ໜ້າຫຼັກ ການສືກສາ ພຶດຕິກຳເດັກນ້ອຍ ທີ່ຜູ້ໃຫຍ່ຕ້ອງຄິດ

ພຶດຕິກຳເດັກນ້ອຍ ທີ່ຜູ້ໃຫຍ່ຕ້ອງຄິດ

0 ຄົນ ກຳລັງອ່ານຢູ່
0
0
431
Loading...

ບັນຫາສັງຄົມທີ່ເບິ່ງເປັນຕາແກ້ໄຂໄດ້ ແຕ່ແກ້ບໍ່ໄດ້ຈັກເທື່ອ ແມ່ນພຶດຕິກຳທີ່ຂາດຄວາມຄິດຕຶກຕອງວ່າອັນໃດຄວນອັນໃດບໍ່ຄວນຂອງເດັກນ້ອຍລູກຫຼານ ທີ່ເປັນຜູ້ກຳຊະຕາກຳຂອງປະເທດຊາດຂອງພວກເຮົາ.

ໄລຍະບໍ່ທໍ່ໃດມື້ມານີ້ 2 ຂ່າວດັງ ທີ່ເພື່ອນຜູ້ອ່ານກໍຄົງໄດ້ເຫັນນຳກັນ 1.ແມ່ນມີຫຼາຍເຂດແຂວງ ໄດ້ອອກແຈ້ງການໃຫ້ຮ້ານກິນດື່ມປິດໃນມື້ນັກຮຽນສອບເສັງ ແລະ 2. ແມ່ນວິດີໂອສັ້ນທີ່ມີເດັກໄວລຸ້ນ 3 ຄົນ ພາກັນດຶກແກ້ວເບຍລົງນ້ຳຕົກຕາດທຳມະຊາດແຫ່ງໜຶ່ງ.

ຂ່າວທີ 1 ຫຼາຍຄົນທີ່ອ່ານຂ່າວແລ້ວ ກ່າວຍ້ອງຍໍຊົມເຊີຍ ຢາກໃຫ້ເຮັດແນວນັ້ນໄປທົ່ວປະເທດ ເພື່ອບໍ່ໃຫ້ພວກນັກຮຽນພາກັນໄປມົ້ວສຸມໃນມື້ເສັງຈົບຊັ້ນ.

ຂ່າວທີ 2 ເກືອບວ່າ 99% ລ້ວນແຕ່ເຫັນວ່າເປັນພຶດຕິກຳທີ່ບໍ່ດີ ແລະຮຽກຮ້ອງໃຫ້ນຳເອົາເດັກນ້ອຍຈຳນວນດັ່ງກ່າວນັ້ນມາສຶກສາອົບຮົມ ຫຼືລົງໂທດ.

ເພື່ອນຜູ້ອ່ານທີ່ເຄົາລົບ, ທີ່ເຮົາເຫັນຂ່າວດັ່ງກ່າວຂ້າງເທິງນັ້ນ ມັນເປັນພຽງປາຍເຫດ ຫຼືເປັນຜົນທີ່ໄດ້ຮັບຈາກລະບົບການບໍລິຫານສັງຄົມຂອງພວກເຮົາ. ເປັນຫຍັງເຍົາວະຊົນຂອງເຮົາຈຶ່ງບໍ່ຮູ້ກາລະເທສະ, ບໍ່ຮູ້ອັນຄວນຫຼືບໍ່ຄວນ? ເປັນຫຍັງນັກຮຽນຮູ້ປັນຍາຊົນ ທີ່ເປັນອະນາຄົດຂອງຊາດເຮົາ ຈຶ່ງບໍ່ມີຈິດສຳນຶກທີ່ດີ ບໍ່ມີຫົວຄິດໄຈ້ແຍກອັນໃດຖືກອັນໃດບໍ່ຖືກ? ແລະແມ່ນໃຜຈະໃຫ້ຄຳຕອບນີ້ໄດ້?

ຜູ້ຂຽນກໍບໍ່ຮູ້ວ່າໃນໂລກນີ້ ມີປະເທດໃດບໍທີ່ອະນຸຍາດໃຫ້ຈັດງານລ້ຽງໃນໂຮງຮຽນໂດຍມີເຫຼົ້າເບຍຫຼືເຄື່ອງດື່ມມືນເມົາເປັນອົງປະກອບຫຼັກຄືກັບປະເທດລາວ? ງານບຸນປີໃໝ່ລາວ, ງານແຂ່ງຂັນກິລາ, ງານລ້ຽງຕ້ອນຮັບ, ງານລ້ຽງສົ່ງ, ງານວັນຄູ ແລະອື່ນໆ ທີ່ຈັດຂຶ້ນໃນໂຮງຮຽນ ເຮົາຍັງບໍ່ສາມາດງົດເຫຼົ້າງົດເບຍໄດ້ແລ້ວ ມັນກໍເປັນເລື່ອງຍາກທີ່ຈະຫ້າມນັກຮຽນດື່ມເຫຼົ້າດື່ມເບຍໃນໂອກາດຕ່າງໆ ເຊັ່ນ ວັນສອບເສັງຈົບຊັ້ນເປັນຕົ້ນ.

