ໜ້າຫຼັກ ນານາສາລະ ປະຫວັດສາດ ພຣະທາດສີສອງຮັກ​ ສັນຍາຮັກສອງກະສັດລາວ-ໄທ

ພຣະທາດສີສອງຮັກ​ ສັນຍາຮັກສອງກະສັດລາວ-ໄທ

0 ຄົນ ກຳລັງອ່ານຢູ່
0
0
1,408
Loading...

ໃນຂະນະທີ່ພະເຈົ້າເມືອງຫົງສາວະດີກຳລັງປາບປາມເສີກທີ່ທາງເມືອງຣາມັນຢູ່ ພະເຈົ້າໄຊຍະເຊດຖາທິລາດມີແນວຄິດທີ່ຈະຜູກສາຍສຳພັນໄມຕີກັບພະເຈົ້າກຸງສີອະຍຸທທະຍາ ເພື່ອຈະໄດ້ຮ່ວມກຳລັງກັນຕໍ່ຕ້ານພະມ້າເຊິ່ງເປັນຂ້າເສິກ ຈຶ່ງໄດ້ພ້ອມກັນເຮັດພິທີປັກປັນເຂດແດນກັນຂຶ້ນ ແລະຊົງຮ່ວມກັນ ສາບານຕໍ່ກັນໄວ້ວ່າ ຈະບໍ່ຮຸກຮານເຊິ່ງກັນແລະກັນ ແລະເພື່ອເປັນສັກຂີພິຍານໃນການນີ້ຈຶ່ງໄດ້ພ້ອມກັນສ້າງທາດອົງຫນຶ່ງຂຶ້ນ ເພື່ອໃຫ້ເປັນສູນກາງແຫ່ງຫຼັກສັດທຳລະຫວ່າງສອງອານາຈັກຂຶ້ນ ເຊິ່ງປະຈຸບັນພຣະທາດນີ້ຢູ່ລະຫວ່າງປາກນ້ຳອູ້ (ນ້ຳອູ້ ເປັນລຳນ້ຳນ້ອຍໆ ເກີດຈາກພູນ້ຳລາງ ເຊິ່ງຢູ່ລະຫວ່າງເຂດແດນອຳເພີນະຄອນໄທ ຈັງຫວັດພິດສະນຸໂລກ ກັບເຂດແດນອຳເພີດ່ານຊ້າຍ ຈັງຫວັດເລີຍ) ແລະນ້ຳອູ້ໄຫຼມາຕົກນ້ຳໝັນ ຫ່າງຈາກຕົວເມືອງດ່ານຊ້າຍປະມານ 50 ເສັ້ນ ປີ ພສ 2103 ແລະສ້າງແລ້ວໃນປີກຸນ ພສ 2106 ເດືອນ 6 ຂຶ້ນ 14 ຄ່ຳ ໂດຍມີຖານພື້ນຂະໜາດສີ່ລ່ຽມຈະຕຸລັດ ດ້ານລະ 8 ແມັດ ມີຍອດສູງ 28 ແມັດ ສ້າງດ້ວຍດິນຈີ່ໂບກດ້ວຍປະທາຍເພັດ ໂດຍມີການຕັ້ງຊື່ວ່າ : ພຣະເຈດີສີສອງຮັກ (ສີ=ມາຈາກ ສີສັຕຕະນະຫຸດ…. ແລະສີອະຍຸທທະຍາ… ສອງ= ມາຈາກສອງອານາຈັກ ແລະຮັກ = ໝາຍຄວາມວ່າສ້າງຂຶ້ນເພື່ອເປັນສັກຂີພະຍານໃນຄວາມຮັກຂອງສອງອານາຈັກ)


