ໜ້າຫຼັກ ຂ່າວເດັ່ນ ທາງອອກຂອງຜ້າອັດປາກ ບໍ່ແມ່ນການຄຸມລາຄາຢ່າງດຽວ

ທາງອອກຂອງຜ້າອັດປາກ ບໍ່ແມ່ນການຄຸມລາຄາຢ່າງດຽວ

2 ຄົນ ກຳລັງອ່ານຢູ່
0
0
154
Loading...

ພາຍຫຼັງການລະບາດຂອງເຊື້ອຈຸລະໂລກສາຍພັນໃໝ່ ຫຼື COVID-19 ຜ້າອັດປາກແມ່ນສິ່ງທຳອິດທີ່ຈຳເປັນຕ້ອງໃຊ້ ເຮັດໃຫ້ຜ້າອັດປາກລາຄາປົກກະຕິ 15,000 ກີບ/ກັບ ຕາມຮ້ານຂາຍຢາໄດ້ຫາຍວັບໄປກັບຕາ ຍັງເຫຼືອແຕ່ຂອງແພງໆ ທີ່ບັນດາພໍ່ຄ້າ-ແມ່ຄ້ານຳເຂົ້າຈາກຕ່າງປະເທດມາຂາຍໃນລາຄາທີ່ແພງຕັ້ງແຕ່ 150,000 – 250,000 ກີບ/ກັບ ເປັນບັນຫາເດືອດຮ້ອນທີ່ສຸດຂອງປະຊາຊົນລາວໃນປັດຈຸບັນ.

ຕໍ່ຄວາມເດືອດຮ້ອນຂອງປະຊາຊົນຄືດັ່ງກ່າວ, ຂັ້ນເທິງ ໂດຍສະເພາະແມ່ນໜ່ວຍສະເພາະກິດແກ້ໄຂແລະປາບປາມໂຄວິດ-19 ກໍໄດ້ສົມທົບກັບພາກສ່ວນອຸດສາຫະກຳແລະການຄ້າເອົາໃຈໃສ່ຄວບຄຸມສຸດຂີດ ດ້ວຍການອອກແຈ້ງການຫ້າມຂາຍຜ້າອັດປາກແພງເກີນລາຄາ ແລະກຳນົດໃຫ້ຂາຍຢູ່ທີ່ 25,000 ກີບ/ກັບ ຖ້າໃຜລະເມີດຈະຖືກດຳເນີນຄະດີແລະລົງໂທດຕາມລະບຽບກົດໝາຍ ພ້ອມທັງອອກເບີສາຍດ່ວນ 1510 ໃຫ້ຜູ້ພົບເຫັນການຂາຍເກີນລາຄາໄດ້ໂທແຈ້ງ.

ແຕ່ການອອກມາຕະການດັ່ງກ່າວ ກໍບໍ່ສາມາດຄວບຄຸມລາຄາໄດ້ ບັນດາຮ້ານຄ້າ(ທີ່ບໍ່ແມ່ນຮ້າຍຂາຍຢາ) ຍັງມີວາງຈຳໜ່າຍດ້ວຍລາຄາ 150,000 ກີບ/ກັບຂຶ້ນໄປ ຢ່າງເປີດເຜີຍ ແລະກໍບໍ່ປາກົດມີຂ່າວຄາວການເຄື່ອນໄຫວຈັບກຸມຜູ້ກະທຳຜິດຂອງເຈົ້າໜ້າທີ່ຕໍ່ກັບການລະເມີດດັ່ງກ່າວ. ນີ້ມັນສະແດງໃຫ້ເຫັນວ່າ ບໍ່ມີໃຜທັງເຈົ້າໜ້າທີ່ແລະປະຊາຊົນ ໄດ້ເອົາຫູໃສ່ໃຈຊາຕໍ່ການຄວບຄຸມລາຄາດັ່ງກ່າວດັ່ງກ່າວ ຍ້ອນວ່າທຸກຄົນຮູ້ແກ່ໃຈວ່າ ຜ້າອັດປາກທີ່ວາງຂາຍເກີນລາຄານັ້ນ ເປັນສິນຄ້ານຳເຂົ້າ(ຈາກຫວຽດນາມ) ເຊິ່ງແມ່ຄ້າກໍອ້າງວ່າຊື້ມາແພງກໍຕ້ອງໄດ້ຂາຍແພງ ແລະລູກຄ້າກໍຈຳໃຈຕ້ອງຊື້ຍ້ອນວ່າ ຖ້າບໍ່ຊື້ແພງກໍບໍ່ມີບ່ອນທີ່ຖືກໆ ໃຫ້ຊື້.

