Home ຂ່າວກິລາ ນັກແລ່ນກວ່າ 1,000 ຄົນກຽມຮ່ວມງານແລ່ນ RUN FOR HER 2019 ທ້າຍເດືອນຕຸລານີ້

ນັກແລ່ນກວ່າ 1,000 ຄົນກຽມຮ່ວມງານແລ່ນ RUN FOR HER 2019 ທ້າຍເດືອນຕຸລານີ້

52 second read
0
0
4

ຜູ້ຈັດງານແລ່ນຊູເປີມິນິມາຣາທອນ RUN FOR HER 2019 ເປີດເຜີຍ ຕອນນີ້ມີນັກແລ່ນສະໝັກເຂົ້າຮ່ວມແລ່ນແລ້ວກວ່າ 1,000 ຄົນ ເຊິ່ງງານດັ່ງກ່າວນີ້ຈະຈັດຂຶ້ນໃນວັນທີ 27 ຕຸລາ 2019 ນີ້ທີ່ນະຄອນຫຼວງວຽງຈັນ.

ພິທີຖະແຫຼງຂ່າວງານແລ່ນ Run For Her 2019 ມີຂຶ້ນເມື່ອຕອນເຊົ້າຂອງວັນທີ 2 ຕຸລາ 2019 ນີ້ ທີ່ໂຮງແຮມຄຣາວພລາຊາ ນະຄອນຫຼວງວຽງຈັນ ໂດຍມີຜູ້ຈັດງານ, ຜູ້ສະໜັບສະໜຸນ, ນັກແລ່ນ ແລະ ສື່ມວນຊົນເຂົ້າຮ່ວມຮັບຟັງຂໍ້ມູນຕ່າງໆກ່ຽວກັບງານແລ່ນໃນຄັ້ງນີ້.

Run For Her ຈັດຂຶ້ນໂດຍວາລະສານຂວັນໃຈອອນລາຍ ແລະ ສະມາຄົມນັກທຸລະກິດແມ່ຍິງລາວ ຮ່ວມກັບສະຫະພັນແລ່ນ-ລານແຫ່ງຊາດລາວ ໂດຍມີຈຸດປະສົງເພື່ອປູກຈິດສຳນຶກໃຫ້ຄົນໃນສັງຄົມເຫັນຄວາມສຳຄັນ ແລະ ຮ່ວມກັນຢຸດຕິການໃຊ້ຄວາມຮຸນແຮງຕໍ່ແມ່ຍິງ ແລະ ເດັກນ້ອຍ.

ທັງນີ້ ງານດັ່ງກ່າວນີ້ເກີດຂຶ້ນຕໍ່ເນື່ອງຈາກງານ Bike For Her ເຊິ່ງເປັນງານປັ່ນລົດຖີບ ແຕ່ເນື່ອງຈາກທາງຜູ້ຈັດຕ້ອງການໃຫ້ຄົນທົ່ວໄປສາມາດເຂົ້າຮ່ວມກິດຈະກຳໄດ້ໂດຍໃຊ້ອຸປະກອນກີລາທີ່ໜ້ອຍທີ່ສຸດ ຈຶ່ງປ່ຽນຮູບແບບກາຍມາເປັນງານແລ່ນໃນປີນີ້, ທ່ານ ນາງ ເກດສະຫວັນ ປັນຍາທິບ ຮອງຜູ້ອຳນວຍການ ວາລະສານຂວັນໃຈ ອອນລາຍ ກ່າວ.

ສຳລັບໄລຍະທາງໃນງານດັ່ງກ່າວນີ້ແບ່ງອອກເປັນ 3 ປະເພດຄື: ຊູເປີມິນິມາຣາທອນ 15 ກິໂລແມັດ, ມິນິມາຣາທອນ 10 ກິໂລແມັດ (ທັງສອງຮຸ່ນນີ້ແມ່ນມີປະເພດອາຍຸ 16-29 ປີ, 30-39 ປີ, 40-49 ປີ ແລະ 50 ປີຂຶ້ນໄປ) ແລະ ຟັນຣັນ (fun run) 5 ກິໂລແມັດ ເຊິ່ງບໍ່ຈຳກັດອາຍຸ.

ອີງຕາມຂໍ້ມູນຈາກຜູ້ຈັດງານ, ປັດຈຸບັນມີນັກແລ່ນສະໝັກຮ່ວມງານແລ້ວກວ່າ 1,100 ຄົນ ແລະ ຕັ້ງເປົ້າຕໍ່ໄປວ່າ ອາດຮັບຈົນຮອດ 1,500 ຄົນ ເຊິ່ງນີ້ຈະຖືວ່າເປັນອີກໜຶ່ງປະຫວັດສາດໜ້າໃໝ່ຂອງງານແລ່ນເຊິ່ງມີຜູ້ເຂົ້າຮ່ວມເປັນຈຳນວນຫຼາຍ.

ແນວໃດກໍຕາມ ເນື່ອງຈາກມີຜູ້ເຂົ້າຮ່ວມງານເປັນຈຳນວນຫຼາຍ ກໍມີຄວາມກັງວົນເລື່ອງຄວາມປອດໄພ ແຕ່ທາງຜູ້ຈັດງານກໍໄດ້ຊີ້ວ່າ ໄດ້ມີການກະກຽມຈຸດໃຫ້ບໍລິການນັກແລ່ນເປັນແຕ່ລະໄລຍະ, ມີທີມແພດ, ອາສະໝັກຄອຍໃຫ້ຄວາມຊ່ວຍເຫຼືອ ຮວມທັງເຈົ້າໜ້າທີ່ຈະລາຈອນທີ່ຈະມາອຳນວຍຄວາມສະດວກ ແລະ ຮັກສາຄວາມປອດໄພໃນລະຫວ່າງເສັ້ນທາງຂອງການແລ່ນ.