ຫຼັງຈາກທີ່ສ້າງພຣະທາດສີສອງຮັກແລ້ວບໍ່ດົນ ເພື່ອຈະຜູກສັມພັນໄມຕີກັບກຸງສີອະຍຸທທະຍາໃຫ້ແໜ້ນແຟ້ນຍິ່ງຂຶ້ນ ພະເຈົ້າໄຊຍະເຊດຖາທິລາດຈຶ່ງໄດ້ມີ ສານຂໍພຣະເທບກະສັດຕີ ພຣະລາຊະທິດາອົງທີ່ສອງ ຂອງສົມເດັດພຣະມະຫາຈັກກະພັດ ເຊິ່ງປະສູດກັບສົມເດັດສີສຸລິໂຍໄທໄປເປັນມະເຫສີ ໂດຍໃຫ້ລາຊະທູດນຳລາຊະສານພ້ອມດ້ວຍເຄື່ອງບັນນາການນຳໄປຖວາຍສົມເດັດພຣະມະຫາຈັກກະພັດ ທີ່ກຸງສີອະຍຸທທະຍາ ໃນປາຍປີ ພສ 2106
ເມື່ອສົມເດັດພຣະມະຫາຈັກກະພັດໄດ້ຮັບພຣະລາຊະສານແລ້ວ ໂປຣດໃຫ້ປະຊຸມບັນດາເສນາອາມາດຜູ້ໃຫຍ່ເພື່ອປືກສາຫາລືກັນ ແລະບັນດາເສນາອາມາດເຫັນພ້ອມກັນວ່າ ສົມຄວນທີ່ຈະເປັນລາຊະໄມຕີດ້ວຍ ເພາະຫາກວ່າມີພະມ້າຂ້າເສີກບຸກມາເຖິງບ້ານເມືອງ ກໍ່ຈະໄດ້ເປັນກຳລັງຊ່ວຍກັນຕໍ່ຕ້ານ ສົມເດັດພຣະມະຫາຈັກກະພັດຊົງເຫັນຊອບດ້ວຍ ຈຶ່ງຊົງດຳຣັດໃຫ້ມີພຣະລາຊະສານເຖິງພຣະເຈົ້າໄຊຍະເຊດຖາທິລາດ
ຝ່າຍພຣະເຈົ້າໄຊຍະເຊດຖາທິລາດເມື່ອໄດ້ຮັບສານຕອບແລ້ວ ກໍ່ດີພຣະໄທ ຈຶ່ງໄດ້ຈັດແຕ່ງທຸຕານຸທູດພ້ອມດ້ວຍພະຍາເຖົ້າແກ່ ຈຳນວນ 500 ຄົນ ລົງໄປກຸງສີອະຍຸທທະຍາ ແຕ່ບັງເອີນພຣະເທບກະສັດຕີ ກຳລັງປະຊວນຫນັກ ສົມເດັດພຣະມະຫາຈັກກະພັດ ຈຶ່ງຍົກນາງແກ້ວຟ້າ ລາຊະະທິດາອີກອົງຫນຶ່ງໄປແທນພຣະເທບກະສັດຕີ ພ້ອມດ້ວຍເຄື່ອງລາຊູປະໂພກ ສຳລັບມະເຫສີນາງສະໜົມແລະຜູ້ຮັບໃຊ້ຊາຍຍິງ ຈຳນວນ 500 ຄົນ ໃຫ້ໄປກັບທູດທີ່ສົ່ງມາ.

