ໜ້າຫຼັກ ນານາສາລະ ເພິ່ນຈະປິດປະເທດບໍ? ປະເທດລາວປິດແລ້ວ! ແຕ່ອ່ານໃຫ້ຈົບກ່ອນຈຶ່ງຄ່ອຍແຊກະໄດ້.

ເພິ່ນຈະປິດປະເທດບໍ? ປະເທດລາວປິດແລ້ວ! ແຕ່ອ່ານໃຫ້ຈົບກ່ອນຈຶ່ງຄ່ອຍແຊກະໄດ້.

3 ຄົນ ກຳລັງອ່ານຢູ່
0
14
71,200
Loading...
#ເພິ່ນຈະປິດປະເທດບໍ? ປະເທດລາວປິດແລ້ວ! ແຕ່ອ່ານໃຫ້ຈົບກ່ອນຈຶ່ງຄ່ອຍແຊກະໄດ້.
 
#ມັນຂຶ້ນກັບສະຖານະການການລະບາດຂອງພະຍາດ ຖ້າມັນລະບາດມາທາງໃດ ເພິ່ນກໍເລິ່ມປິດທາງນັ້ນກ່ອນໝູ່. ປະເທດລາວປິດດ່ານອອກສູ່ປະເທດຈີນແລ້ວ, ຕໍ່ມາກໍໂຈະສາຍການບິນໄປຍີ່ປຸ່ນ, ໂຈະສາຍການບິນໄປເກົາຫຼີ, ໂຈະສາຍການບິນໄປບາງກອກ… ແລະກໍທະຍອຍປິດດ່ານປະເພນີ, ປິດດ່ານທ້ອງຖິ່ນ, ໂຈະການອະນຸຍາດໃຫ້ນັກທ່ອງທ່ຽວຕ່າງປະເທດເຂົ້າລາວ (ຍົກເວັ້ນກໍລະນີພິເສດ ເຊັ່ນ ນັກການທູດ, ການຢ້ຽມຢາມທາງການ, ນັກການແພດ…), ແນະນຳຄົນລາວທີ່ຢູ່ປະເທດຫຼືເຂດລະບາດຂອງພະຍາດເລື່ອນການເດິນທາງກັບລາວ ເພາະຢ້ານຕິດພະຍາດໃນເວລາເດິນທາງ, ການປິດປະເທດຂອງແຕ່ລະປະເທດນັ້ນຈະບໍ່ຄືກັນ ມັນມີຂອບເຂດຄວາມຈຳເປັນສໍ່າໃດກໍປິດສໍ່ານັ້ນ .
 
#ການປິດປະເທດຫຼືການປິດດ່ານບໍ່ໄດ້ໝາຍຄວາມວ່າຈະປິດໝົດທຸກຢ່າງ. ສ່ວນຫຼາຍເພິ່ນຈະຫ້າມບໍ່ໃຫ້ຄົນທຽວເຂົ້າ-ອອກ ແຕ່ວ່າການຂົນສົ່ງສິນຄ້າ, ເຄື່ອງອຸປະໂພກ-ບໍລິໂພກ, ນໍ້າມັນເຊື້ອໄຟ ແລະອາຫານການກິນນັ້ນ ເພິ່ນກໍອະນຸຍາດໃຫ້ຜ່ານ ແຕ່ຈະມີຄວາມເຂັ້ມງວດກວດກາເພື່ອໃຫ້ແນ່ໃຈວ່າມີຄວາມປອດໄພແລະບໍ່ນຳເຊື້ອພະຍາດຈາກເຂດໜຶ່ງໄປສູ່ອີກເຂດໜຶ່ງ.
 
