Home ຂ່າວຕ່າງປະເທດ ຄັ້ງທຳອິດຂອງໂລກ! ອິດສະຣາເອລ ຜະລິດຫົວໃຈທຽມຈາກເຄື່ອງພິມ 3 ມິຕິ

ຄັ້ງທຳອິດຂອງໂລກ! ອິດສະຣາເອລ ຜະລິດຫົວໃຈທຽມຈາກເຄື່ອງພິມ 3 ມິຕິ

10 second read
0
0
34
ຄັ້ງທຳອິດຂອງໂລກ! ອິດສະຣາເອລ ຜະລິດຫົວໃຈທຽມຈາກເຄື່ອງພິມ 3 ມິຕິ
Loading...

ທີມນັກວິທະຍາສາດອິດສະຣາເອລ ຜະລິດຫົວໃຈດ້ວຍເຄື່ອງພິມ 3 ມິຕິ ທີ່ໃຊ້ຊິ້ນສ່ວນເນື້ອເຍື່ອຂອງມະນຸດໃນການສ້າງຫົວໃຈຂຶ້ນມາໃໝ່ ເພື່ອເປັນການເປີດທາງໃນການປິ່ນປົວຄົນເຈັບທີ່ຕ້ອງການປ່ຽນຫົວໃຈໃນອະນາຄົດ.

ຄວາມກ້າວໜ້າທາງດ້ານການແພດຄັ້ງໃໝ່ ທີ່ຖືກຕີພິມໃນວາລະສານ Advanced Science ເຜີຍໃຫ້ເຫັນຮູບພາບຫົວໃຈຂະໜາດ 2.5 ຊັງຕີແມັນ, ຂະໜາດນ້ອຍເທົ່າກັບຫົວໃຈຂອງກະຕ່າຍ ແຕ່ມີໂຄງສ້າງທີ່ໃກ້ຄຽງກັບຫົວໃຈແທ້ທັງໝົດ ໂດຍຖືກພິມຂຶ້ນມາດ້ວຍເຄື່ອງພິມ 3 ມິຕິ.

ອາຈານ Tal Dvir ຫົວໜ້າທີມນັກວິທະຍາສາດ ຈາກມະຫາວິທະຍາໄລ Tel Aviv University ຖະແຫຼງຂ່າວຄວາມສຳເລັດເມື່ອວັນຈັນທີ 16 ເມສາ ທີ່ຜ່ານມາ ໂດຍອະທິບາຍວ່າ ສິ່ງນີ້ຖືເປັນຄວາມກ້າວໜ້າທາງດ້ານການແພດຄັ້ງສຳຄັນ ເພາະເປັນຫົວໃຈຈາກເຄື່ອງພິມ 3 ມິຕິທີ່ຜະລິດຈາກເຊວຂອງມະນຸດ ແລະ ມີໂຄງສ້າງຫ້ອງຫົວໃຈ ແລະ ຫຼອດເລືອດທີ່ໃກ້ຄຽງກັບຫົວໃຈແທ້ທັງໝົດ.

ອາຈານ Dvir ກ່າວວ່າ ຈຸດເດັ່ນຂອງຫົວໃຈຈາກເຄື່ອງພິມ 3 ມິຕິແບບນີ້ ແມ່ນເລີ່ມຈາກການນຳເອົາຊິ້ນສ່ວນເຊວເນື້ອເຍື່ອໄຂມັນ ຫຼື Fatty Tissue ຂອງຄົນເຈັບ ມາແຍກສ່ວນທີ່ແມ່ນເຊວ ແລະ ສ່ວນທີ່ບໍ່ແມ່ນເຊວ ເຊັ່ນ ຄໍລາເຈັນ ເພື່ອໃຊ້ເປັນນໍ້າໝຶກຊີວະພາບສຳລັບສ້າງເປັນຮູບຫົວໃຈໃນເຄື່ອງພິມ 3 ມິຕິ ແລະ ປັບແຕ່ງເຊວໃຫ້ກາຍເປັນສະເຕັມເຊວເພື່ອພັດທະນາເປັນເຊວຫົວໃຈໜ່ວຍໃໝ່.

