ໜ້າຫຼັກ ນານາສາລະ ປະຫວັດສາດ ເຂົ້າຕົ້ມໃຫຍ່ ໃນເທສະການປີໃໝ່ຈີນ-ຫວຽດນາມ

ເຂົ້າຕົ້ມໃຫຍ່ ໃນເທສະການປີໃໝ່ຈີນ-ຫວຽດນາມ

2 ຄົນ ກຳລັງອ່ານຢູ່
0
0
94
Loading...

ເມື່ອກ້າວເຂົ້າສູ່ເທສະການປີໃໝ່ຈີນ-ຫວຽດນາມປີ ໃດ ເຮົາມັກຈະນຶກເຖິງເຫດການທີ່ມີຄວາມຕື່ນຕາຕື່ນໃຈກັບການແຫ່ສິງໂຕເພື່ອ ເປັນການໄປອວຍພອນໃຫ້ ໂຊກໄຊຫ້າງຮ້ານ, ສຳນັກງານອົງການຕ່າງໆ ແລະ ຄຽງຄູ່ກັນນັ້ນກໍແມ່ນ “ເຂົ້າຕົ້ມຫໍ່ໃຫຍ່” ເປັນຮູບສີ່ລ່ຽມ ຫຼື ກົມຍາວມີຂະໜາດແຕ່  500 ກຣາມໄປຈົນເຖິງ 1 ກິ ໂລກຣາມທີ່ຫຸ້ມຫໍ່ດ້ວຍຕອງລຽງ, ທາງໃນຈະມີໝາກຖົ່ວຂຽວຕຳໃຫ້ມຸ່ນໆ ພ້ອມກັບຊີ້ນໝູສາມຊັ້ນປະມານ  200 ກຣາມ ປົນກັບເກືອ ແລະ ພິກໄທດຳ ແລ້ວມາຫໍ່ມັດເຂົ້າກັນດ້ວຍຕອກ ແລ້ວມາຕົ້ມຢ່າງໜ້ອຍໃຊ້ເວລາປະມານ 24 ຊົ່ວໂມງຈຶ່ງຈະເຮັດໃຫ້ມີລົດຊາດຫອມນຸ່ມນວນດີ.

ຕາມຕຳນານຂອງຊາວ ຈີນ-ຫວຽດນາມໃຫ້ຮູ້ວ່າ:
ເມື່ອກ່ອນມີກະສັດອົງໜຶ່ງມີລູກຫຼາຍຄົນ​ເຊິ່ງແຕ່ລະຄົນນັ້ນລ່ວນແຕ່ເປັນຄົນຮັ່ງມີ ເປັນເຈົ້າໃຫຍ່ນາຍໂຕຕາມເມືອງຕ່າງໆ​ພໍແລ້ວເສັດສິ້ນລະດູການຜະລິດ ຫຼື​ ຂຶ້ນປີໃໝ່ຈຶ່ງໄດ້ໂຮມຍາດພີ່ນ້ອງກັນຂຶ້ນໄປໄຫວ້ຕໍ່ພໍ່ຜູ້ເປັນກະສັດ ພ້ອມຂອງຝາກຂອງຕ້ອນທີ່ມີລາຄາ ແລະອາຫານອັນເລີດ ສ່ວນອົງນ້ອງຫຼ້າ ຖືກໄປປົກຄອງເມືອງນ້ອຍໆແຫ່ງໜຶ່ງ ບໍ່ຄ່ອຍອຸດົມສົມບູນຄືກັບພວກອ້າຍເອື້ອຍ ຈຶ່ງໄດ້ເຮັດເຂົ້າຕົ້ມຫໍ່ໃຫຍ່ອັນໜຶ່ງ ເປັນຂອງຖວາຍແກ່ກະສັດຜູ້ເປັນພໍ່.​
ທຸກຕ່າງກໍເຢາະເຢີ້ຍວ່າ ຈັ່ງແມ່ນອຶດຢາກ ບໍ່ຊ່າງເບິ່ງອ້າຍເອື້ອຍ​ຕ່າງກໍມີຊັບສິນ​ ແລະອາຫານອັນດີມາຖວາຍພໍ່.​
ເມື່ອ​ຮອດເວລາ​ຜູ້ເປັນພໍ່ໄດ້ຮັບຂອງຕ້ອນຈາກລູກແຕ່ລະຄົນ ແລະກິນອາຫານ ທີ່ລູກນຳມາ ເຊິ່ງບໍ່ຄ່ອຍຖືກປາກຈັກຢ່າງ ພໍມາຮອດເຂົ້າຕົ້ມຂອງລູກຊາຍຫຼ້າກໍແປກໃຈເຖິງລົດຊາດອັນແຊບ ແລະກິ່ນຫອມ ພໍ່ຈຶ່ງຖືກໃຈ ແລະຍົກຍ້ອງລູກຊາຍຫຼ້າເປັນທີ່ສຸດ.​
ອີກອັນໜຶ່ງເຂົ້າຕົ້ມໃຫຍ່ນີ້ ບໍ່ແມ່ນເຮັດຂຶ້ນມາເພື່ອກິນແຊບໃນເທສະການເທົ່ານັ້ນ ແຕ່ມີຄວາມໝາຍຄວາມສຳຄັນຫຼາຍ ງ ເພາະວ່າໃນ ເຂົ້າຕົ້ມໃຫຍ່ນີ້ ເຮັດຂຶ້ນມາບົນພື້ນຖານຄະຕິຄວາມເຊື່ອຖືຂອງບັນພະບູລຸດ ເລື່ອງຄວາມອຸດົມສົມບູນຂອງ ໂລກທີ່ເຮົາຢູ່. ໃນເຂົ້າຕົ້ມ ໃຫຍ່ມີສ່ວນປະກອບຕົ້ນຕໍຢູ່ 3 ຢ່າງຄື: 1) ໃບຕອງຫຸ້ມຫໍ່ ແລະ ໄມ້ຕອກມັດເຂົ້າຕົ້ມ ເປັນຕົວແທນຂອງແຜ່ນດິນ -ນໍ້າ, 2) ເຂົ້າໜຽວ, ໝາກຖົ່ວເຫຼືອງ ຫຼື ຖົ່ວຂຽວ ແລະ ພິກໄທ ເປັນຕົວແທນຄວາມ ອຸດົມສົມບູນຂອງພືດພັນທັນ ຍາຫານ ແລະ 3) ຊີ້ນ, ນໍ້າມັນ ເປັນຕົວແທນຂອງຄົນ ແລະ ສັດສາວາສິ່ງເມື່ອ ເອົາມາ ລວມເຂົ້າກັນຈົນໄດ້ເຂົ້າຕົ້ມ ຫໍ່ໃຫຍ່ ຈຶ່ງປຽບເໝືອນໜ່ວຍ ໂລກຂອງເຮົາ.