#ເພິ່ນຈະປິດເມືອງບໍ? ອັນນີ້ມັນກໍຂຶ້ນກັບສະຖານະການວ່າພະຍາດມັນລະບາດຢູ່ໃສ ຮ້າຍແຮງສໍ່າໃດຫຼາຍກວ່າ ຄືຕອນນີ້ຍັງບໍ່ເຖິງຂັ້ນນັ້ນ. ຍົກຕົວຢ່າງວ່າ ຫາກເກີດມີການລະບາດໃນເມືອງໃດໜຶ່ງຢ່າງຮຸນແຮງ ເພິ່ນກໍອາດຈະປິດເມືອງນັ້ນໆ ເປັນແຕ່ລະກໍລະນີໄປ. ແຕ່ວ່າບັນດາເຄື່ອງອຸປະໂພກບໍລິໂພກທີ່ຈຳເປັນເພິ່ນກໍເອົາເຂົ້າໄປຢູ່ປົກກະຕິ.
 
#ປິດເມືອງເພິ່ນເຮັດແນວໃດ? #ຊິມີອາຫານກິນຢູ່ບໍ? ຕາມຕິດຕາມຂ່າວຢູ່ເມືອງອູຮັ່ນປະເທດຈີນນັ້ນ, ການປິດເມືອງແມ່ນເພິ່ນປິດບັນດາສະຖານທີ່ທີ່ອາດຈະເປັນບ່ອນແພ່ເຊື້ອພະຍາດ ເຊັ່ນ ປິດໂຮງຮຽນ, ປິດໂຮງໜັງ, ປິດສະຖານບັນເທີງ… ພ້ອມທັງຫ້າມຄົນເຂົ້າ-ອອກເມືອງ, ຫ້າມປະຊາຊົນອອກນອກເຮືອນໂດຍບໍ່ຈຳເປັນ. ແຕ່ເພິ່ນກໍອະນຸຍາດໃຫ້ອອກເຮືອນໄປຕະຫຼາດໄດ້, ຮ້ານຂາຍອາຫານສົດ, ປໍ້ານ້ຳມັນ, ໄຟຟ້າ, ນໍ້າປະປາ, ທະນາຄານ, ໂຮງໝໍ, ເຄືອຂ່າຍໂທລະສັບແລະອິນເຕີເນັດ, ແລະສິ່ງຈຳເປັນຕ່າງໆ ກໍຍັງຄົງດຳເນີນໄປ ແຕ່ອາດຈະເຄັ່ງຄັດຂຶ້ນຕື່ມ. ບາງເທື່ອເພິ່ນກໍໃຫ້ເຈົ້າໜ້າທີ່ເອົາອາຫານໄປສົ່ງໃຫ້ຮອດເຮືອນ.
 
#ຈຳເປັນຕ້ອງໄດ້ກັກຕຸນອາຫານໄວ້ບໍ? ມັນບໍ່ຈຳເປັນຂະໜາດນັ້ນເທື່ອ. ສຳລັບຄົນລາວເຮົາສ່ວນຫຼາຍແລ້ວ ຖ້າມີເຂົ້າສານກັບຢາສາມັນປະຈຳບ້ານແລ້ວ ກໍບໍ່ຄວນກັງວົນຈົນເກີນໄປ. ປະຊາຊົນລາວສ່ວນຫຼາຍຍັງຕິດພັນກັບທຳມະຊາດ ກິນອາຫານສົດໃໝ່ຢູ່ແລ້ວ ຢູ່ເຂດນອກກໍຍັງສາມາດໄປຫາອາຫານຈາກທຳມະຊາດມາກິນ. ບໍ່ຄືຢູ່ຕ່າງປະເທດທີ່ເຂົາກິນອາຫານເຄິ່ງສຳເລັດຮູບຫຼືອາຫານສຳເລັດຮູບຈາກຮ້ານເທົ່ານັ້ນ ເຊັ່ນ: ເຂົ້າໜົມ, ປາກກະປ໋ອງ, ຊີ້ນກະປ໋ອງ, ນົມ, ເສັ້ນໝີ່…
 
