Home ຂ່າວເດັ່ນ ນາງໝວຍສາລະພາບ ພົວພັນກັບກຸ່ມຄົນລາວນອກ

ນາງໝວຍສາລະພາບ ພົວພັນກັບກຸ່ມຄົນລາວນອກ

36 second read
0
4
27,080

ອີງຕາມການລາຍງານຂອງໜັງສືພິມວຽງຈັນທາຍໃຫ້ຮູ້ວ່າ: ທ່ານ ພັນໂທ ໄພຈິດ ໄຊຍະເດດ ຮອງຫ້ອງຕຳຫຼວດ ປກສ ແຂວງຈຳປາສັກ ໃຫ້ສຳພາດກັບນັກຂ່າວ ໜັງສືພິມວຽງຈັນທາຍ ໃນຕອນບ່າຍຂອງມື້ນີ້ 17 ກັນຍານີ້ ວ່າພາຍຫຼັງທີ່ເຈົ້າໜ້າໄດ້ມີການສືບສວນ-ສອບສວນ ນາງ ຮວາຍເຮືອງ ໄຊຍະບູລີ (ໝວຍ), ອາຍຸ 30 ປີ ອາຊີບຄ້າຂາຍ ຢູ່ ບ້ານສະເຫຼົ້າ ເມືອງໂພນທອງ ແຂວງຈຳປາສັກ ເຊິ່ງຜູ້ກ່ຽວໄດ້ຖືກກັກຕົວ ໃນວັນທີ 12 ກັນຍາ ທີ່ຜ່ານມານັ້ນ, ນາງໝວຍ ໄດ້ຮັບສາລະພາບຕໍ່ການກະທຳທີ່ຜິດກົດໝາຍ ແລະ ຍັງໄດ້ຂໍ້ມູນທີ່ສຳຄັນຈາກຜູ້ກ່ຽວທີ່ມີການພົວພັນກັບບັນດາກຸ່ມຄົນບໍ່ດີທີ່ຢູ່ທັງພາຍໃນ ແລະ ຕ່າງປະເທດ.
ທ່ານ ພັນໂທ ໄພຈິດ ອະທິບາຍວ່າ: ໃນເດືອນມີຖຸນາ ປີ 2018 ນາງ ໝວຍ ໄດ້ມີການຖ່າຍທອດສົດຜ່ານ ເຟສບຸກ ຂອງຜູ້ກ່ຽວ ແລະ ໄດ້ເວົ້້າໃສ່ຮ້າຍປ້າຍສີຕໍ່ຕ້ານລັດຖະບານລາວ, ສະນັ້ນ ທາງເຈົ້າໜ້າທີ່ຂອງພວກເຮົາກໍ່ໄດ້ເຊີນຜູ້ກ່ຽວມາຊີ້ແຈງ ແລະ ກ່າວເຕືອນສຶກສາອົບຮົມ ບໍ່ໃຫ້ມີພຶດຕິກຳ ດັ່ງກ່າວອີກ. ຈາກນັ້ນ, ໃນອາທິດ ທີ່ຜ່ານມາ ນາງ ໝວຍ ກໍ່ໄດ້ມີການຖ່າຍທອດສົດຕື່ມອີກ ເຊິ່ງມີເນື້ອໃນລັກສະນະຕໍ່ຕ້ານລັດຖະບານ ສປປ.ລາວ, ດັ່ງນັ້ນເຈົ້າໜ້າທີ່ຈຶ່ງໄດ້ມີການ ກັກຕົວໃນວັນທີ 12 ກັນຍາ 2019 ທີ່ຜ່ານມາ. ປັດຈຸບັນ, ຜູ້ກ່ຽວໄດ້ຖືກກັກຂັງ ຢູ່ຄຸມຂັງແຂວງຈຳປາສັກ ແລະ ເຈົ້າໜ້າທີ່ກຳລັງດຳເນີນຄະດີຕາມລະບຽບກົດໝາຍຂອງ ສປປ.ລາວ ທຸກຂັ້້ນຕອນ.
ທ່ານ ພັນໂທ ໄພຈິດ ໄດ້ກ່າວຕື່ມວ່າ: ເຈົ້າໜ້າທີ່ພວກເຮົາໄດ້ດຳເນີນການສືບສວນ-ສອບສວນແລ້ວ ແລະ ກໍ່ໄດ້ດຳເນີນການຕາມລະບຽບກົດໝາຍທຸກຂັ້ນຕອນ. ທ່ານ ຍັງຢືນຢັນວ່າ ຜູ້ກ່ຽວ ຍັງຖືກຄຸມຂັງຢູ່ແຂວງຈຳປາສັກ ຍັງບໍ່ໄດ້ມີການເຄື່ອນຍ້າຍໄປທີ່ອື່ນ ດັ່ງທີ່ຂໍ້ມູນປະກົດໃຫ້ເຫັນຢູ່ບາງສື່ ໃນສັງຄົມອອນລາຍ, ເຊິ່ງສື່ເຫຼົ່ານັ້ນໄດ້ອອກໄປແບບບໍ່ມີມູນຄວາມຈິງ ອອກໄປແບບລົມໆແລ້ງ.
ທາງກອງບັນຊາການ ປກສ ແຂວງຈຳປາສັກ ຈະມີການຖະແຫຼງຂ່າວຄະດີ ນາງ ໝວຍ ຢ່າງເປັນທາງ ການໃນວັນທີ 18 ກັນຍານີ້ ເວລາ 13 ໂມງ ທີ່ຫ້ອງຕຳຫຼວດ ປກສ ແຂວງຈຳປາສັກ.
ອີງຕາມປະມວນກົດໝາຍອາຍາ ມາດຕາ 117 ການໂຄສະນາຕ້ານ ສປປ.ລາວ ໄດ້ລະບຸໄວ້ວ່າ: ບຸກຄົນໃດ ຫາກໄດ້ໂຄສະນາໃສ່ຮ້າຍປ້າຍສີ ສາທາລະນະລັດ ປະຊາທິປະໄຕ ປະຊາຊົນລາວ, ບິດເບືອນແນວ ທາງຂອງພັກ ແລະ ນະໂຍບາຍ ຂອງລັດ, ປ່າວຂ່າວອະກຸສົນ, ເຮັດໃຫ້ມີຄວາມວຸ້ນວາຍ ດ້ວຍການເວົ້າ, ການຂຽນ, ການພິມ, ໜັງສືພິມ, ຮູບເງົາ, ວີດີໂອ, ຮູບພາບ, ເອກະສານ, ສື່ທາງເອເລັກໂຕຣນິກ ຫຼື ດ້ວຍຮູບການອື່ນ ທີ່ມີເນື້ອໃນຕ້ານ ສາທາລະນະລັດ ປະຊາທິປະໄຕ ປະຊາຊົນລາວ ເພື່ອເຮັດໃຫ້ອຳ ນາດແຫ່ງລັດອ່ອນເພຍ ຈະຖືກລົງໂທດຕັດອິດສະຫລະພາບ ແຕ່ 1 ປີ ຫາ 5 ປີ ແລະ ຈະຖືກປັບໃໝ ແຕ່ 5,000,000 ກີບ ຫາ 20,000,000 ກີບ.

Facebook Comments

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Check Also

ປ່ຽນລັດຖະມົນຕີ ກະຊວງແຜນການແລະການລົງທຶນ

ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ໄດ້ຮັບການແຕ່ງຕັ້ງເປັນ ວ່າການລັດຖະມົນຕີກະຊວງແຜນການ ແ…