Home ຂ່າວຕ່າງປະເທດ ທຸບສະຖິຕິອີກຄັ້ງ! ຈີນສ້າງຂົວທາງ-ທາງລົດໄຟ ຂ້າມທະເລ 16 ກິໂລແມັດ

ທຸບສະຖິຕິອີກຄັ້ງ! ຈີນສ້າງຂົວທາງ-ທາງລົດໄຟ ຂ້າມທະເລ 16 ກິໂລແມັດ

47 second read
0
0
209

ການຂໍ້ສ້າງຂົວທາງ-ທາງລົດໄຟຂ້າມທະເລ ທີ່ມີຄວາມຍາວທີ່ສຸດໃນໂລກ ເຊິ່ງຕັ້ງຢູ່ໃນແຂວງຝູຈ້ຽນ ທາງພາກຕາເວັນອອກສ່ຽງໃຕ້ຂອງຈີນ ສຳເລັດໃນສ່ວນໂຄງສ້າງຫຼັກ ຫຼັງຈາກທີ່ຄານເຫຼັກອັນສຸດທ້າຍ ນໍ້າໜັກ 473​ ໂຕນ ຖືກຍົກເຂົ້າຕຳແໜ່ງທີ່ກຳນົດໃນວັນພຸດ (25 ກັນຍາ) ທີ່ຜ່ານມາ.

ກຳມະກອນກໍ່ສ້າງຫຼາຍຮ້ອຍຊີວິດ ແລະ ເຈົ້າໜ້າທີ່ລັດຖະບານຈີນ ຮ່ວມພິທີສະຫຼອງຄວາມຄືບໜ້າຂອງການກໍ່ສ້າງຂົວທາງ-ທາງລົດໄຟຜິງຖານ (Pingtan Strait Road-Rail Brigde) ເຊິ່ງມີໄລຍະຂອງຂົວຍາວ 16.34 ກິໂລແມັດ ເຊື່ອມຕໍ່ເກາະຜິງຖານ ແລະ ໝູ່ເກາະໃກ້ຄຽງ 4​ ແຫ່ງ ເຂົ້າກັບແຜ່ນດິນໃຫຍ່ທີ່ຝູຈ້ຽນ.

ຂົວດັ່ງກ່າວມີກຳນົດເປີດໃຫ້ບໍລິການພາຍໃນປີ 2020, ສາມາດຫຼຸດຜ່ອນໄລຍະເວລາໃນການເດີນທາງລະຫວ່າງນະຄອນຝູໂຈ່ ເມືອງເອກຂອງຝູຈ້ຽນ ແລະ ເກາະຜິງຖານ ທີ່ເປັນເຂດຕົ້ນແບບທາງການຄ້າ ແລະ ການແລກປ່ຽນທາງວັດທະນະທຳ ຂ້າມຊ່ອງແຄບໄຕ້ຫວັນ ຈາກ 2 ຊົ່ວໂມງເຫຼືອພຽງ 30 ນາທີເທົ່ານັ້ນ.

“ການກໍ່ສ້າງຂົວແຫ່ງນີ້ມີຄວາມທ້າທາຍຫຼາຍທີ່ສຸດໃນໂລກ” ຫວັງຕົງຮຸ້ຍ ຫົວໜ້າວິສະວະກອນປະຈຳໂຄງການຂົວທາງ-ທາງລົດໄຟຊ່ອງແຄບຜິງຖານ ເຊິ່ງເປັນຂົວທາງ-ທາງລົດໄຟຂ້າມທະເລແຫ່ງທຳອິດຂອງຈີນ ທີ່ດຶງດູດຄວາມສົນໃຈຈາກທົ່ວໂລກ ນັບຕັ້ງແຕ່ເລີ່ມກໍ່ສ້າງໃນປີ 2013 ກ່າວ.