ລັດຖະບານ ໂດຍສະເພາະກະຊວງສຶກສາເປັນຫຼັກ ທີ່ຕ້ອງສະແດງຄວາມຮັບຜິດຊອບຕໍ່ພຶດຕິກຳຂອງເຂົາເຈົ້າ ເພາະກະຊວງສຶກສາມີໜ້າທີ່ໂດຍກົງໃນການສຶກສາອົບຮົມແລະປູກຈິດສຳນຶກທີ່ຖືກຕ້ອງແກ່ເຍົາວະຊົນຂອງເຮົາ. ຄົນເຮົາຖ້າໄດ້ຮັບການສຶກສາອົບຮົມມາດີ, ໄດ້ຮັບການເຝິກຝົນຫຼໍ່ຫຼອມມາດີ ຫຼືໄດ້ຮັບການສັ່ງສອນມາດີ ກໍຍ່ອມຄິດໄດ້ລະນຶກໄດ້ວ່າອັນໃດຄວນບໍ່ຄວນ, ຍ່ອມລະນຶກໄດ້ວ່າການດື່ມສຸລາໃນເກນອາຍຸບໍ່ເຖິງ 18 ເປັນອັນຕະລາຍຮ້າຍແຮງ, ການນຸ່ງເຄື່ອງແບບນັ່ງດື່ມສຸລາເປັນເລື່ອງທີ່ໜ້າອາຍ, ການຖິ້ມຂີ້ເຫຍື້ອຊະຊາຍເປັນເລື່ອງເສຍມາລະຍາດແລະທຳລາຍສິ່ງແວດລ້ອມ ແລະອື່ນໆ

ຢູ່ໂຮງຮຽນເຮົາໄດ້ສອນເຂົາເຈົ້າແນວໃດ? ລະບຽບວິໄນ, ສິນທຳ, ຄຸນນະທຳ, ຈັນຍາທຳ, ຈັນຍາບັນ, ກິລິຍາມາລະຍາດ, ນິດໄສໃຈຄໍ, ຄວາມມີນ້ຳໃຈ, ຄວາມຍຸດຕິທຳ, ຄວາມເປັນທຳ ຕ່າງໆ ເຫຼົ່ານີ້ ເຮົາໄດ້ສອນເຂົາເຈົ້າຫຼາຍພໍແລ້ວບໍ? ຫຼືເລັ່ງໃສ່ແຕ່ລະບຽບນຸ່ງເຄື່ອງຂາວແລະຕັດຜົມສັ້ນເທົ່ານັ້ນ.

ຜູ້ຂຽນຄິດວ່າ ເຖິງເວລາທີ່ຜູ້ໃຫຍ່ຕ້ອງຄິດໄດ້ແລ້ວ, ຢ່າຖິ້ມໂທດໃສ່ແຕ່ນັກຮຽນຫຼາຍ, ຢ່າຮ້າຍດ່າແຕ່ຊາວໜຸ່ມເຍົາວະຊົນຫຼາຍ… ແຕ່ຕ້ອງຫັນມາເບິ່ງໂຕຜູ້ໃຫຍ່ເຮົາເອງແດ່ວ່າ ເຮົາໄດ້ກໍ່ສ້າງເຂົາເຈົ້າດີພໍຫຼືຍັງ ແລະໄດ້ເປັນແບບຢ່າງທີ່ດີແກ່ເຂົາເຈົ້າແລ້ວຫຼືຍັງ?.

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

ຂ່າວເດັ່ນທີ່ຢາກໃຫ້ອ່ານ

ດ່ວນ​! ກະຊວງສຶກສາທິການ ແລະ ກິລາ ອອກແຈ້ງການ ກຳນົດວິຊາເລືອກສອບເສັງ ມ.7

ກະຊວງສຶກສາທິການ ແລະ ກິລາ ອອກແຈ້ງການ ກຳນົດວິຊາເລືອກສອບເສັງ ມ.7 ການສົ່ງຫົວບົດສອບເສັງຈົບຊັ້ນມ…