນ; ຮຸ່ນ​ອາຍຸ 16 ປີ ກຸ່ມ ​A ທະ​ເວັນ​ຕີ​ຊິກ, ຈິງ​ໃຈ, ນະຄອນຫຼວງວຽງຈັນ; ​ກຸ່ມ B ປະສານ​ໃຈ, ດີ​ເຄ ​ແລະ ຈິງ​ໃຈ.

ລາຍການນີ້ ຄາດ​ວ່າ ຈະດຳ​ເນີນ​ເປັນ​ເວລາ 3 ອາທິດ​ ໃຫ້​ສຳ​ເລັດ ​ແລະ ​ໃນ​ວັນ​ເສົາ​ທີ 7 ກັນຍາ 2019 ຈະ​ເປີດ​ສາກ​ຂຶ້ນ​ຢ່າງ​ເປັນ​ທາງ​ການ ທີ່ສະໜາມກີລາເຈົ້າອານຸວົງ ​ໂດຍໄດ້ຮັບການສະໜັບສະໜູນ​ຫຼັກ​ຈາກ ບໍລິສັດ ເອັບບີທີ ປະເທດ​ໄທ, ສູນຈຳໜ່າຍເຄື່ອງກີລາຄົບວົງຈອນ​ ສະເຕດ້ຽມສະປອດ, ບໍລິສັດ ເອັດພີ ທີ່ປືກສາ-ກວດສອບບັນຊີ ແລະ ທີ່ປືກສາການລົງທຶນ ຈຳກັດ​ ແລະ ວິສາຫະກິດສ່ວນບຸກຄົນ ຮ້ານ ເອັດທີທີ ບໍລິຫານເຄື່ອງໃຫ້ເຊົ່າ ທີ​ມຊະນະ​ເລີດ​ແຕ່ລະ​ຮຸ່ນ ຈະ​ໄດ້​ຮັບ​ຂັນ​ແຊ໋ມ 1 ໜ່ວຍ​ແລະ ຫຼຽນ​ຄຳ, ທີ 2 ຈະ​ໄດ້​ຮັບ​ຫຼຽນ​ເງິນ ​ແລະ ທີ 3 ຈະ​ໄດ້​ຮັບ​ຫຼຽນ​ທອງ. ນອກຈາກ​ນັ້ນ, ກໍ​ຍັງ​ມີ​ລາງວັນ​ທີ​ມດີ​ເດັ່ນ ​ແລະ ລາງວັນ​ນັກ​ເຕະ​ຜູ້ຍິງ​ປະຕູ​ສູງ​ສຸດ​ຂອງ​ແຕ່​ລະ​ຮຸ່ນ​ອີກ​ດ້ວຍ.

ຂ່າວ: ສົງການ

ຂໍຂອບໃຈ/ທີ່ມາຂ່າວ

Facebook Comments

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Check Also

ອີຢູ ແລະ ຢູນິເຊັບ ມອບລົດຈັກ-ເຄື່ອງຄອມພິວເຕີ ໃຫ້ແກ່ກະຊວງສຶກສາທິການ ແລະ ກີລາ

ໃນວັນທີ 3 ຕຸລາ 2019 ທີ່ນະຄອນຫລວງວຽງຈັນ, ສະຫະພາບຢຸໂຣບ (EU) ແລະ ອົງການສະຫະປະຊາຊາດສໍາລັບເດັກ …