ໜ້າຫຼັກ ຂ່າວເດັ່ນ ດຣາມ່າກຸ້ງມັງກອນ ເປັນພຽງການສື່ສານບໍ່ເຂົ້າໃຈກັນ

ດຣາມ່າກຸ້ງມັງກອນ ເປັນພຽງການສື່ສານບໍ່ເຂົ້າໃຈກັນ

1 ຄົນ ກຳລັງອ່ານຢູ່
0
0
437
Loading...

ຫຼັງເກີດມີກະແສລູກຄ້າຂອງຮ້ານອາຫານມານາແມະໂພສບິນຄ່າອາຫານພ້ອມຈົ່ມວ່າໃຫ້ກັບຮ້ານລົງໃນສື່ສັງຄົມອອນລາຍໂດຍສະເພາະແມ່ນເຟສບຸກເຮັດໃຫ້ສັງຄົມມີຄວາມສົນໃຈ ແລະຕໍ່ວ່າກັນໄປຕ່າງໆນາໆໃນແງ່ທີ່ບໍ່ເປັນຜົນດີຕໍ່ຜູ້ປະກອບການ, ດັ່ງນັ້ນໃນວັນທີ 25 ກໍລະກົດຜ່ານມາທີມຂ່າວໜັງສືພິມເສດຖະກິດ-ສັງຄົມ ໄດ້ລົງສໍາພາດເຈົ້າຂອງຮ້ານອາຫານດັ່ງກ່າວເພື່ອຊອກຮູ້ຂໍ້ຂ້ອງໃຈຂອງສັງຄົມ ແລະຫາງສຽງລູກຄ້າທີ່ບໍ່ພໍໃຈຕໍ່ຄ່າບິນອາຫານ.

ທ່ານ ນາງ ແສງທອງ ທໍາມະວົງ ເຈົ້າຂອງຮ້ານອາຫານມານາແມະໃຫ້ຮູ້ວ່າ: ຮ້ານອາຫານມານາແມະເປີດຂຶ້ນໃນປີ 2019 ເປັນສະຖານທີ່ໃຫ້ການບໍລິການກ່ຽວກັບອາຫານ ແລະເຄື່ອງດື່ມແຫ່ງໃໝ່ໃກ້ຕົວເມືອງທີ່ຕິດພັນກັບທໍາມະຊາດບ້ານນາໃນເນື້ອທີ່ 4 ເຮັກຕາ, ສ້າງຂຶ້ນເພື່ອໃຫ້ທຸກຄົນໄດ້ໃກ້ຊິດກັບທໍາມະຊາດ ແລະເພື່ອໃຫ້ເຍົາ ວະຊົນຄົນຮຸ່ນໃໝ່ໄດ້ຮັບຮູ້ວິຖີຊີວິດຄົນລາວຍຸກເກົ່າ, ປະຈຸບັນພາຍໃນຮ້ານລວມມີ 40 ຕູບ, 2 ສະໂມສອນ, ມີພະນັກງານຫຼາຍກວ່າ 50 ຄົນ, ຈຸດເດັ່ນຂອງຮ້ານແມ່ນເນັ້ນທຳມະຊາດບ້ານນາບວກໃສ່ການບໍລິການ ແລະອາຫານທີ່ເປັນເອກະລັກພື້ນບ້ານສະອາດຖືກຫຼັກອະນາໄມ, ຫຼັງພະຍາດໂຄວິດຜ່ອນຄາຍລົງທາງຮ້ານໄດ້ນໍາເອົາລາຍ ການອາຫານຕ່າງປະເທດເຂົ້າເສີມເຊັ່ນ: ອາຫານຍີ່ປຸ່ນ, ອາຫານໄທ ແລະ ອາຫານທະເລຈໍານວນໜຶ່ງເປັນກຸ້ງມັງກອນ, ປູ ເພື່ອຍົກລະດັບໃຫ້ກັບຮ້ານ, ຊຶ່ງກໍເປັນຕົ້ນ ເຫດເຮັດໃຫ້ມີຫາງສຽງຂອງລູກຄ້າທີ່ບໍ່ພໍໃຈຕໍ່ຄ່າບິນອາຫານ.

