Home ຂ່າວເດັ່ນ ໝວຍ ຖືກຕັດສິນລົງໂທດຂັ້ນສູງສຸດ

ໝວຍ ຖືກຕັດສິນລົງໂທດຂັ້ນສູງສຸດ

35 second read
0
0
240

ລາຍງານ 22 ພະຈິກ 2019, ອີງຕາມການລາຍງານຂອງໜັງສືພິມຄວາມສະຫງົບໃຫ້ຮູ້ວ່າ: ຄະນະສານອາຍາ ສານປະຊາຊົນຂັ້ນຕົ້ນ ແຂວງຈຳປາສັກ ໄດ້ຕັດສິນໃຫ້ນາງ ຮວຍເຮືອງ ໄຊຍະບູລີ ຫຼື ໝວຍ ອາຍຸ 30 ປີ, ອາຊີບຄ້າຂາຍ, ຄົນບ້ານສະເຫຼົ້າ, ເມືອງໂພນທອງ, ແຂວງຈຳປາສັກ ຈຳຄຸກ 5 ປີ ພ້ອມທັງປັບໃໝ 20 ລ້ານກີບ ສະຖານໂຄສະນາຕ້ານ ສປປ.ລາວ.
ເຊິ່ງຜ່ານການສອບສວນຕົວຈິງ, ຜູ້ກ່ຽວຮັບສາລະພາບວ່າ: ໄດ້ເປັນຜູ້ລົງມືໂຄສະນາທາງ facebook ແທ້, ໂດຍໃນວິດີໂອໜຶ່ງ ນາງ ໝວຍ ໄດ້ເວົ້າອອກປາກເຖິງການກະທຳ ແລະ ເຈດຕະນາອັນແທ້ຈິງຂອງຜູ້ກ່ຽວ.
ຜ່ານການຄົ້ນຄວ້າບັນດາຂໍ້ມູນຫຼັກຖານ ແລະ ເອກະສານຕ່າງໆ ທີ່ປະກອບໃນສຳນວນຄະດີຢ່າງລະອຽດຖີ່ຖ້ວນເຫັນວ່າ: ມີຫຼັກຖານຮັດກຸມໜັກແໜ້ນ ແລະ ພຽງພໍຢັ້ງຢືນວ່າ ການກະທຳຂອງນາງ ໝວຍ ເປັນການກະທຳຜິດທາງອາຍາ ມາດຕາ 117 ແທ້.
ກົດໝາຍອາຍາ ມາດຕາ 117 ໄດ້ລະບຸໄວ້ວ່າ: ບຸກຄົນໃດ ຫາກໄດ້ໂຄສະນາໃສ່ຮ້າຍປ້າຍສີ ສາທາລະນະລັດ ປະຊາທິປະໄຕ ປະຊາຊົນລາວ, ບິດເບືອນແນວ ທາງຂອງພັກ ແລະ ນະໂຍບາຍ ຂອງລັດ, ປ່າວຂ່າວອະກຸສົນ, ເຮັດໃຫ້ມີຄວາມວຸ້ນວາຍ ດ້ວຍການເວົ້າ, ການຂຽນ, ການພິມ, ໜັງສືພິມ, ຮູບເງົາ, ວີດີໂອ, ຮູບພາບ, ເອກະສານ, ສື່ທາງເອເລັກໂຕຣນິກ ຫຼື ດ້ວຍຮູບການອື່ນ ທີ່ມີເນື້ອໃນຕ້ານ ສາທາລະນະລັດ ປະຊາທິປະໄຕ ປະຊາຊົນລາວ ເພື່ອເຮັດໃຫ້ອຳ ນາດແຫ່ງລັດອ່ອນເພຍ ຈະຖືກລົງໂທດຕັດອິດສະຫລະພາບ ແຕ່ 1 ປີ ຫາ 5 ປີ ແລະ ຈະຖືກປັບໃໝ ແຕ່ 5,000,000 ກີບ ຫາ 20,000,000 ກີບ.
ກ່ອນໜ້ານີ້, ເມື່ອວັນທີ 17 ກັນຍາ 2019 ທ່ານ ພັນໂທ ໄພຈິດ ໄຊຍະເດດ ຮອງຫ້ອງຕຳຫຼວດ ປກສ ແຂວງຈຳປາສັກ ໃຫ້ສຳພາດກັບໜັງສືພິມວຽກຈັນທາມ ໃຫ້ຮູ້ວ່າ: ໃນເດືອນມີຖຸນາ ປີ 2018 ນາງ ໝວຍ ໄດ້ມີການຖ່າຍທອດສົດຜ່ານ ເຟສບຸກ ຂອງຜູ້ກ່ຽວ ແລະ ໄດ້ເວົ້້າໃສ່ຮ້າຍປ້າຍສີຕໍ່ຕ້ານລັດຖະບານລາວ, ສະນັ້ນ ທາງເຈົ້າໜ້າທີ່ຂອງພວກເຮົາກໍ່ໄດ້ເຊີນຜູ້ກ່ຽວມາຊີ້ແຈງ ແລະ ກ່າວເຕືອນສຶກສາອົບຮົມ ບໍ່ໃຫ້ມີພຶດຕິກຳ ດັ່ງກ່າວອີກ. ຈາກນັ້ນ, ໃນຕົ້ນເດືອນກັນຍາ 2019 ທີ່ຜ່ານມາ ນາງ ໝວຍ ກໍ່ໄດ້ມີການຖ່າຍທອດສົດຕື່ມອີກ ເຊິ່ງມີເນື້ອໃນລັກສະນະຕໍ່ຕ້ານລັດຖະບານ ສປປ.ລາວ, ເຈົ້າໜ້າທີ່ຈຶ່ງໄດ້ມີການກັກຕົວຜູ້ກ່ຽວໄວ້ທີ່ຄຸມຂັງແຂວງຈຳປາສັກ ມາຕັ້ງແຕ່ວັນທີ 12 ກັນຍາ 2019 ທີ່ຜ່ານມາ ຈົນຖືກສານຕັດສິນລົງໂທດຄືດັ່ງກ່າວ.

Facebook Comments

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Check Also

ອາເຊມາ ຊີ້ແຈງການມອບຂັນເປຕັງ

ເຫດການທີ່ປະທານສະຫະພັນເປຕັງນານາຊາດ ມອບລາງວັນໃຫ້ນັກກິລາລາວ ແລ້ວວາງຂັນລາງວັນລົງພື້ນ ສ້າງຄວາມບ…