ໜ້າຫຼັກ ເສດຖະກິດ ປີຜ່ານມາສົ່ງອອກສິນຄ້າກະສິກໍາ ມູນຄ່າ 560 ລ້ານໂດລາ

ປີຜ່ານມາສົ່ງອອກສິນຄ້າກະສິກໍາ ມູນຄ່າ 560 ລ້ານໂດລາ

8 ຄົນ ກຳລັງອ່ານຢູ່
0
0
61
Loading...

ການສົ່ງອອກສິນຄ້າກະສິກໍາຂອງລາວປີ 2019 ມີ 1,9 ລ້ານໂຕນ ມູນຄ່າປະມານ 560 ລ້ານໂດລາ. ຫ້າອັນດັບຕົ້ນໆປະກອບມີ: ກ້ວຍ, ອ້ອຍ, ມັນຕົ້ນ, ຢາງພາລາ ແລະ ສາລີ.

ໃນວັນທີ 3 ກໍລະກົດ 2020 ທີ່ໂຮງແຮມຄຣາວພລາຊາ ນະຄອນຫຼວງວຽງຈັນ ໄດ້ມີການຈັດກອງປະຊຸມປຶກສາຫາລືການວາງແຜນຈັດຕັ້ງປະຕິບັດໂຄງການສະໜັບສະໜູນຕ່ອງໂສ້ການຜະລິດກະສິກຳແບບຍືນຍົງໃນອາຊຽນ ( ASEAN AgriTrade Project ) ຢູ່ ສປປ ລາວ ໂດຍການເປັນປະທານຮ່ວມຂອງ ທ່ານ ສີລິພົນ ພິທັກສູນ ຮອງຫົວໜ້າກົມປູກຝັງ, ກະຊວງກະສິກໍາ ແລະ ປ່າໄມ້ ( ກປ ) ແລະ ທ່ານ ແຟຣງ ທິບີທານໂຊ ( Frank Tibitanzl ) ຜູ້ປະສານງານໂຄງການອົງການ GIZ, ມີຜູ້ຕາງໜ້າຈາກພາກສ່ວນທີ່ກ່ຽວຂ້ອງທັງພາກລັດ ແລະ ເອກະຊົນເຂົ້າຮ່ວມ.

ທ່ານ ສີລິພົນ ພິທັກສູນ ກ່າວວ່າ: ຄວາມປອດໄພອາຫານ ໂດຍສະເພາະແມ່ນພືດ ແລະ ຜະລິດຕະພັນພືດເປັນສ່ວນສໍາຄັນໃນການກຳນົດເງື່ອນໄຂເຂົ້າໃນການຄ້າຂາຍ, ອາຊຽນ ໄດ້ຮ່ວມມືກັນໃນການສ້າງ ຄວາມເຂັ້ມແຂງດ້ານການຜະລິດ ແລະ ການຄ້າພືດ ແລະ ຜະລິດຕະພັນພືດ ເພື່ອໃຫ້ສາມາດຈັດຕັ້ງປະຕິບັດຕາມເງື່ອນໄຂມາດຕະຖານຂອງອາຊຽນ ແລະ ສາກົນ ເປັນຕົ້ນແມ່ນມາດຕະຖານກະສິກຳທີ່ດີ ແລະ ມາດຕະຖານກະສິກຳອິນຊີ.

ໃນໄລຍະຜ່ານມາອົງການ GIZ ກໍເຄີຍໄດ້ໃຫ້ການສະໜັບສະໜູນວຽກງານດັ່ງກ່າວ, ຜົນສໍາເລັດໄດ້ສ້າງແຜນຍຸດທະສາດກະສິກຳອິນຊີ ແລະ ການສ້າງ ຄວາມເຂັ້ມແຂງໃຫ້ແກ່ຂະແໜງການປູກຝັງ ເຊິ່ງເປັນການຈັດຕັ້ງປະຕິບັດຍຸດທະສາດພັດທະນາຂະແໜງການປູກຝັງ 2025 ແລະ ວິໄສທັດ 2030 ໂດຍສະເພາະແມ່ນການຢັ້ງຢືນກະສິກໍາທີ່ດີ ແລະ ກະສິກໍາອິນຊີຂອງ ສປປ ລາວ.