ສໍາລັບບັນຫານີ້ເຈົ້າຂອງຮ້ານອາຫານມານາແມະໃຫ້ຮູ້ວ່າ: ບັນຫາດັ່ງກ່າວໄດ້ເກີດຂຶ້ນເມື່ອວັນທີ 19 ກໍລະກົດ 2020 ໂດຍມີລູກຄ້າຈໍານວນໜຶ່ງທີ່ເຂົ້າມາໃຊ້ບໍລິການແລ້ວໂພສຂໍ້ຄວາມບໍ່ພໍໃຈຕໍ່ຄ່າບິນອາຫານລົງໃນເຟສບຸກແລ້ວກາຍເປັນກະແສຮືຮາໃນໂລກໂຊຊຽວມີເດຍຊຶ່ງບັນຫາດັ່ງກ່າວແມ່ນບໍ່ມີມູນຄວາມຈິງເນື່ອງຈາກວ່າຫຼັງຈາກເກີດເຫດແລ້ວທາງຮ້ານບໍ່ໄດ້ນິ້ງນອນໃຈໂດຍຕິດຕໍ່ຫາຜູ້ໂພສທັນທີເພື່ອຈະທໍາຄວາມເຂົ້າໃຈຖ້າຫາກອັນໃດເປັນຄວາມຜິດພາດຂອງຮ້ານທາງຮ້ານຍິນດີທົດແທນຄ່າເສຍ ຫາຍໃຫ້ແຕ່ບໍ່ສາມາດຕິດຕໍ່ໄດ້, ທັງຍັງໃຫ້ພາກສ່ວນກ່ຽວຂ້ອງກໍຄືກໍາລັງ ປກສ ຕິດຕໍ່ຫາເພື່ອໃຫ້ລູກຄ້າແຈ້ງຄວາມໃນກໍລະນີລູກຄ້າບໍ່ໄດ້ຮັບຄວາມຍຸຕິທໍາແຕ່ກໍບໍ່ໄດ້ຮັບການຕອບກັບຈາກລູກຄ້າ; ນອກຈາກນີ້ການຈອງຕູບທາງຮ້ານແມ່ນມີຂໍ້ມູນຄົບຖ້ວນ ແລະມີເວລາຈອງບໍ່ກາຍ 11 ໂມງ ຖ້າກາຍເວລາດັ່ງກ່າວທາງຮ້ານຈະປ່ອຍໃຫ້ບຸກ ຄົນອື່ນ; ສ່ວນບັນຫາທີ່ວ່າອາຫານມີລາຄາແພງກໍເນື່ອງມາຈາກວັດຖຸດິບບາງຢ່າງນໍາເຂົ້າ ແລະມີຕົ້ນທຶນສູງໂດຍສະເພາະແມ່ນກຸ້ງມັງກອນກິໂລລະ 1.500 ບາດ (ສະກຸນເງິນໄທ) ປະມານ 450.000 ກີບ (ແຕ່ໃນຮ້ານມີລາຍການອາຫານໃຫ້ເລືອກຫຼາຍປະເພດແຕ່ລະປະເພດມີລາຄາແຕກຕ່າງກັນ); ແລະ ກໍລະນີວ່າຜູ້ມາຮັບຕູບຕໍ່ຈາກຜູ້ຈອງກ່ອນຫຼາຍຕູບມີລາຍການອາຫານທີ່ຄ້າຍກັນກໍຍ້ອນວ່າເປັນອາຫານແນະນໍາຂອງທາງຮ້ານໃນໄລຍະນີ້ ແລະອາດເກີດການສື່ສານທີ່ບໍ່ລະອຽດລະຫວ່າງພະນັກງານກັບລູກຄ້າ; ສໍາລັບປະເດັນທີ່ວ່າລູກຄ້າບໍ່ໄດ້ສັ່ງແຕ່ໄດ້ຮັບອາຫານແມ່ນບໍ່ມີມູນຄວາມຈິງເພາະວ່າທຸກຄັ້ງທີ່ຈະເຂົ້າໃຊ້ບໍລິການລູກຄ້າ ແລະເຈົ້າຂອງຮ້ານແມ່ນຕົກລົງລະອຽດຢ່າງຈະແຈ້ງແລ້ວຈຶ່ງສາມາດເຂົ້າໃຊ້ບໍລິການຂອງທາງຮ້ານໄດ້; ສ່ວນກໍລະນີວ່າຮ້ານອາຫານກັກຕູບເພື່ອຂາຍອາຫານເອົາປຽບລູກຄ້າຜ່ານການລົງຕິດ ຕາມຂອງຫ້ອງການຖະແຫຼງຂ່າວວັດທະນະທໍາ ແລະ ທ່ອງທ່ຽວເມືອງໄຊທານີແມ່ນເຫັນວ່າບໍ່ມີຄວາມຈິງ ແລະ ເຈົ້າຂອງຮ້ານກໍຊີ້ແຈງວ່າບໍ່ມີຄວາມຈໍາເປັນທີ່ຈະເຮັດ ເພາະແຕ່ລະມື້ຈໍານວນຕູບແມ່ນບໍ່ພຽງພໍໃຫ້ກັບລູກຄ້າ.