ນອກຈາກຈຸດປະສົງຫຼັກຂອງງານທີ່ຕ້ອງການປຸກລະດົມຕໍ່ຕ້ານການໃຊ້ຄວາມຮຸນແຮງຕໍ່ແມ່ຍິງ ແລະ ເດັກນ້ອຍແລ້ວ, ງານດັ່ງກ່າວນີ້ຍັງຈະເປັນດຶງເອົາຜູ້ທີ່ສົນໃຈຮ່ວມແລ່ນທັງພາຍໃນ ແລະ ຕ່າງປະເທດໃຫ້ເຂົ້າມາຮ່ວມການແຂ່ງຂັນ ແລະ ຢ້ຽມຢາມນະຄອນຫຼວງວຽງຈັນ ໂດຍເສັ້ນທາງແລ່ນຈະມີສະຖານທີ່ສຳຄັນທາງປະຫວັດສາດ ແລະ ວັດທະນະທຳ ຮວມທັງມີທັດສະນີຍະພາບທີ່ສວຍງານ. ພ້ອມນັ້ນກໍເປັນການກະກຽມສ້າງຂະບວນການໃສ່ມະຫະກຳກີລາແຫ່ງຊາດ ເຊິ່ງຈະຈັດຂຶ້ນທີ່ແຂວງຊຽງຂວາງ, ສົ່ງເສີມໃຫ້ມວນຊົນຫັນມາໃສ່ໃຈສຸຂະພາບ ແລະ ການອອກກຳລັງກາຍ, ປະກອບສ່ວນໃຫ້ພົນລະເມືອງລາວມີສຸຂະພາບທີ່ດີ ເພື່ອມີສ່ວນຮ່ວມໃນການສ້າງນະຄອນຫຼວງວຽງຈັນໃຫ້ຈະເລີນຮຸງເຮືອງ.

ທັງນີ້ ງານແລ່ນດັ່ງກ່າວຈະມີຂຶ້ນໃນວັນທີ 27 ຕຸລາ 2019 ນີ້ ເຊິ່ງຈຸດເລີ່ມຕົ້ນ ແລະ ເສັ້ນໄຊແມ່ນຢູ່ທີ່ເດີ່ນພະທາດຫຼວງ ໂດຍຈະເລີ່ມປ່ອຍນັກແລ່ນໃນເວລາປະມານ 5 ໂມງເຊົ້າ. ຜູ້ທີ່ເຂົ້າເສັ້ນໄຊເປັນອັນດັບທີ 1-5 ແມ່ນຈະໄດ້ເງິນລາງວັນເປັນເງິນສົດອີກດ້ວຍ.

ສຳລັບການລົງທະບຽນເພື່ອຮ່ວມງານແລ່ນນີ້ ປັດຈຸບັນແມ່ນຍັງເປີດຮັບສະໝັກຢູ່ ຈົນຮອດວັນທີ 11 ຕຸລາ 2019 ນີ້ ເຊິ່ງລາຄາແມ່ນມີດັ່ງລຸ່ມນີ້:

  • ຊູເປີມິນິມາຣາທອນ 15 ກິໂລແມັດ ລາຄາ 150,000 ກີບ (ຜູ້ສະໝັກທຸກຄົນຈະໄດ້ຮັບເສື້ອ ແລະ ຫຼຽນ)
  • ມິນິມາຣາທອນ 10 ກິໂລແມັດ ລາຄາ 120,000 ກີບ (ຜູ້ສະໝັກທຸກຄົນຈະໄດ້ຮັບເສື້ອ ແລະ ຫຼຽນ)
  • ຟັນຣັນ 5 ກິໂລແມັດ ລາຄາ 100,000 ກີບ (ຜູ້ສະໝັກທຸກຄົນຈະໄດ້ຮັບເສື້ອເທົ່ານັ້ນ)

ຂໍ້ມູນເພີ່ມເຕີມສອບຖາມໄດ້ທີ່ Kuanjai Magazine ຫຼື ລົງທະບຽນໄດ້ທີ່ ຕຶກ ເຄແອນຊີ ບ້ານສີສະຫວາດ ຖະໜົນສຳນັກງານນາຍົກລັດຖະມົນຕີ, ເມືອງຈັນທະບູລີ (ດ້ານຫຼັງ ມສ ວຽງຈັນ). ໂທລະສັບ 02028042166, 02028243086 ແລະ 021216666 ຫຼື ລົງທະບຽນທາງອອນລາຍທີ່ https://register.runforher.la

 

ຂໍຂອບໃຈ/ທີ່ມາ

Facebook Comments

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Check Also

ອີຢູ ແລະ ຢູນິເຊັບ ມອບລົດຈັກ-ເຄື່ອງຄອມພິວເຕີ ໃຫ້ແກ່ກະຊວງສຶກສາທິການ ແລະ ກີລາ

ໃນວັນທີ 3 ຕຸລາ 2019 ທີ່ນະຄອນຫລວງວຽງຈັນ, ສະຫະພາບຢຸໂຣບ (EU) ແລະ ອົງການສະຫະປະຊາຊາດສໍາລັບເດັກ …