ດັ່ງນັ້ນ, ຊາວຈີນ ແລະ ຫວຽດນາມ ເມື່ອເຖິງເທສະການປີໃໝ່ ຈຶ່ງໄດ້ພ້ອມພຽງ ກັນເຮັດເຂົ້າຕົ້ມໄວ້ເພື່ອເປັນ ເຄື່ອງບູຊາແດ່ບັນພະບູລຸດ ຜູ້ລ່ວງລັບໄປໄດ້ຮ່ວມສະຫຼອງນຳ. ນອກຈາກນີ້ແລ້ວ ຍັງເອົາໄວ້ລ້ຽງແຂກຄົນທີ່ມາຢ້ຽມຢາມ ແລະ ເປັນຂອງ ຝາກຂອງຕ້ອນສຳລັບວັນບຸນດັ່ງກ່າວ ແລະ ເຖິງແມ່ນວ່າ ຈະໄປຢູ່ບ້ານອື່ນເມືອງໄກພຽງໃດກໍຕາມ ຊາວຈີນ ແລະ ຫວຽດນາມຕ້ອງໄດ້ເຮັດເຂົ້າຕົ້ມບໍ່ໄດ້ຂາດ ດັ່ງທີ່ເຮົາພົບເຫັນຢູ່ບ້ານເຮົາໃນປັດຈຸບັນ ເຊິ່ງບາງຄົນນອກຈາກ ເຮັດໄວ້ພຽງພໍສຳລັບຕົນ  ແລ້ວຍັງເຮັດເພື່ອເປັນສິນຄ້າຈຳໜ່າຍໃຫ້ສັງຄົມເພື່ອ ທຸກຄົນສາມາດຊື້ມາກິນ    ແລະ ເອົາໄວ້ບູຊາໃນງານບຸນດັ່ງກ່າວໄດ້ອີກດ້ວຍ.

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

ຂ່າວເດັ່ນທີ່ຢາກໃຫ້ອ່ານ

ພຣະທາດສີສອງຮັກ​ ສັນຍາຮັກສອງກະສັດລາວ-ໄທ

ໃນຂະນະທີ່ພະເຈົ້າເມືອງຫົງສາວະດີກຳລັງປາບປາມເສີກທີ່ທາງເມືອງຣາມັນຢູ່ ພະເຈົ້າໄຊຍະເຊດຖາທິລາດມີແນ…