ໜ້າຫຼັກ ນານາສາລະ ໄກ້ ແລະ ໃກ້ ຂຽນຄືກັນ ແຕ່ຕ່າງຄວາມໝາຍ : ເວລາໃດຈຶ່ງຂຽນດ້ວຍ ໄx ແລະ ໃx?

ໄກ້ ແລະ ໃກ້ ຂຽນຄືກັນ ແຕ່ຕ່າງຄວາມໝາຍ : ເວລາໃດຈຶ່ງຂຽນດ້ວຍ ໄx ແລະ ໃx?

17 ຄົນ ກຳລັງອ່ານຢູ່
0
1
322
Loading...

ພາສາລາວແມ່ນພາສາລາວທີ່ຄົນລາວໃຊ້ຕິດຕໍ່ສື່ສານ, ຄົບຄ້າສະມາຄົມອາລົມຈິດນຳກັນໃນສັງຄົມ. ເຮົາໃຊ້ພາສາສື່ສານກັນຜ່ານການເວົ້າ ແລະການຂຽນ, ໃນການເວົ້າອາດຈະບໍ່ຈໍາເປັນມີກົດເກນຈໍາກັດ ຕາຍຕົວຫຼາຍ ແຕ່ໃນການຂຽນພັດບໍ່ແມ່ນແນວນັ້ນ. ພາສາທີ່ສື່ສານຜ່ານການຂຽນຖືເປັນພາສາ ທີ່ໃຊ້ໃນການສື່ສານໃນລະດັບທີ່ຕ້ອງມີຄວາມຖືກຕ້ອງແນ່ນອນດ້ານອັກຂະຫຼະວິທີ ຫຼື ວິທີການຂຽນໃຫ້ ເປັນໄປຕາມຫຼັກໄວຍາກອນຂອງພາສາເຊິ່ງໄດ້ກຳນົດໄວ້.

ມື້ນີ້, ພວກເຮົາຈະມາແນະນຳບາງບັນຫາທີ່ພົບໃນການຂຽນພາສາລາວ ນັ້ນກໍແມ່ນບັນຫາຂອງການຂຽນຄຳສັບດ້ວຍສະຫຼະ ໄx ແລະ ໃx. ຫຼາຍຄົນຄົງຢາກບອກວ່າ ເປັນຫຍັງຈຶ່ງບໍ່ເລືອກເອົາອັນໃດອັນໜຶ່ງ ເພື່ອຂຽນຈຶ່ງບໍ່ຍາກໃນການຂຽນ ແຕ່ດ້ານພາສາສາດ ການນໍາໃຊ້ ໄx ແລະ ໃx ມີການກໍານົດຢ່າງຄັກແນ່ ວ່າເວລາໃດຂຽນດ້ວຍ ໄx ແລະ ໃx? ດັ່ງນີ້:

ການໃຊ້ ໄx (ໄອໄມ້ມາຍ) ເອີ້ນວ່າ ໄອໄມ້ມາຍເພາະວ່າຫາງຂອງມັນມາຍອອກ. ການໃຊ້ ໄx ມີຢູ່ 4 ຫຼັກການສຳຄັນຄື:

1. ຄຳລາວຄຳໃດທີ່ຜັນປ່ຽນມາຈາກພາສາປາລີ-ສັນສະກິດເຊິ່ງມີຕົວ ຍ ຢູ່ຫຼັງທີ່ ອ່ານອອກສຽງເປັນ ອະຍະ ຫຼື ເອຍຍະ ໃນພາສາປາລີ ເວລາຂຽນຄວາມລາວໃຫ້ຂຽນດ້ວຍ ໄx (ໄອໄມ້ມາຍ).

