ໜ້າຫຼັກ ບັນເທີງ ຈົບປະລິນຍາ​ຢ່າວ່າເກັ່ງກວ່າຈົບ​ປ.2

ຈົບປະລິນຍາ​ຢ່າວ່າເກັ່ງກວ່າຈົບ​ປ.2

1 ຄົນ ກຳລັງອ່ານຢູ່
0
0
144
Loading...

ສົມສັກ: ສະບາຍດີສ່ຽວ ສົມມຸດ ເປັນຈັ່ງໃດເຫັນຫົວຂໍ້ແລ້ວ ຄືມາວ່າແປກແທ້ລະ ?

ສົມມຸດ: ບໍ່ແປກ, ຄວາມຈິງ !!!

ສົມສັກ: ຄັນຈົບ ປ2 ເກັ່ງເທົ່າກັນກັບປະລິນຍາແລ້ວຈະມາຫາຮຽນໃຫ້ເສຍເວລາເຮັດຫຍັງ, ຮຽນຈົບ ປ2 ແລ້ວກໍເຊົາຕີ !!!

ສົມມຸດ: ໂຕບໍ່ເຂົ້າໃຈ ຄົນຊິເກັ່ງມັນບໍ່ຂຶ້ນກັບຊິຮຽນສູງປານໃດດອກ, ຮຽນສ່ຳໃດສ່ຳໜຶ່ງມັນກໍພໍແລ້ວ, ນອກຈາກນັ້ນກໍຊອກຮູ້ຫາຮຽນເອົາເອງຊັ້ນຕົວ !

ສົມສັກ: ໂຕນີ້ມັກຄິດແລະເວົ້າບໍ່ຄືໝູ່ເດີ, ທັງບ້ານທັງເມືອງ ຫຼືທັງໂລກນີ້ເຂົາລະສົ່ງເສີມໃຫ້ຄົນຮ່ຳຮຽນໃຫ້ຈົບສູງໆ ທັງນັ້ນ ແຕ່ໂຕພັດມາສະແດງຄວາມຄິດທີ່ມີລັກສະນະກົງກັນຂ້າມກັບຄວາມເປັນຈິງຂອງສັງຄົມມະນຸດຫຼາຍ.

ສົມມຸດ: ເອີ! ເຮົາຍອມຮັບວ່າເຮົາບໍ່ຄືໝູ່ ແທ້ໆ ໃນບາງເລື່ອງ, ຄັນຄິດຄືກັນຫຼາຍໂລກນີ້ຊິບໍ່ຈະເລີນເດີເຮົາວ່າ !

ສົມສັກ: ອ້າວ, ເມື່ອຄົນເຮົາມີຈິດໜຶ່ງໃຈດຽວກັນ ຮ່ວມກັນເຮັດ ຮ່ວມກັນສ້າງ ເຂົາກໍເອີ້ນວ່າ ຄວາມສາມັກຄີ, ແລ້ວຄວາມສາມັກຄີຢູ່ບ່ອນໃດ ຄວາມສຳເລັດຢູ່ບ່ອນນັ້ນ, ປະເທດຊາດບ້ານເມືອງເຮົາມີຄວາມຈະເລີນຮຸ່ງເຮືອງມາຮອດຊູ່ມື້ນີ້ ກໍຍ້ອນຄວາມສາມັກຄີ ບໍ່ແມ່ນຫວ໋າ ?

ສົມມຸດ: ໂຕເຂົ້າໃຈຜິດແລ້ວ, ຄວາມສາມັກຄີບໍ່ແມ່ນຄວາມທີ່ຄົນຄິດຄືກັນເດີສ່ຽວ, ຄວາມສາມັກຄີນັ້ນສາມາດຄິດຕ່າງກັນໄດ້ ແຕ່ວ່າໃຫ້ຢູ່ເທິງຫຼັກການທີ່ຖືກຕ້ອງ ແລະຕ້ອງຍອມຮັບທາງເລືອກໜຶ່ງທີ່ດີແລະມີຫຼາຍຄົນຮັບໄດ້ (ຫຼືວ່າມີຫຍັງກໍປຸ້ມລຸມເຮັດຊ່ວຍກັນ) ຈັ່ງຊີ້ເອີ້ນວ່າສາມັກຄີ.

ສົມສັກ: ແລ້ວການຄິດຕ່າງຂອງໂຕນັ້ນ ຖ້າຄົນອື່ນບໍ່ເຫັນດີນຳມັນກໍມີປະໂຫຍດຢູ່ຫວ໋າ ?

ສົມມຸດ: ແລ້ວແຕ່ຄົນເບິ່ງ ຄັນບໍ່ຢຶດຕິດກັບສິ່ງໃດໜຶ່ງເກີນໄປ ຫຼືບໍ່ຖືຄຳພີຕາຍໂຕຫຼາຍກໍອາດຈະມີຄວາມໝາຍຢູ່. ເວົ້າບໍ່ເຊື່ອໃຫ້ບັນດິດທີ່ຮຽນຈົບວິຊາກະເສດ ໄດ້ໃບປະກາດປະລິນຍາ ໄປເຮັດນາແຂ່ງກັບພໍ່ຂ້ອຍເບິ່ງແມ໋ ເຈົ້າວ່າແມ່ນໃດຊິເກັ່ງກວ່າ. ໂຕຮູ້ບໍແມ່ນໃຜເປັນຜູ້ປະດິດໄຟຟ້າໃຫ້ເຮົາໄດ້ໃຊ້ຊູ່ມື້ນີ້ ?