ຖ້າຢາກແກ້ໄຂບັນຫາດັ່ງກ່າວນັ້ນແທ້ ລັດຖະບານເຮັດໄດ້ຢູ່ແລ້ວ, ກໍພຽງແຕ່ລັດຖະບານຜະລິດຂຶ້ນມາເອງ ຫຼືນຳເຂົ້າມາເອງໂດຍຜ່ານການຂາຍລະຫວ່າງລັດຕໍ່ລັດ. ພັກ, ລັດຖະບານ ແລະປະຊາຊົນລາວ ມີຄວາມໃກ້ຊິດຕິດແທດທີ່ສຸດກັບ ພັກ, ລັດຖະບານ ແລະປະຊາຊົນຫວຽດນາມ ເປັນເງື່ອນໄຂທີ່ດີທີ່ລັດຖະບານຈະສາມາດເຈລະຈາຂໍຊື້ແບບລັດຕໍ່ລັດໄດ້. ຫຼືມັນມືເງື່ອນງຳໃດທີ່ເຮັດໃຫ້ລັດຖະບານບໍ່ສາມາດເຮັດແບບນັ້ນໄດ້ ກະຊວງອຸດສາຫະກຳແລະການຄ້າຄວນລົງໄປຊອກຫາສາເຫດແລະແກ້ໄຂມັນ ພ້ອມທັງແຈ້ງໃຫ້ປະຊາຊົນເຂົ້າໃຈນຳພ້ອມ ດີກວ່າປ່ອຍໃຫ້ປະຊາຊົນງຸນງົງສົງໄສ.

ຕອນນີ້ຊິວ່າຜ້າອັດປາກຂາດຕະຫຼາດກໍບໍ່ແມ່ນ ເພາະມີວາງຂາຍຢູ່ທົ່ວໄປ ແຕ່ຂາຍໃນລາຄາທີ່ແພງ. ມີແຕ່ສາຍພົວພັນມິດຕະພາບລາວ-ຫວຽດນາມເທົ່ານັ້ນລະ ທີ່ຈະເຮັດໃຫ້ຜ້າອັດປາກມີລາຄາຖືກລົງ, ລອງເຈລະຈາຊື້ແບບລັດຕໍ່ລັດລອງເບິ່ງ ໃນຍາມວິກິດສຸກເສີນແບບນີ້ ເພິ່ນຄົງບໍ່ປະຕິເສດດອກ.

ແນວໃດກໍຕາມ, ຜູ້ຂຽນກໍຍັງມີຄວາມເຊື່ອໝັ້ນວ່າ ພາຍໃຕ້ການນຳຂອງພັກຯ ລັດຖະບານລາວຈະສາມາດນຳພາປະຊາຊົນລາວຜ່ານຜ່າວິກິດຄັ້ງນີ້ໄປໄດ້ຢ່າງແນ່ນອນ ສັງເກດໄດ້ຈາກມາຕະການສະກັດກັ້ນແລະຕອບໂຕ້ຂອງລັດໃນໄລຍະທີ່ຜ່ານມານັ້ນແມ່ນມີຄວາມເຄັ່ງຄັດແລະຍົກລະດັບເຂັ້ມຂຸ້ນຂຶ້ນເລື້ອຍໆ ແລະມາຮອດມື້ນີ້ກໍຍັງບໍ່ປາກົດເຫັນຜູ້ຕິດເຊື້ອພະຍາດດັ່ງກ່າວແຕ່ຢ່າງໃດ.

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

ຂ່າວເດັ່ນທີ່ຢາກໃຫ້ອ່ານ

ດ່ວນ!!!ເກີດເຫດລະເບີດໃຫຍ່ຢູ່ນະຄອນ ເບຣຸດ​ ປະເທດເລບານອນ

ວັນທີ​ 5​ ສິງຫາ​ ນີ້ເກີດການລະເບີດຢ່າງແຮງ ປານນິວເຄຼຍ ກຸ່ມຄັວນຂະໜາດຍັກ ພຸ່ງຂຶ້ນທ້ອງຟ້າເປັນດອ…