ຕົວຢ່າງ: ສມຍ ເປັນ ສມັຍ ເປັນ ສະໄໝ
ພຍ ເປັນ ພັຍ ເປັນ ໄພ
ວິຈຍ ເປັນ ວິຈັຍ ເປັນ ວິໄຈ

2. ຄຳໃດທີ່ຜັນປ່ຽນມາຈາກພາສາປາລີ-ສັນສະກິດເຊິ່ງອອກສຽງເປັນ ໄx (ຕາມຫຼັກການແປງ ຕົວອັກສອນໃນການແປງສະຫຼະ) ໃຫ້ຂຽນເປັນສະຫຼະໄອໄມ້ມາຍ ໄx

ຕົວຢ່າງ: ພິປູຣ ເປັນ ພິບູນ ເປັນ ໄພບູນ
ພິທູຣ ເປັນ ພິທູນ ເປັນ ໄພທູນ

3. ຄຳລາວທົ່ວໄປທີ່ອອກສຽງສະຫຼະໄx ເຊັ່ນ: ໄຂ, ໄຂ່, ໄຄ, ໄຈ້, ໄສ, ໄສ່, ໄສ້, ໄຊ້, ໄຍ,…

4. ຄຳທີ່ຢືມຈາກຕ່າງປະເທດເພື່ອໃຫ້ອ່ານອອກສຽງໄດ້ຕາມສຽງໄອ ເຊິ່ງແມ່ນສຽງເດີມຂອງ ພາສາເຫຼົ່ານັ້ນ ໃຫ້ຂຽນເປັນສະຫຼະໄອໄມ້ມາຍ ໄx

ຕົວຢ່າງ: ສີວິໄລ (civilize), ໄມ (mic ຈາກ microphone), ໄຊງ່ອນ (Saigon), ຊຽງໄຮ້ (Shanghai)

ວິທີໃຊ້ສະຫຼະ ໃx ເອີ້ນວ່າສະຫຼະໄອໄມ້ມ້ວນ ເພາະວ່າຫາງຂອງມັນມ້ວນໄວ້

ການນໍາໃຊ້ ໃx ນີ້ແມ່ນໃຊ້ຂຽນຄຳຕ່າງໆໃນພາສາລາວເພື່ອໃຫ້ສາມາດຈຳແນກຄວາມໝາຍຂອງ ມັນຕາມສຳນຽງຂອງຄົນລາວບາງທ້ອງຖິ່ນເຄີຍໃຊ້ເຊັ່ນ: ຊາວເມືອງຫຼວງພະບາງ ແລະ ໄທດຳ ເຄີຍອອກສຽງວ່າ ອາເອີ ຫຼື ເອີ ເຊັ່ນ: ໄປໃສ? ເວົ້າວ່າ ໄປເສີ?, ພາກໃຕ້ ເວົ້າວ່າ ພາກເຕີ້ ເປັນຕົ້ນ.

ຄຳທີ່ໃຊ້ສະຫຼະໄອໄມ້ມ້ວນໃນພາສາລາວມີຄື: ໃກ້, ໃຂ່, ໃຂ້, ໃຄ, ໃຄ່, ໃຄ້, ໃຈ, ໃຈ້, ໃສ, ໃສ່, ໃສ້, ໃຊ່, ໃຊ້, ໃຍ, ໃດ, ໃຕ, ໃຕ້, ໃນ, ໃບ, ໃບ້, ໃຜ, ໃຝ່, ໃພ້, ໃຢ, ໃຫ້, ໃຮ້, ໃຫງ່, ໃຫຍ່, ໃໝ, ໃໝ່, ໃຫຼ.

ທັງໝົດທີ່ນຳມາສະເໜີທາງເທິງນັ້ນແມ່ນຫຼັກການຂອງການນຳໃຊ້ ໄx ແລະ ໃx ໃນການຂຽນ ພາສາລາວໃຫ້ຖືກຕ້ອງຕາມພາກອັກຂະຫຼະວິທີທີ່ໄດ້ກຳນົດໃນໄວຍາກອນລາວປັດຈຸບັນ ປີ 2000 (ອ່ອນແກ້ວ ນວນນະວົງ ແລະຄະນະ, 2000: 48-52)

ຂຽນໂດຍ: Khonesawan

ທີ່ມາ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

ຂ່າວເດັ່ນທີ່ຢາກໃຫ້ອ່ານ

ແພດຜິວໜັງເຕືອນແລ້ວ “ຄີມປຸງກະປຸກຝາແດງ” ໃຊ້ສ່ຽງເຖິງຊີວິດ

ສະຖາບັນພະຍາດຜິວໜັງຂອງຕ່າງປະເທດ ເຕືອນອັນຕະລາຍຈາກ “ຄີມປຸງກະປຸກຝາແດງ” ເປັນຄີມທີ່ບໍ່ໄດ້ມາດຕະຖາ…