Home ຂ່າວພາຍໃນ ບັນຫາລະເບີດບໍ່ທັນແຕກ ຍັງເປັນສິ່ງທ້າທາຍໃນການພັດທະນາເສດຖະກິດຂອງ ສປປ ລາວ

ບັນຫາລະເບີດບໍ່ທັນແຕກ ຍັງເປັນສິ່ງທ້າທາຍໃນການພັດທະນາເສດຖະກິດຂອງ ສປປ ລາວ

38 second read
0
0
26

ເມື່ອລະຫວ່າງທ້າຍເດືອນກັນຍາຜ່ານມາທີ່ນະຄອນຫຼວງວຽງຈັນ ຄະນະກຳມະການຄຸ້ມຄອງແຫ່ງຊາດເພື່ອການແກ້ໄຂບັນຫາລະ ເບີດບໍ່ທັນແຕກທີ່ຕົກຄ້າງຢູ່ ສປປ ລາວ (ຄຊກລ) ຮ່ວມກັບຫົວໜ້າອົງການສະຫະປະຊາຊາດເພື່ອການພັດທະນາປະຈຳ ສປປ ລາວ ແລະ ເອກອັກຄະລັດຖະທູດແຫ່ງສະຫະລັດອາເມຣິກາປະຈຳ ສປປ ລາວ ຈັດກອງປະຊຸມແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ ເພື່ອຕອບສະໜອງຕໍ່ການພັດທະນາເສດຖະກິດ-ສັງຄົມ ການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ ການລຶບລ້າງຄວາມທຸກຍາກ ແລະ ຍຸດທະສາດແຫ່ງຊາດວ່າດ້ວຍເສັ້ນທາງຄວາມປອດໄພ II ຄຽງຄູກັນນັ້ນ ກໍເປັນໄລຍະທີ່ກຳລັງກະກຽມແຜນພັດທະນາເສດຖະກິດ-ສັງຄົມແຫ່ງຊາດໄລຍະ 5 ປີ (2020-2025) ແລະ ປຶກສາຫາລືບັນດາບັນຫາຕ່າງໆເພື່ອນຳເອົາເນື້ອໃນດັ່ງກ່າວໄປລາຍງານຕໍ່ກອງປະຊຸມໂຕະມົນທີ່ຈະຈັດຈຂຶ້ນໃນທ້າຍປີ 2019 ນີ້.

ທ່ານ ຄໍາແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ທັງເປັນປະທານ ຄຊກລ ​ໄດ້ກ່າວວ່າ ວຽກ ງານເກັບກູ້ລະເບີດບໍ່ທັນແຕກຢູ່ ສປປ ລາວ ເປັນວຽກງານໜຶ່ງທີ່ລັດຖະບານກໍຄື ຄະນະກຳມະການຄຸ້ມຄອງແຫ່ງຊາດໄດ້ເອົາໃຈໃສ່ຕະຫລອດມາ ແລະ ເປັນບູລິມະສິດຕົ້ນຕໍຂອງການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ໂດຍການສະ ໜັບສະໜູນ ແລະ ຮ່ວມມືຈາກບັນດາຄູ່ຮ່ວມພັດທະນາ ແລະ ອົງການຈັດຕັ້ງສາກົນ ການຈັດຕັ້ງປະຕິບັດໃນໄລຍະ 1 ປີທີ່ຜ່ານມາໄດ້ມີຜົນສໍາເລັດຫຼາຍດ້ານໃນການແກ້ໄຂບັນຫາລະເບີດບໍ່ທັນແຕກ ຊຶ່ງປະກອບດ້ວຍການປຶກສາຫລືເພື່ອປັບປຸງຍຸດທະສາດ ແລະ ແຜນໄລຍະຍາວຂອງວຽກງານໂຄສະນາຜົນຮ້າຍຈາກລູກລະເບີດບໍ່ທັນແຕກ ການສຳຫຼວດ ແລະ ກວດກູ້ ໂດຍສະເພາະແມ່ນແຜນບູລິມະສິດ 2020 ແລະ ການຊ່ວຍເຫຼືອຜູ້ທີ່ຖືກເຄາະຮ້າຍ.

ນັບແຕ່ປີ 2018 ເຖິງປັດຈຸບັນ ອົງການປະຕິບັດງານສາມາດກວດກູ້ລະ​ເບີດ​ບໍ່​ທັນ​ແຕກໄດ້ປະມານ 11.000 ​ເຮັກຕາ ໃນນັ້ນເປັນເນື້ອທີ່ກະສິກໍາ 6.636 ​ເຮັກຕາ ສາມາດທໍາລາຍລະເບີດໄດ້ທັງໝົດ 162.654 ໜ່ວຍ ​ໃນ​ນັ້ນ ບົມໃຫຍ່ 235 ໜ່ວຍ ບົມບີ່ 130.445 ໜ່ວຍ ມິນ 55 ໜ່ວຍ ແລະ ລະເບີດຊະນິດອື່ນໆ 31.919 ໜ່ວຍ ການສໍາຫຼວດທີ່ບໍ່ແມ່ນວິຊາການສາມາດປະຕິ ບັດໄດ້ 710 ບ້ານ ໃນນັ້ນ ສາມາດສໍາຫຼວດວິຊາການ​ໄດ້ 48.600 ກວ່າ​ເຮັກຕາ ແລະ ສາມາດຢັ້ງຢືນເປັນພື້ນທີ່ອັນຕະລາຍໄດ້ 34.000 ກວ່າ​ເຮັກຕາ ນອກຈາກນັ້ນ ອົງການປະຕິບັດງານຍັງໄດ້ຈັດການໂຄສະນາຜົນຮ້າຍຈາກ ລບຕ ໃຫ້ກັບບັນດາບ້ານເປົ້າ ໝາຍຈຳນວນຫຼາຍຄັ້ງ ຊຶ່ງໄດ້ມີຜູ້ສົນໃຈເຂົ້າຮ່ວມທັງໝົດເກືອບ 4 ແສນຄົນ ມີອຸບັດເຫດທີ່ເກີດຈາກ ລບຕ ຈໍານວນ 22 ຄັ້ງ ມີຜູ້ຖືກເຄາະຮ້າຍທັງໝົດ 31 ຄົນ ບາດເຈັບ 26 ຄົນ ແລະ ເສຍຊີວິດ 5 ຄົນ ພ້ອມນີ້ ຍັງໄດ້ພະຍາຍາມຊີ້ນໍາໃຫ້ບັນດາອົງການປະ ຕິບັດງານແກ້ໄຂບັນຫາລະເບີດບໍ່ທັນແຕກຂອງລາວ ແລະ ຕ່າງປະເທດໃຫ້ໄດ້ປະສິດທິຜົນ ແລະ ສອດຄ່ອງກັບມາດຕະຖານແຫ່ງຊາດ.

ໂດຍ: ດອກຕາເວັນ

ຂໍຂອບໃຈ ທີ່ມາຂ່າວ

Facebook Comments

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Check Also

ອີຢູ ແລະ ຢູນິເຊັບ ມອບລົດຈັກ-ເຄື່ອງຄອມພິວເຕີ ໃຫ້ແກ່ກະຊວງສຶກສາທິການ ແລະ ກີລາ

ໃນວັນທີ 3 ຕຸລາ 2019 ທີ່ນະຄອນຫລວງວຽງຈັນ, ສະຫະພາບຢຸໂຣບ (EU) ແລະ ອົງການສະຫະປະຊາຊາດສໍາລັບເດັກ …