ທ່ານ ສີລິພົນ ພິທັກສູນ ໃຫ້ຮູ້ຕື່ມວ່າ: ໃນປີ 2019 ສປປ ລາວ ໄດ້ສົ່ງອອກພືດ ແລະ ຜະລິດຕະພັນພືດ ທັງໝົດ 1,9 ລ້ານໂຕນ ມູນຄ່າປະມານ 560 ລ້ານໂດລາ. ໃນນີ້, ແມ່ນລວມເອົາທັງຜະລິດຕະພັນທີ່ໄດ້ຮັບການຢັ້ງຢືນມາດຕະຖານ GAP ແລະ OA. ໃນນັ້ນ, ພືດ ແລະ ຜະລິດຕະພັນພືດ ຫ້າອັນດັບຕົ້ນໆປະກອບມີ: ກ້ວຍ, ອ້ອຍ, ມັນຕົ້ນ, ຢາງພາລາ ແລະ ສາລີ ໂດຍຕະຫຼາດສົ່ງອອກຫຼັກ ຄື: ສປ ຈີນ, ໄທ ແລະ ສສ ຫວຽດນາມ ເປັນຫຼັກ, ໃນປີດຽວກັນ ສປປ ລາວ ກໍໄດ້ນໍາເຂົ້າພືດ ແລະ ຜະລິດຕະພັນພືດ ຈໍານວນ 754.627 ໂຕນ ມີມູນຄ່າລວມປະມານ 91 ລ້ານໂດລາ ໂດຍສ່ວນ ໃຫຍ່ແມ່ນກາກຖົ່ວເຫຼືອງ, ກາກເມັດພັນພືດ ແລະ ອື່ນໆເປັນຕົ້ນ ນໍາເຂົ້າຈາກ ສສ ຫວຽດນາມ, ສປ ຈີນ ແລະ ໄທ.

ເຖິງແມ່ນວ່າການຄ້າຂາຍພືດ ແລະ ຜະລິດຕະພັນພືດ ແມ່ນຕາມທິດທາງກະສິກໍາສະອາດ ມີຄວາມສະດວກຫຼາຍຂຶ້ນ ແຕ່ບັນຫາພື້ນຖານທີ່ຕິດພັນນໍາວຽກງານດັ່ງກ່າວ ແມ່ນພວກເຮົາຍັງບໍ່ທັນມີແຜນຍຸດທະສາດລວມກະສິກໍາສະອາດ ທີ່ສະແດງໃຫ້ເຫັນທິດທາງກະສິກໍາສະອາດໃນໄລຍະຍາວ, ປັດໄຈການຜະລິດທີ່ມີລາຄາສູງ, ຄວາມເຂົ້າໃຈຂອງສັງຄົມຕໍ່ກະສິກຳສະອາດຍັງບໍ່ທັນກວ້າງ ຂວາງ ແລະ ມາດຕະການອື່ນໆ ເຊັ່ນ: ການປ້ອງກັນພືດ, ສຸຂະນາໄມພືດ ເພື່ອສະໜັບສະໜູນກະສິກໍາສະອາດຂອງ ສປປ ລາວ ໃຫ້ເຂົ້າເຖິງຕະຫຼາດພາກພື້ນ ແລະ ສາກົນໃຫ້ຫຼາຍຂຶ້ນ.

ສະນັ້ນ, ໂຄງການນີ້ເປັນການຮ່ວມມືລະດັບພາກພື້ນອາ ຊຽນ – ເຢຍລະມັນ ແນໃສ່ພັດທະນາເຄື່ອງມືມະຫາພາກ ເພື່ອປັບປຸງຄຸນນະພາບ ແລະ ຄວາມຍືນຍົງໃນຕ່ອງໂສ້ການຜະລິດກະສິກຳໃນອາຊຽນ ພ້ອມທັງສ້າງເງື່ອນໄຂໃຫ້ທຸກພາກສ່ວນທີ່ກ່ຽວຂ້ອງທັງພາກລັດ ແລະ ເອກະຊົນຮ່ວມມືກັນ, ໂຄງການດັ່ງກ່າວຈະສະໜັບສະໜູນການຈັດຕັ້ງປະຕິບັດມາດຕະຖານການຜະລິດ ແລະ ອໍານວຍຄວາມສະດວກໃນການຮ່ວມມືລະຫວ່າງພາກລັດ ແລະ ເອກະຊົນ.

ທີ່ມາ laoedaily.com.la

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

ຂ່າວເດັ່ນທີ່ຢາກໃຫ້ອ່ານ

ລັດຖະມົນຕີເນັ້ນ: ຜູ້ພັດທະນາໂຄງການເຂື່ອນໄຟຟ້າ ຕ້ອງເພີ່ມທະວີການປະຕິບັດລະບຽບກົດໝາຍ ກ່ຽວກັບການຄຸ້ມຄອງນ້ຳໃນເຂື່ອນ

ໃນໂອກາດກອງປະຊຸມ ຖອດຖອນບົດຮຽນ​ກ່ຽວກັບການບໍລິຫານ​ ຈັດການອ່າງນໍ້າ ການຜະລິດໄຟຟ້າຂອງເຂື່ອນໄຟຟ້າ…