ເມື່ອພຣະເຈົ້າໄຊຍະເຊດຖາທິລາດ ຮັບຊາບວ່າ ບໍ່ແມ່ນອົງພຣະເທບກະສັດຕີ ກໍ່ຊົງເສຍພຣະໄທ ຈິ່ງມີພຣະລາຊະສານໃຫ້ທູຕນຳມາຖວາຍ ແລະສົ່ງພຣະນາງແກ້ວຟ້າກັບຄືນ ເຊິ່ງໃນພຣະລາຊະສານມີໃຈຄວາມວ່າ :
ເດີມພຣະອົງໄດ້ປຣະສາທພຣະເທບກະສັດຕີ ໃຫ້ຂ້າພຣະອົງ ກິຕິສັພໄດ້ຮັບຮູ້ໄປແລ້ວທົ່ວ ຕ່າງນິຍົມຊົມຊອບຂອບຂັນສີມາ ບັດນີ້ ພຣະອົງສົ່ງພຣະແກ້ວຟ້າປ່ຽນມາໃຫ້ແທນນັ້ນ ແມ່ນວ່າພຣະແກ້ວຟ້າລາຊະບຸຕຕີ ຈະມີກິຕຕິລັກສະນະໂສມທີ່ໂສພາຍິ່ງກວ່າ ພຣະເທບກະສັດຕີ ຮ້ອຍພັນທະວີກໍ່ດີ ກໍຍັງຫາໄດ້ລຶບກິຕິສັພພຣະເທບກະສັດຕີເສຍໄດ້ ຈະເປັນທີ່ອົດສູຊົ່ວກັບປາວະສານ ຂ້າພຣະອົງຈຶ່ງຂໍສົ່ງພຣະແກ້ວຟ້າຄືນ ຂໍໃຫ້ພຣະອົງຈົ່ງຊົງເມດຕາພຣະລາຊະທານພຣະເທບກະສັດຕີແກ່ຂ້າພຣະອົງ ດັ່ງມີພຣະລາຊະສານອະນຸຍາດຕາມແຕ່ກ່ອນເຖີດ.
ສົມເດັດພຣະມະຫາຈັກກະພັດແຈ້ງຂໍ້ຄວາມໃນພຣະລາຊະສານນັ້ນແລ້ວ ຈຶ່ງຮູ້ສຶກລະອາຍພຣະໄທ ເມື່ອພຣະເທບກະສັດຕີຫາຍປຣະຊວນແລ້ວ ກໍ່ຊົງຈັດເຄື່ອງລາຊະຊູປະໂພກ ພ້ອມດ້ວຍຜູ້ຄົນຈຳນວນ 500 ຄົນ ໃຫ້ພຣະຍາແມນ ນຳເອົາພຣະເທບກະສັດຕີ ສົ່ງມາໃຫ້ ໃນເດືອນ 5 ປີຊວດ ສັກກະລາຊະ 926* (ພສ 2107) (* ພົງສາວະດານພາສາລາວກວ່າວ່າ ຈຸລະສັກກະລາຊະ 913 ພສ 2094)
ຝ່າຍພຣະມະຫາທຳມະລາຊະາ ຜູ້ຝັກໄຝ່ຝ່າຍພະມ້າຢູ່ກ່ອນແລ້ວ ເມື່ອຄັ້ງເສີກຊ້າງເຜືອກ ເຊິ່ງຕອນນັ້ນກຸງສີອະຍຸທທະຍາປຽບເໝືອນໜຶ່ງເປັນເມືອງອອກຂອງພະມ້າ ພຣະເຈົ້າກຸງຫົງສາວະດີໄດ້ແຕ່ງຕັ້ງໃຫ້ພຣະມະຫາທຳມະລາຊະາຢູ່ຄອງເມືອງພິດສະນຸໂລກຕາມເດີມ ແລະໃຫ້ຄວາມສະໜິດສະໜົມຫຼາຍກວ່າທາງສົມເດັດພຣະມະຫາຈັກກະພັດ ເພາະເປັນອຸບາຍຂອງພະມ້າທີ່ຈະເຮັດໃຫ້ກຸງສີອະຍຸທທະຍາແຕກຄວາມສາມັກຄີ ແລະເມື່ອທາງພຣະມະຫາທຳມະລາຊະຮູ້ຂ່າວວ່າ ຈະມີການສົ່ງພຣະເທບກະສັດຕີໄປທີ່ເມືອງສີສັຕຕະນາກລ້ານຊ້າງ ຈຶ່ງມີໜັງສືແຈ້ງໄປໃຫ້ພຣະເຈົ້າບຸເຣງນອງຮັບຊາບ ຝ່າຍພະມ້າຄິດຈະຕັດໄມຕີລະຫວ່າງສີສັຕຕະນາກແລະກຸງສີອະຍຸທທະຍາ ຢູ່ແລ້ວ ຈຶ່ງແຕ່ງຕັ້ງໃຫ້ພຣະຕະບະເປັນຫົວຫນ້າຍົກທັບ 5,000 ມາລັດດັກຕາແສງມະເຣິງ ນອກດ່ານເມືອງເພັດຊະບູນ ແລ້ວສະກັດຕີທັບສີສັຕຕະນາກລ້ານຊ້າງ ເຊິ່ງມາຮັບພຣະເທບກະສັດຕີຈົນແຕກໄປ ແລະໄດ້ອົງພຣະເທບກະສັດຕີແລ້ວນຳໄປຖວາຍພຣະເຈົ້າບຸເຣງນອງ
ສົມເດັດພຣະມະຫາຈັກກະພັດຊົງຊາບຂ່າວ ແລະໄດ້ແຄ້ນພະໄທນັກໜາ ເຊັ່ນດຽວກັນກັບພຣະເຈົ້າໄຊຍະເຊດຖາທິລາດນັ້ນກໍ່ຊົງພຣະພິໂຣດຫຼາຍກວ່າ ເຊິ່ງການທີ່ພະມ້າຍົກທັບມາລັກແລະຍາດເອົາພຣະເທບກະສັດຕີໄປໃນຄັ້ງນີ້ ເຊິ່ງເປັນເພາະພຣະມະຫາທຳມະລາຊະາເຈົ້າເມືອງພິສະນຸໂລກ ແຕ່ສົມເດັດພຣະມາຫາຈັກກະພັດມີພຣະລາຊະສານຫ້າມໄວ້ຈຶ່ງການເກີດສົງຄາມໃນຄັ້ງນັ້ນ…

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

ຂ່າວເດັ່ນທີ່ຢາກໃຫ້ອ່ານ

ເຂົ້າຕົ້ມໃຫຍ່ ໃນເທສະການປີໃໝ່ຈີນ-ຫວຽດນາມ

ເມື່ອກ້າວເຂົ້າສູ່ເທສະການປີໃໝ່ຈີນ-ຫວຽດນາມປີ ໃດ ເຮົາມັກຈະນຶກເຖິງເຫດການທີ່ມີຄວາມຕື່ນຕາຕື່ນໃຈກ…