ທ່ານ ນາງ ແສງທອງ ທໍາມະວົງ ກ່າວຕື່ມວ່າ: ບັນຫາດັ່ງກ່າວໄດ້ສ້າງຄວາມເສຍໃຫ້ກັບຮ້ານໜັກຊຶ່ງບໍ່ສາມາດທີ່ຈະສະເລ່ຍເປັນມູນຄ່າໄດ້, ແຕ່ແນວໃດກໍຕາມທາງຮ້ານຈະເອົາໃຈໃສ່ສຶກສາອົບຮົມພະນັກງານບໍລິການໃຫ້ມີຄວາມລະອຽດໃນການສື່ສານລູກຄ້າກວ່າເກົ່າຖ້າມີກໍລະນີລູກຄ້າມາຮັບຕູບຕໍ່ຈາກຜູ້ຈອງກ່ອນທາງຮ້ານຈະແຈ້ງລາຄາອາຫານທີ່ລູກຄ້າແຈ້ງໄວ້ໃຫ້ລະອຽດຖ້າລູກຄ້າເຫັນດີຈຶ່ງສາມາດເຂົ້າໃຊ້ບໍລິການໄດ້ ແລະໃນຕໍ່ໜ້າທາງຮ້ານຈະສ້າງສວນນໍ້າ, ລ້ຽງປາ ແລະນໍາເອົາຄວາຍເຂົ້າມາໄຖນາເພື່ອໃຫ້ໄວໜຸ່ມເຍົາວະຊົນຄົນຮຸ່ນໃໝ່ໄດ້ຮັບຮູ້ວິຖີຊີວິດຂອງຄົນລາວຮຸ່ນເກົ່າ,ຊຶ່ງທ່ານໃດສົນໃຈສາມາດທ່ຽວຊົມໄດ້ທີ່ຮ້ານອາຫານມານາແມະສະຖານທີ່ຕັ້ງຢູ່ບ້ານດອນຕິ້ວ ເມືອງໄຊທານີ ນະຄອນຫຼວງວຽງຈັນ.

ຂຽນໂດຍ: ກິ່ງລັດຕະນະ ໜັງສືພິມເສດຖະກິດ-ສັງຄົມ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

ຂ່າວເດັ່ນທີ່ຢາກໃຫ້ອ່ານ

ດ່ວນ!!!ເກີດເຫດລະເບີດໃຫຍ່ຢູ່ນະຄອນ ເບຣຸດ​ ປະເທດເລບານອນ

ວັນທີ​ 5​ ສິງຫາ​ ນີ້ເກີດການລະເບີດຢ່າງແຮງ ປານນິວເຄຼຍ ກຸ່ມຄັວນຂະໜາດຍັກ ພຸ່ງຂຶ້ນທ້ອງຟ້າເປັນດອ…