ສຳລັບຫົວໃຈກະຕ່າຍຂະໜາດ 2.5 ຊັງຕີແມັດນີ້ ໃຊ້ເວລາພຽງບໍ່ເທົ່າໃດຊົ່ວໂມງໃນການພິມຂຶ້ນມາ, ແຕ່ສຳລັບຫົວໃຈມະນຸດແມ່ນຕ້ອງໃຊ້ເວລາຢ່າງໜ້ອຍ 1 ມື້ ແລະ ຕ້ອງໃຊ້ເຊວຫຼາຍພັນລ້ານເຊວສຳລັບຫົວໃຈພຽງໜ່ວຍດຽວ.

ຢ່າງໃດກໍຕາມ ຫົວໜ້າທີມນັກວິທະຍາສາດ ຈາກມະຫາວິທະຍາໄລ Tel Aviv University ອະທິບາຍເພີ່ມຕື່ມວ່າ ຕ້ອງໃຊ້ເວລາຢ່າງໜ້ອຍ 1 ເດືອນໃຫ້ຫົວໃຈເຕີບໃຫຍ່ພຽງພໍທີ່ຈະເລີ່ມເຕັ້ນຄືກັບຫົວໃຈປົກກະຕິ ໂດຍໃນຂັ້ນຕອນນີ້ທີມນັກວິໄຈໄດ້ກຽມທົດສອບປ່ຽນຫົວໃຈ 3 ມິຕິນີ້ໃນສັດ ແລະ ຄາດວ່າຈະທົດສອບໃນມະນຸດໄດ້ໃນເວລາຕໍ່ໄປ.

ໃນຂະນະທີ່ຕອນນີ້ຍັງບໍ່ມີຄວາມຊັດເຈນວ່າ ເຄື່ອງພິມ 3​ ມິຕິນີ້ຈະສາມາດສ້າງຫົວໃຈທຽມທີ່ເຮັດວຽກໄດ້ດີກວ່າຫົວໃຈທຳມະຊາດໄດ້ຫຼືບໍ່, ແຕ່ປະໂຫຍດຢ່າງໜຶ່ງທີ່ເຫັນໄດ້ຊັດເຈນກໍຄື ຊິ້ນສ່ວນທີ່ສ້າງຂຶ້ນຈາກເຄື່ອງພິມ 3 ມິຕິນີ້ ສາມາດທົດແທນ ຫຼື ໃຊ້ປິ່ນປົວຊິ້ນສ່ວນຂອງຫົວໃຈທີ່ເປັນພະຍາດ ຫຼື ເສຍຫາຍໄດ້.

ທີມນັກວິທະຍາສາດຈາກມະຫາວິທະຍາໄລ Tel Aviv University ຕັ້ງເປົ້າໝາຍໄວ້ວ່າ ພາຍໃນ 10 ປີ ໂຮງໝໍຂະໜາດໃຫຍ່ທີ່ທັນສະໄໝທົ່ວໂລກ ຈະມີເຄື່ອງພິມ 3 ມິຕິ ທີ່ສ້າງອະໄວຍະວະທົດແທນໃຫ້ກັບມະນຸດໄດ້.

ທີ່ມາຂ່າວ ມ່ວນ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Check Also

ປະຊາຊົນອິນເດຍ 1 ລ້ານກວ່າຄົນໄດ້ຮັບຜົນກະທົບຈາກນ້ຳຖ້ວມ

ຕາມ​ຂ່າວ​ຈາກ​ ທາງ​ການ​ອິນ​ເດຍ, ວັນ​ທີ 29ມິຖຸນາ, ປະຊາຊົນ ​ອິນ​ເດຍ 1 ລ້ານ​ກວ່າ​ຄົນ ບໍ່​ມີ​ທີ…