ຂົງເຂດອັນເປັນທີ່ຕັ້ງຂອງຂົວແຫ່ງນີ້ມີລົມພັດແຮງ ແລະ ຄື້ນສູງເກືອບຕະຫຼອດປີ ແລະ ເປັນທີ່ຮູ້ຈັກກັນດີວ່າ ເປັນໜຶ່ງໃນທະເລທີ່ອັນຕະລາຍຫຼາຍທີ່ສຸດໃນໂລກ ຄືກັບສາມຫຼ່ຽມເບີມິວດາ ແລະ ແຫຼມກູດໂຮບ. ກຳມະກອນທຸກຄົນຕ້ອງຕໍ່ສູ້ກັບກະແສລົມ, ຄື້ນນໍ້າ ແລະ ກົ້ນທະເລທີ່ຫຼຸບໂນນ ເພື່ອວາງເສົາຕໍມໍ 1,895 ໂຕນ.

ຂົວທາງ-ທາງລົດໄຟຊ່ອງແຄບຜິງຖານ ມີຫົນທາງຂະໜາດ 6 ເລນຈະລາຈອນຢູ່ຊັ້ນເທິງ ແລະ ລາງລົດໄຟຄວາມໄວສູງ 2 ລາງຢູ່ຊັ້ນລຸ່ມ ເຊິ່ງຖືກອອກແແບມາໃຫ້ຮອງຮັບຂະບວນລົດໄຟຫົວລູກປືນຄວາມໄວ 200 ກິໂລແມັດຕໍ່ຊົ່ວໂມງ ແລະ ເປັນສ່ວນໜຶ່ງຂອງທາງລົດໄຟສາຍຝູໂຈ່-ຜິງຖານ ຄວາມຍາວ 88 ກິໂລແມັດ.

ໃນອະດີດ ຜິງຖານເປັນພຽງເກາະທຳມະດາຂອງຊາວປະມົງ, ບໍ່ມີຂົວເຊື່ອມຕໍ່ກັບແຜ່ນດິນໃຫຍ່. ຈົນມາຮອດປີ 2010 ຈີນໄດ້ຈັດຕັ້ງເຂດຕົ້ນແບບຜິງຖານ (Pingtan Comprehensive Pilot Zone) ຈຶ່ງນຳໄປສູ່ການພັດທະນາໂຄງລ່າງພື້ນຖານຂອງເກາະ ໂດຍມີຂົວຂ້າມຊ່ອງແຄບທີ່ໃຫ້ລົດໂດຍສານແລ່ນໄດ້ຢ່າງດຽວ.

ເສິນ ຊາຍໄວ 29 ປີ ຜູ້ຍົກຍ້າຍຈາກໄຕ້ຫວັນມາຜິງຖານ ເມື່ອປະມານ 2 ປີກ່ອນ ເຊື່ອວ່າຂົວແຫ່ງໃໝ່ນີ້ເປັນຫຼາຍກວ່າໂຄງການກໍ່ສ້າງຂະໜາດໃຫຍ່ ເຊິ່ງຈະຊ່ວຍດຶງດູດທຸລະກິດຕ່າງໆ, ກະຕຸ້ນການພັດທະນາເສດຖະກິດ ແລະ ສ້າງສັນອະນາຄົດອັນສົດໃສໃຫ້ແກ່ປະຊາຊົນຈາກໄຕ້ຫວັນ ທີ່ເລືອກມາໃຊ້ຊີວິດ ແລະ ເຮັດວຽກຢູ່ທີ່ນີ້.

ປັດຈຸບັນ ເກາະຜິງຖານກາຍເປັນທີ່ຕັ້ງຂອງຕຶກສູງສຽດຟ້າ, ໂຄງການກໍສ້າງທີ່ເຮັດວຽກໝົດເວັນໝົດຄືນ, ຮ້ານຄ້າ ແລະ ບໍລິສັດຫຼາຍກວ່າ 1,000 ແຫ່ງ ເຊິ່ງລ້ວນແຕ່ຕັ້ງຢູ່ແຕມເຂດແຄມຝັ່ງທະເລ. ອີກທັງເປັນເຮືອນຫຼັງໃໝ່ຂອງຊາວໄຕ້ຫວັນຫຼາຍພັນຄົນ ທີ່ຂ້າມນໍ້າຂ້າມທະເລມາຕັ້ງຖິ່ນຖານ ແລະ ທຳມາຫາກິນຢູ່ທີ່ນີ້.