#ເຄີຍຕັ້ງຄຳຖາມບໍວ່າ: ເປັນຫຍັງເຈ້ຍອະນາໄມ (ທິດຊູ່) ຢູ່ຕ່າງປະເທດຄືເຂົາຍາດກັນ? ມີຂ່າວບອກວ່າເຂົາເຈົ້າມັກໃຊ້ເຈ້ຍເຊັດກົ້ນຫຼາຍກວ່າໃຊ້ນໍ້າລ້າງກົ້ນ. ສະນັ້ນແລ້ວ ຄົນລາວຈຳເປັນຕ້ອງກັກຕຸນເຈ້ຍອະນາໄມ ຫຼືຍາດຊິງເຈ້ຍອະນາໄມຈົນຕີກັນຄືເຂົາດອກ.?
 
#ສິ່ງທີ່ຄວນເຮັດໃນຕອນນີ້ ຄື: ຕັ້ງສະຕິໃຫ້ດີ, ດຳລົງຊີວິດປົກກະຕິຢ່າງລະມັດລະວັງ, ຢ່າຕື່ນຕະໜົກຈົນເກີນໄປ, ຢ່າສະຕິແຕກນຳຂໍ້ຄວາມທີ່ສົ່ງຕໍ່ໆ ກັນໃນສັງຄົມອອນລາຍ, ຟັງຂ່າວຈາກຂັ້ນເທິງ ມີຫຍັງເພິ່ນຫາກຊິແຈ້ງໃຫ້ຮູ້ ແລະໃຫ້ເຮັດຕາມຫຼັກການແລະຂັ້ນຕອນ. ຕົວຢ່າງ: ເພິ່ນໃຫ້ຢຸດໄປຕ່າງປະເທດກໍບໍ່ຟ້າວໄປ, ເພິ່ນໃຫ້ຢຸດຈັດງານກໍຢຸດໄວ້ກ່ອນ, ເພິ່ນສັ່ງພັກຮຽນກໍພາກັນພັກ, ເພິ່ນໃຫ້ປະຕິບັດໂຕແນວໃດກໍເຮັດຕາມນັ້ນ… ແລ້ວຊີວິດເຮົາກໍຈະປອດໄພ.
 
ລັດຖະບານຮ່ວມກັບອົງການສາກົນໄດ້ກຽມຄວາມພ້ອມທຸກຢ່າງໄວ້ແລ້ວ. ບັນດາໂຮງໝໍສູນກາງແລະໂຮງໝໍແຂວງ ແມ່ນກຽມພ້ອມທີ່ຈະຮັບຄົນເຈັບທີ່ຕິດໄວຣັສໂຄວິດ 19 ເຂົ້າປິ່ນປົວ, ມີການເຝິກອົບຮົມ, ກຽມຢາ ແລະອຸປະກອນທຸກຢ່າງຢູ່ແລ້ວ ຂໍໃຫ້ອຸ່ນໃຈໄດ້.
 
ຖ້າເຫັນວ່າບົດຂຽນນີ້ດີຕໍ່ໃຈ ຈົ່ງແຊຕໍ່ໄປໃຫ້ຄົນທີ່ທ່ານຮັກດ້ວຍ.
 
ຮັກແລະຫ່ວງ ທຸກຄົນເດີ!

ໂດຍ:   Xiengkalen Banna

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

ຂ່າວເດັ່ນທີ່ຢາກໃຫ້ອ່ານ

ເບື້ອງຫຼັງຂອງພະອາຈານ ກ່ອນຈະໄດ້ລາງວັນຊີໄຣ

ຫລາຍຄົນຖາມມາວ່າ ພະອາຈານ ໄດ້ຮັບລາງວັນຊີໄຣ ປີ 2019 ດີໃຈບໍ ? ອາຕະມາຢືນຢັນຕະຫຼອດວ່າ  ບໍ່ໄດ້ດີໃ…