ສົມສັກ: ບໍ່ຮູ້ ! ໂຕຮູ້ຫວ໋າລະ ?

ສົມມຸດ: ຄັນບໍ່ຮູ້ຊິເວົ້າສູ່ຟັງ ຄົນຜູ້ນີ້ຊື່ ໄມເຄີນ ຟາຣາເດ ເຂົາຮຽນບໍ່ຈົບປະຖົມຊ້ຳຍ້ອນຫຼາຍສາເຫດ ເປັນຕົ້ນແມ່ນເຂົາຄິດບໍ່ຄືໝູ່, ຕອບບົດຮຽນບໍ່ຄືໝູ່… ພໍ່ຂອງລາວເປັນຊ່າງຕີເຫຼັກ. ແຕ່ເປັນຫຍັງລາວຈຶ່ງເປັນຜູ້ປະດິດໄຟຟ້າຜູ້ທຳອິດຂອງໂລກໄດ້ ? ກໍຍ້ອນວ່າພາຍຫຼັງທີ່ລາວອອກໂຮງຮຽນ ໃນຕອນອາຍຸ 13 ປີ ແລ້ວລາວໄປສະໝັກເປັນຄົນສົ່ງໜັງສືພິມ. ລາວບໍ່ສົ່ງໜັງສືພິມຊື່ໆ ແຕ່ລາວອ່ານພ້ອມ, ລາວມີໂອກາດໄດ້ອ່ານບົດຂອງບັນດານັກວິທະຍາສາດຕ່າງໆ ຫຼາຍຄົນ ເຮັດໃຫ້ລາວຫັ້ນເກີດມີຄວາມຮູ້ຫຼາຍໃນດ້ານຟິຊິກ ແລະເຄມີ.

ສົມສັກ: ລາວເຮັດຫຍັງໄດ້ແດ່ ?

ສົມມຸດ: ລາວປະດິດໄດ້ຫຼາຍຢ່າງ ບໍ່ວ່າຈະ ຄົ້ນພົບສົມບັດຂອງແມ່ເຫຼັກທີ່ເຮັດໃຫ້ເກີດໄຟຟ້າ, ປະດິດເຄື່ອງກຳເນີດໄຟຟ້າ (Dynamo), ເອົາເຫຼັກມາປະສົມກັບນິກແກນ ເອີ້ນວ່າສະແຕນເລດ ເຊິ່ງໜຽວແລະບໍ່ເຂົ້າໝ້ຽງ, ຄົ້ນພົບສານປະກອບເບນຊິນ (Benzene), ບັນຍັດສັບທາງວິທະຍາສາດຫຼາຍຄຳ ເຊັ່ນ ໄອອອນ, ອິເລັກໂຕຣ, ຄາໂທດ, ແອໂນດ ເປັນຕົ້ນ.

ສົມສັກ: ໂອ ຄັນບໍ່ຈົບປະຖົມລະເກັ່ງປານນີ້ ມັນກໍເກັ່ງກວ່າປະລິນຫຼາຍຄົນຢູ່ຊັ້ນນະ !

ສົມມຸດ: ກໍແນ່ນອນ, ແຕ່ກໍບໍ່ໝາຍຄວາມວ່າຮຽນສູງບໍ່ດີ, ຮຽນຫຼາຍໆ ຈົບສູງໆ ມັນກໍດີຫັ້ນລະ!. ແຕ່ສິ່ງສຳຄັນກວ່ານັ້ນແມ່ນຕ້ອງເປັນຄົນດີ, ເປັນຄົນດຸໝັ່ນ, ມີຄວາມຄິດສ້າງສັນສິ່ງໃໝ່ໆ ບໍ່ແມ່ນເວລາຫົວໜ້າສັ່ງວຽກລະເຮັດໄດ້ດີ ແຕ່ບາດໃຫ້ເປັນຫົວໜ້າລະຄິດຫຍັງບໍ່ອອກ ຈັ່ງຊີ້ເຂົາເອີ້ນວ່າຄົນບໍ່ມີຫົວຄິດປະດິດສ້າງ.

ໂດຍ: ສົມສັກ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

ຂ່າວເດັ່ນທີ່ຢາກໃຫ້ອ່ານ

ນ້ຳຕົກຕາດຫານແຈະ ສະຫວັນກາງດົງ ຂອງນັກປະຈົນໄພ

ນ້ຳຕົກຕາດຫານແຈະ ເປັນອີກໜຶ່ງສະຖານທີ່ ທີ່ຫຼາຍຄົນເຫັນພາບແລ້ວຢາກຈະໄປສຳພັດດ້ວຍຕົນເອງ ເນື່ອງຈາກເ…