ການກໍ່ສ້າງຂົວທາງ-ທາງລົດໄຟຊ່ອງແຄບຜິງຖານ ໄດ້ໃຊ້ເຫຼັກຫຼາຍກວ່າ 1.24 ລ້ານໂຕນ ເຊິ່ງທຽບເທົ່າກັບການກໍ່ສ້າງຫໍໄອເຟລ 190 ຫຼັງ ແລະ ຊີມັງ 2.9 ລ້ານແມັດກ້ອນ ເຊິ່ງຫຼາຍກວ່າຊີມັງທີ່ໃຊ້ກໍ່ສ້າງອາຄານສູງທີ່ສຸດໃນໂລກຄື ເບີດຈ໌ ຄາລິຟາ (Burj Khalifa) ເຖິງ 9 ເທົ່າ.

“ຖ້າແມ່ນ 15 ປີກ່ອນ ເຮົາອາດຈະຈິນຕະນາການບໍ່ອອກວ່າ ຈະກໍ່ສ້າງຂົວແບບນີ້ໄດ້ແນວໃດ ເພາະຂາດແຄນເຕັກໂນໂລຊີ ແລະ ເຄື່ອງມືທີ່ທັນສະໄໝ ເຊັ່ນ ເຄື່ອງຈັດຂຸດເຈາະ ແລະ ເຮືອເຄຣນ ທີ່ເຮົາມີໃຊ້ຄືທຸກມື້ນີ້” ສ້ຽວສືໂປ່ ວິສະວະກອນຈາກບໍລິສັດ ໄຊນາ ເຣລເວ ເມເຈີ ບຣິດ ເອັນຈິເນຍຣິງ ກຣຸ໊ບ (MBEC) ກ່າວ.

ບັນດາຜູ້ຮັບເໝົາກໍ່ສ້າງຂອງຈີນນັ້ນ ພາກັນທຳລາຍສະຖິຕິຕ່າງໆ ຂອງໂລກຈົນກາຍເປັນເຈົ້າຂອງຂົວທີ່ມີຄວາມສູງທີ່ສຸດໃນໂລກ, ຂົວຂ້າມທະເລທີ່ມີຄວາມຍາວທີ່ສຸດໃນໂລກ ແລະ ຂົວທີ່ມີຄວາມສູງຫຼາຍທີ່ສຸດໃນໂລກທີ່ກໍ່ສ້າງໃນສັດຕະວັດນີ້ ຈຳນວນ 90 ແຫ່ງ ຈາກທັງໝົດ 100 ແຫ່ງ.

ທັງນີ້, ມີການຄາດຄະເນວ່າ ມູນຄ່າການລົງທຶນດ້ານການຄົມມະນາຄົມຂົນສົ່ງຂອງຈີນ ນັບແຕ່ປີ 2015-2020 ຈະພຸ່ງສູງເກີນ 15 ລ້ານລ້ານຢວນ ໂດຍໂຄງການກໍ່ສ້າງຂົວຈະກວມເອົາສັດສ່ວນການລົງທຶນສ່ວນໃຫຍ່.

ຂໍຂອບໃຈ/ທີ່ມາຂ່າວ

Facebook Comments

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Check Also

ສິງກະໂປ ຊຸກຍູ້ ການພັດທະນາ “ເຄືອຂ່າຍເມືອງອັດສະລິຍະ” ໃນອາຊຽນ

ສິງກະໂປ ພ້ອມຊຸກຍູ້ໂຄງການເຄືອຂ່າຍເມືອງອັດສະລິຍະອາຊຽນ ຫວັງຮອງຮັບກະແສປະຊາກອນໄຫຼເຂົ້າມາເຮັດວຽກ…